Урысые духовой обществэм хэтхэм я ЗэIукIэ кIэщакIо зыфэхъугъэ мэфэкI Iофтхьабзэу «Музыкант ныбжьыкIэхэм ахэгъэхьэгъэнхэр» зыфиIорэр искусствэхэмкIэ кIэлэцIыкIу еджапIэу N 6-м щыкIуагъ.

Программэм къыдыхэлъытэгъагъэх еджапIэхэм ачIэсхэм ыкIи кIэлэцIыкIу­хэм якъэгъэлъэгъонхэр. Адыгэ Респуб­ликэм культурэмкIэ и Министерствэ илIыкIохэр, искусствэхэмкIэ колледжэу Тхьабысымэ Умар ыцIэ зыхьырэм щезгъаджэхэрэр ыкIи ащ чIэсхэр, нэмыкIхэри ащ хэлэжьагъэх.
Музыкантхэм хэхъоныгъэ ашIыныр, кIэлэеджакIохэм сэнаущыгъэу ахэлъыр къыхэгъэщыгъэныр, ар къагъэшъыпкъэ­жьын алъэкIэу гъэсэгъэнхэр, ныбжьыкIэхэр культурнэ щыIакIэм хэщэгъэнхэр, пшъэрылъ гъэнэфагъэхэр зыфагъэуцужьынхэр, ахэр щыIэныгъэм щыпхыращыжьынхэм фэщэгъэнхэр IофтхьабзэмкIэ анахь шъхьаIэу щытыгъэх.

— Урысые духовой обществэм игукъэкIкIэ Iофтхьабзэу «Му­зыкант ныбжьыкIэхэм ахэ­гъэхьэгъэнхэр» зыфиIорэр ретэгъэкIокIы. ИскусствэхэмкIэ кIэлэцIыкIу еджапIэм къы­чIэхьагъэхэр мэзитIум зыфэд­гъэсагъэхэр непэ сценэм къыщагъэлъэгъощт. Илъэси 6-м щыублагъэу 17-м нэс зыныбжьхэр тиеджапIэ щеджэх. ЯкIэлэцIыкIугъом къыщыублагъэу музыкальнэ Iэмэ-псымэхэм къязыгъэ­Iорэ ныбжьыкIэхэм искусствэм щыпхыращырэ лъагъор щыIэныгъэм къыщятэжьынэу тэгугъэ, — къыIуагъ искусствэхэмкIэ кIэ­лэцIыкIу еджапIэм ипащэу Дмитрий Гордиенкэм.
Музыкальнэ лъэпкъ Iэмэ-псымэхэм произведениехэр къязыгъэIорэ кIэлэцIыкIухэм дахэу сценэм зыкъыщагъэлъэ­гъуагъ. Музыкант ныбжьыкIэхэм зэрахэхьагъэхэр къэзыушыхьатрэ свидетельствэхэр ахэм афагъэшъошагъэх.
Мэкъамэхэр икъоу агъэIорышIэхэзэ ныбжьыкIэхэр шIыкIэшIухэм алъыхъу­гъэх, искусствэм ыкIуачIэ къэзэрэугъоигъэхэм алъагъэIэсыгъ.
Лъэпшъыкъо Фатим.