Адыгеим и ЛIышъхьэу КъумпIыл Мурат тхьамэтагъор дызэрихьэзэ АР-м иправительствэ и Унэ щыкIуагъ терроризмэм пэшIуекIорэ Комиссием изимычэзыу зэхэсыгъо.

Зэхэсыгъом хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, Къэралыгъо Совет – Хасэм и Тхьаматэ игуадзэу Цэй Эдуард, федеральнэ инспектор шъхьаIэу Сергей Дрокиныр, АР-м и Прокуратурэ, АР-м хэгъэгу кIоцI IофхэмкIэ и Министерствэ, Урысыем щынэгъончъэнымкIэ и Федеральнэ къулыкъу и ГъэIорышIапIэу АР-м щыIэм, Урысыем и Следственнэ комитет и Следственнэ гъэIорышIапIэу Адыгеим щыIэм, нэмыкI хэбзэухъумэкIо ыкIи уплъэкIокIо-лъыплъэкIо къулыкъухэм яIэшъхьэтетхэр, муниципалитетхэм япащэхэр.
Урысыем щынэгъончъэнымкIэ и Федеральнэ къулыкъу и ГъэIорышIапIэу АР-м щыIэм ипащэу Михаил Кемеровым къыIотагъ республикэм ит псэуалъэхэр терроризмэм щыухъумэгъэнхэмкIэ Iоф­тхьабзэхэм япхырыщын зэрэкIорэм фэгъэхьыгъэу.

