ГандболымкIэ Урысыем и Суперлигэ хэт «АГУ-Адыифыр» мы мафэхэм Краснодар икомандэу «Кубань» зыфиIорэм дешIагъ, пчъагъэр зэфэдизэу зэIукIэгъур аухыгъ.
«Кубань» — «АГУ-Адыиф» — 26:26 (11:14)

«Кубань» щешIагъэх: къэлэп­чъэIутхэр — Пойловар, Скнарь. Савиновар — 6, Голуб — 5, Куцеваловар — 4, Казихановар — 3, Хьакуамэр — 3, Промысленкэр — 2, Игнатенкэр — 1, Дорошенкэр — 1, Акулинар — 1.
«АГУ-Адыифым» хэтыгъэх: къэлэпчъэIутхэр — Черницовар, Гобадзе, Черновар. Хавронинар — 7, Краснокутскаяр — 5, Локян — 4, Коблыр — 3, Вайкум — 3, Миловар — 2, Салаховар — 1, Смирновар — 1.

Никита Голуб зипэщэ тикомандэ ешIэкIэ дахэ къыгъэлъэгъуагъ. ЗэIукIэгъум ипэублэ типшъашъэ­хэм зэкIэлъыкIоу къэлапчъэм IэгоуиплI дадзагъ. Нэужым «Кубань» иешIакIэ нахь ригъэхъугъ, ау апэрэ таймыр 11:14-у «АГУ-­Адыифым» къыхьыгъ. ЯтIонэрэ едзыгъор аухынкIэ такъикъ 15 къэнагъэу тигандболисткэхэр 23:19-у ыпэ итыгъэх. Ау бысым­хэр къызэкIэкIуагъэхэп, зы уахътэм 26:25-у ыпэ ишъыгъэх. Ау Юлия Хавронинам къэлапчъэм Iэгуаор дидзэн ылъэкIыгъ, пчъагъэр 26:26-у ешIэгъур аухыгъ.
— Командэхэм ешIэкIэ дахэ къагъэлъэгъуагъ, текIоныгъэм фэ­бэнагъэх. Зэфэхьысыжьым бгъуитIури ыгъэрэзэнэу щыт, — къыIуагъ «АГУ-Адыифым» итре­нер шъхьаIэу Никита Голуб.
Мыекъуапэ икомандэ я 9-рэ чIыпIэм щыт. КъыкIэлъыкIощт зэIукIэгъур тигандболисткэхэм Мыекъуапэ щыряIэщт, шэкIогъум и 4-м «Динамо-Синара» тихьа­кIэщт.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Ростов-Дон» — 16.
2. «ЦСКА» — 14.
3. «Черноморочка» — 11.
4. «Астраханочка» — 10.
5. «Лада» — 10.
6. «Звезда» — 9.
7. «Динамо-Синара» — 7.
8. «Кубань» — 7.
9. «АГУ-Адыиф» — 5.
10. «Луч» — 3.
11. «Уфа-Алиса» — 2.
12. «Университет» — 0.