Художественнэ гимнастикэм ифестивалэу «DAG GYM» зыфиIорэр Дагъыстан икъалэу Каспийскэ щыкIуагъ. Адыгэ Республикэр къэзыгъэлъэгъуагъэхэр олимпийскэ резервым испорт еджапIэу В.С. Максимовым ыцIэ зыхьырэм зыщызыгъасэхэрэр ары.

Мэфэ заулэм пшъэшъэ ныбжьыкIэхэм яIэпэIэсэныгъэ къагъэлъэгъуагъ. Аныбжь елъытыгъэу ахэр гощыгъагъэх, лъэныкъо зэфэшъхьафхэмкIэ заушэтыгъ. Зэ­нэкъокъум еплъынэу къекIолIагъэхэм гимнасткэ­хэм яухьазырыныгъэ осэшIу фашIыгъ, бэрэ Iэгу афытеуагъэх. Мыгъэрэ фестивалым нэбгырабэ хэлэжьагъ, ащ къегъэлъагъо мы спорт лъэпкъым зызэриушъомбгъу­рэр ыкIи пыщагъэхэм яп­чъагъэ илъэс къэс зэрэха­хъорэр. Фестивалыр шIукIэ цIыфхэм агу къинэжьыным зэхэщакIохэм анаIэ тырагъэтыгъ ыкIи ар къадэхъугъ.

Адыгеим испортсмен­кэхэм унэе зэнэкъокъухэм хагъэунэфыкIырэ чIыпIэ 27-рэ къащахьыгъ: дышъэ медаль 19, тыжьынэу — 7, зы джэрз. Спортым имастерхэм япрограммэкIэ текIоныгъэр къафагъэ­шъошагъ Дарья Ларионовамрэ Полина Иванчен­кэмрэ. Куп упражнениехэмкIэ республикэм илIыкIохэм апэрэ чIыпIищ къахьыгъ.
Зэнэкъокъу программэм дакIоу зэлъашIэрэ тренерхэм ыкIи гимнасткэхэм мастер-классхэр зэ­хащагъэх, IэпэIэсэны­гъэу аIэкIэлъымкIэ ахэр спортсменкэ ныбжьыкIэхэм адэгощагъэх.