Лъэпкъ IофхэмкIэ Федеральнэ агентствэм шэкIогъум и 1-м къыщегъэжьагъэу и 8-м нэс я X-рэ Урысые Iофтхьабзэу «Этнографическэ Iорытхышху» зыфиIорэр зэхищэщт. Мыр зытегъэ­псыхьагъэр Урысыем ис лъэпкъ­хэм язэхэшIыкIрэ ягушъхьэ баиныгъэрэ зыкъягъэIэтыгъэныр, тарихъ хъугъэ-шIагъэхэр тэрэзыджэу къагъэлъэгъонэу зэрэфежьэхэ­рэм пэуцужьыгъэныр ары.

Адыгеим исхэр илъэс къэс мыщ фэдэ Iофхьабзэм чанэу хэлажьэх. 2024-рэ илъэсым нэбгырэ 8000-м ехъу Iорытхышхом хэлэжьагъ.
Урысыем, IэкIыб къэралыгъохэм ащыпсэухэрэм тихэгъэгу ис лъэпкъхэм яхабзэхэм, абзэ, ятарихъ, якультурэ хэшIыкIэу афыряIэр ауплъэкIунымкIэ этнографическэ Iорытхышхор амалышIоу щыт. Ныбжь, сэнэхьат зэфэшъхьаф зиIэхэр ащ зэрепхых.
Хабзэ зэрэхъугъэу, очнэу ыкIи онлайн шIыкIэм тетэу Iофтхьабзэр зэхащэ. Урысыем ишъолъырхэм ячIыпIэ гъэнэфагъэхэм, СНГ-м хэхьэрэ хэгъэгухэм я Урыс унэхэм очнэу ар ащэкIо. Адыгеим ичIыпIищмэ — Адыгэкъалэ, Красногвардейскэм, Лъэпкъ музеим очнэу ар ащызэхащэщт.
Сайтэу «национальнаяполитика.рф» зыфиIорэм онлайн шIыкIэм тетэу ар щатхын алъэкIыщт. Iорытхым федеральнэ мэхьанэ зиIэ упчIэ 30 хэхьэ, такъикъ 45-кIэ ахэм джэуап къаратыжьын фае. АнахьыбэмкIи балли 100 афагъэуцурэр.
ХэушъхьафыкIыгъэ дзэ операцием хэлажьэхэрэм апэрэу видеокIэ яупчIэхэр Iофтхьабзэм къащаратыщтых. Хабзэ зэрэхъугъэу, Iофтхьабзэм икIэуххэр Урысые Федерацием и Конституцие и Мафэ – тыгъэгъазэм и 12-м зэфахьысыжьыщтых.
Урысые Iофтхьабзэу «Этнографическэ Iорытхышху» зыфиIорэм фэгъэхьыгъэ къэбархэр нахь игъэкIотыгъэу порталэу «национальнаяполитика.рф» зыфиIорэм къыщызIэкIагъэхьан алъэкIыщт.