Ащ къыIуагъэм къыхигъэхъожьыгъ Росгвардием и ГъэIорышIапIэу АР-м щыIэм ипащэ ипшъэрылъхэр зыгъэцэкIэрэ Владимир Кущевым. Мы илъэсым росгвардейцэхэр терроризмэм псэуа­лъэхэр щыухъумэгъэнхэмкIэ уплъэкIун 594-мэ ахэлэжьагъэх. ЗэгъэшIужь хьыкумышIхэм административнэ Iоф 57-мэ афэгъэхьыгъэ тхыгъэхэр аIэкIагъэхьа­— гъэх.
Компаниеу «Лукойлым» ичIыдэгъэбазэхэу республикэм итхэм щынэгъончъэным ылъэныкъокIэ Iофтхьабзэхэу ащызэшIуахыхэрэм афэгъэхьыгъэу къы­Iотагъ пшъэдэкIыжьэу ыхьырэмкIэ гъу­нэпкъэ гъэнэфагъэ зиIэ обществэу «Лукойл Югнефтепродукт» зыфиIорэм игенеральнэ пащэу Андрей Гаврилец.
Адыгеим и ЛIышъхьэ гъэстыныпхъэ— энергетическэ мэхьанэ зиIэ псэуалъэхэр терроризмэм, анахьэу хэушъхьафыкIыгъэ дзэ операциер зыщыкIорэ лъэхъаным, щыухъумэгъэнхэмкIэ Iофтхьабзэхэу зэрахьэхэрэм зарагъэушъомбгъуным мэхьанэшхо зэриIэр къыхигъэщыгъ.
«Республикэм зыпкъитыныгъэ илъынымкIэ псэуалъэхэр зэкIэ лъэшэу ухъу­мэгъэнхэ фае. Предприятиехэмрэ организациехэмрэ япащэхэр цIыфхэмрэ мылъкумрэ щынэгъончъэнхэм яIофыгъо­хэм пшъэдэкIыжь ин ахэлъэу якIолIэнхэ, анахь мэхьанэшхо зиIэ псэуалъэхэмкIэ щынэгъончъэным епхыгъэ Iофтхьэбзэ тедзэхэр къызфагъэфедэнхэ фае, ахэм ахэхьэх радиоэлектроннэ бэнэныгъэм иджырэ амалхэр», — къыIуагъ КъумпIыл Мурат.
АР-м и ЛIышъхьэрэ иминистрэхэм я Кабинетрэ я Администрацие къэралыгъо къулыкъумкIэ ыкIи кадрэ политикэмкIэ и ГъэIорышIапIэ ипащэу Бэгугъэ Азэмат къыIотагъ терроризмэм пэшIуекIогъэным ылъэныкъокIэ Iофтхьабзэхэм япхырыщынкIэ пшъэдэкIыжь зыхьырэ IофышIэхэм яIэпэIэсэныгъэ зэрэхагъахъорэм фэгъэ­хьыгъэу. Мыекъопэ къэралыгъо технологическэ университетым иректорэу Къуижъ Саидэрэ цIыф лъэпкъ зэфэшъхьафхэм къахэкIыгъэхэм ыкIи дин зэмылIэужыгъохэр зылэжьыхэрэм азыфагу зэгурымыIоныгъэхэр къимытэджэнхэм, терроризмэмрэ экстремизмэмрэ апэуцужьыгъэным яIофыгъохэмкIэ Адыгэ къэралыгъо университетым и Координационнэ гупчэ ипащэу Мэлхъожь Оксанэрэ а лъэныкъомкIэ Iофхьабзэхэу зэрахьэ­хэрэм афэгъэхьыгъэу къаIотагъ.
Ахэм къызэрэхагъэщыгъэмкIэ, мы илъэсым бэдзэогъум Мыекъопэ къэралыгъо технологическэ университетым щызэхэщэгъэ Гупчэм къэралыгъо къулыкъушIи 10-мэ ыкIи муниципальнэ къулыкъушIэ 77-мэ лъэныкъоу «Терроризмэм пэшIуекIогъэныр» зыфиIорэмкIэ яшIэныгъэхэм ахагъэхъуагъ. ШэкIогъум курсэу «Неонацизмэм пэшIуекIогъэныр» зыфиIорэмкIэ егъэджэнхэр зэхащэщтых. Адыгэ къэралыгъо университетым а IофыгъомкIэ курси 8 щырахъухьагъ, ахэм ащыщэу 6-р зэхащэгъах (270-рэ фэдиз ащ щеджагъ). Урысыем гъэсэныгъэмрэ шIэныгъэмрэкIэ и Министерствэ къэбар политикэмкIэ ыкIи щынэгъэнчъэнымкIэ и Департамент къызыфагъэфедэзэ, программэхэр шъолъырхэм аIэкIагъахьэх.
ЦIыф лъэпкъ зэфэшъхьафхэм къахэ­кIыгъэхэмрэ дин зэмылIэужыгъохэр зы­лэ­жьыхэрэмрэ азыфагу илъ зэфыщытыкIэхэм афэгъэхьыгъэу къыIотагъ Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэт.
А IофыгъомкIэ зэлъыIэсыкIэ амалхэм бэ къарыхьэрэр, лъэпкъ зэфэшъхьафхэм къахэкIыгъэхэм ыкIи дин зэмылIэужы­гъохэр зылэжьыхэрэм зэгурыIоныгъэ азыфагу илъыным фэгъэхьыгъэ Iофтхьэбзаби зэхащэ. ГущыIэм пае, лъэпкъ зыкIыныгъэм и Мафэ ехъулIэу Этнографическэ диктант атхыщт. Лъэпкъхэм яIоф­хэмкIэ Федеральнэ агентствэм пэщэныгъэ дызэрихьэзэ а Урысые Iофтхьабзэр зэхащэ. Лъэпкъ зэфэшъхьафхэм къахэкIыгъэхэмрэ дин зэмылIэужыгъохэр зылэжьыхэрэмрэ зэгурыIоныгъэ-зэпхыныгъэ азыфагу илъынымкIэ Къэралыгъо къэбар системэм иамалхэм ягъэфедэн шъхьафэу ар къыщыуцугъ.
КъэгущыIагъэхэм япсалъэхэр зэфихьысыжьхэзэ Адыгеим и ЛIышъхьэу КъумпIыл Мурат анахьэу анаIэ зытыраригъэдза- гъэр терроризмэмрэ экстремизмэмрэ яIофыгъохэм екIолIэкIэ тэрэз афыряIэныр ары.
«Адыгеир лъэпкъи 100-м ехъумэ ялIыкIохэр мамырныгъэрэ зэгурыIоныгъэрэ азыфагу илъэу зыщыпсэухэрэ шъолъырэу щыт. Тэ пшъэрылъ шъхьаIэу тиIэр рес­публикэм зыпкъитыныгъэ илъэу, лъэпкъэу къызхэкIыгъэмрэ динэу алэжьырэмрэ ямылъытыгъэу зэрэлъытэжьхэу, зэгурыIохэу цIыфхэр щыпсэунхэм тыдэлэжьэныр ары», — къыхигъэщыгъ КъумпIыл Мурат.
Республикэм и ЛIышъхьэ къызэриIуа­гъэмкIэ, Адыгеир нахь зэтегъэпсыхьагъэ хъунымкIэ, зэхъокIыныгъэшхохэр тапэкIи лъыгъэкIотэгъэнхэмкIэ зэгурыIоныгъэмрэ рэхьатныгъэмрэ лъэпсэшIу мэхъух.
Iофыгъоу зытегущыIэнхэу щытыгъэхэмкIэ унашъохэр аштагъэх, министерствэхэм ыкIи къулыкъухэм яIэшъхьэтетхэм, муниципалитетхэм япащэхэм пшъэрылъ гъэнэфагъэхэр афашIыгъэх.

АР-м и ЛIышъхьэ
ипресс-къулыкъу къытырэ къэбархэмкIэ Тхьаркъохъо Сафыет.