Адыгэ къэралыгъо университетым ипроектэу «Наука вокруг» зыфиIорэр урысые просветительскэ проект анахь дэгъуищымэ ащыщ хъугъэ.

Я XI-рэ Урысые шIухьафтынэу «За верность науке» зыфиIорэм иаужырэ уцугъо проектым ящэнэрэ чIыпIэ къыщихьыгъ. Лъэныкъоу «ШIэныгъэр — кIэлэ­цIыкIухэм апай» зыфиIорэр ары зыхэлэжьагъэхэр. БэмышIэу Москва щыкIогъэ мэфэкI Iофтхьабзэм проектым ипащэу, Адыгэ къэралыгъо университетым иректорэу Мамый Даутэ щагъэшIуагъ.
Урысыем ишIэныгъэлэжьхэм яIофшIэн уасэ фэшIыгъэныр ары пшъэрылъ шъхьа­Iэу зэхэщакIохэм зыфагъэуцужьырэр. 2025-рэ илъэсым Урысыем ишъолъыр 81-мэ ялIыкIохэм лъэIу тхылъ 2000-м ехъу къагъэхьыгъ. Ахэм япроектхэр шIэныгъэлэжь-экспертхэм ыкIи медиа­сферэм щылажьэхэрэм ауплъэкIугъэх.
Урысые шIэныгъэ проектэу «Наука вокруг» зыфиIорэр 2024-рэ илъэсым Адыгэ къэралыгъо университетым щызэхащагъ. Федеральнэ проектэу «Популяризация науки и технологии» зыфиIорэм къыдыхэлъытагъэу Урысыем шIэныгъэмкIэ и Министерствэ игрант къызэрэдихыгъэм ишIуагъэкIэ ар щыIэныгъэм щыпхыращы.
Проектым ипшъэрылъ шъхьаIэр естественнэ, хьисап шIэныгъэхэмкIэ ыкIи къэбарлъыгъэIэс технологиехэмкIэ шIэныгъэлэжьхэм ягъэхъагъэхэр зэлъягъэшIэгъэнхэр ары. Проектым хэлэжьэгъэ лекторхэм ащыщых хьисапымкIэ шIэныгъэлэжьхэу Алексей Савватеевыр, Андрей Райгородскэр, Николай Андреевыр, астрофизикэу Дмитрий Вибе, химикэу Артем Огановыр, нейрофизиологэу Александр Каплан, биоэтикэу Елена Брызгалинар, журналистхэу Алексей Паевскэр ыкIи Анна Хоружай.
КъэбарлъыгъэIэс агентствэу ТАСС-м зэзэгъыныгъэу дашIыгъэм ишIуагъэкIэ лекциеу зэхащагъэхэм нэбгырэ миллиони 4-м ехъу яплъыгъ. ПэIудзыгъэ егъэджэн сыхьатэу «Как все устроено» зыфиIорэм кIэлэеджэкIо мин 240-рэ еплъыгъ, джащ фэдэу дунаим ихэгъэгу 14-мэ ащыщ ныбжьыкIэ мин 16-м ехъу Урысые кIэлэцIыкIу гупчэу «Орленкэм» щызэхащэгъэ шIэныгъэмкIэ фестивалым хэлэжьагъэх.
Адыгэ къэралыгъо
университетым
ипресс-къулыкъу.