Чъэпыогъум и 27-м къыщегъэжьагъэу и 29-м нэс я 34-рэ шъолъыр Дунэе Рождественскэ еджэнхэу «Гъэсэныгъэмрэ гушъхьэлэжьыгъэмрэ: уахътэм къыгъэуцурэ ушэтыпIэхэмрэ цIыфым ипIунрэ» зыфиIорэм ишъолъыр едзыгъо республикэм щырекIокIыгъ. Ащ хэлэжьагъэх республикэм ихэбзэгъэуцу ыкIи гъэцэкIэкIо къулыкъухэм ялIыкIохэр, гъэсэныгъэм щылажьэхэрэр, шIэныгъэлэжьхэр, динлэжьхэр, ныбжьыкIэхэр. УФ-м ФедерациемкIэ и Совет Iофтхьабзэм икIэщакIохэм ащыщ.

Мэфищ IофшIэныр пленарнэ зэхэсыгъом зэфишIыжьыгъ. Ащ тхьамэта­гъор щызэрихьагъ Мыекъуапэ ыкIи Адыгеим яархиепископэу Тихон. Джащ фэдэу Iофтхьабзэм къеблэгъагъэх АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыны­- гъэ­хэмкIэ ыкIи къэбар жъугъэм иамал­хэмкIэ и Комитет итхьаматэ игуадзэу Константин Щербаковыр, АР-м гъэсэныгъэмрэ шIэныгъэмрэкIэ, культурэмкIэ, хэгъэгу кIоцI IофхэмкIэ иминистерствэхэм, УФ-м ошIэ-дэмышIэ IофхэмкIэ и Министерствэ АР-мкIэ игъэIорышIэпIэ ШъхьаIэ, УФ-м пшъэдэкIыжь ягъэхьыгъэ­нымкIэ и ГъэIорышIапIэ иреспубликэ къулыкъу ялIыкIохэр, Адыгеим ыкIи Пшызэ шъолъыр ащыпсэурэ быслъымэн­хэм я ДиндэлэжьапIэ, Мыекъопэ къэ- зэкъ отделым яIофышIэхэр, Адыгэ —Хасэм итхьаматэу ЛIымыщэкъо Рэмэзан, Къырым къикIыгъэ хьакIэхэр.

— Гушъхьэлэжьыгъэ пIуныгъэ тэрэзымрэ культурнэ-тарихъ шэн-хабзэхэмрэ якъэухъумэн хэгъэгум ихэхъоныгъэ алъапс. Мы лъэныкъомкIэ мышIэныгъэм махэ тешIы. Къэралыгъом ицIыф пIугъэнымкIэ динымрэ хабзэмрэ зэрэзэготынхэ фаер непэрэ мафэм къегъэлъагъо. АщкIэ Iоф тэшIэ, къэгъэлъэгъонышIу­хэр тиIэнхэм тегугъу. Арышъ, уздэлэжьэжьыным гъунэ иIэп. Ар диндэлэжьапIэхэм, цIыфхэм, быслъымэнэуи шIы, чыристанэуи орэхъу, япшъэрылъ. Анахь шъхьаIэр ахэм уарыгъуа­зэзэ мамырэу упсэуныр ары — къыщиIуагъ архиепископым пэублэ гущыIэм.
Рождественскэ еджэнхэм якIэщакIу Урыс Православнэ Чылысым и Мыекъо­пэ ыкIи Адыгэ епархиер. ИзэхэщэнкIэ IэпыIэгъу хъугъэх УФ-м исенаторэу, ФедерациемкIэ Советым Адыгеим илIыкIоу щыIэ Александр Наролиныр, АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет, АР-м гъэсэныгъэмрэ шIэныгъэмрэкIэ и Министерствэ, хэгъэгу кIоцI IофхэмкIэ Министерствэр, УФ-м ошIэ-дэмышIэ IофхэмкIэ и Министерствэ АР-мкIэ игъэIорышIэпIэ Шъхьа­Iэ, быслъымэнхэм я ДиндэлэжьапIэ ыкIи Краснодар краим и Мыекъопэ къэзэкъ отдел.
ВидеозэпхыныгъэкIэ Iофтхьабзэм къеблэгъагъэхэм закъыфигъэзагъ УФ-м исенаторэу Александр Наролиным.
— Мыгъэрэ Рождественскэ еджэнхэм Iофыгъоу къащытIэтыгъэм игъо дэдэу щыт ыкIи социальнэ мэхьанэ ин иI. Зэхъо­кIыныгъэшхохэм язэманэу тыз­хэтым, тикультурэ, шэн-хабзэхэр къэтыухъумэзэ тыдэлъэ­бэкъонымкIэ зишIуагъэ къакIо­рэр гушъхьэ баиныгъэр ары. Лъэпкъ ыкIи дин зэфэшъхьафхэм язэдэлэжьэныгъэкIэ Адыгеир щысэшIу. Лъэпкъишъэм нахьыбэ непэ тишъолъыр щэпсэу. Быс­лъымэн ыкIи чыристан диндэлэжьапIэхэр, хэбзэгъэуцу ыкIи гъэцэкIэкIо къулыкъу зэфэ­шъхьафхэр, гъэсэныгъэ ыкIи культурнэ лэжьапIэхэр зэгъусэхэу республикэм ыпашъхьэ къэуцурэ Iофыгъохэр зэшIуахых. НыбжьыкIэхэм хэкушIулъэгъур ахалъхьэ, — къыIуагъ ащ.
ПстэумкIи Рождественскэ еджэнхэр мэкIофэхэ лъэныкъо 11-кIэ Iоф ашIагъ, нэбгырэ 80-м нахьыбэ ахэм ахэлэ­жьагъ. Республикэм икъулыкъу зэфэшъхьаф­хэмрэ быслъымэн ыкIи чыристан дин дэлэжьапIэхэмрэ Iоф зэдашIэным ахэр тегущыIагъэх, ныбжьыкIэхэм адэлэжьэгъэнымкIэ еплъыкIэхэмкIэ, екIолIакIэхэмкIэ зэхъожьыгъэх.
— Лъэныкъо 11-кIэ Iоф зышIэгъэ секцие пэпчъ хэлэжьагъэхэр зыфэгъэзагъэхэм елъытыгъэу гупшысакIэхэр, зэфэхьысыжьхэр ашIыгъэх. ТапэкIэ Рождественскэ еджэнхэр нахьышIоу зэхэщэгъэнхэмкIэ екIолIакIэхэм яусагъэх, къулыкъухэмрэ дин дэлэжьапIэхэмрэ яIофшIэн шIуагъэу къыхьырэр нахьыбэ шIыгъэнымкIэ амалыкIэхэм атегущы­Iагъэх. Сыдым пая? Зы пшъэ­рылъэу зэдытиIэм — цIыфхэр зэгозычырэ зекIуакIэхэу къэралыгъом ипыйхэм къытхахьэхэрэм апэшIуекIогъэным пай, — къыIуагъ Константин Щербаковым.
Пленарнэ зэхэсыгъом къыдыхэлъытагъэу педагогикэм, пIуныгъэм ыкIи илъэс 20-м нэс зыныбжь кIэлакIэхэм Iоф адэшIэгъэнымкIэ Урысые зэнэкъо­къоу «За нравственный подвиг учителя» зыфиIорэм ишъолъыр едзыгъокIэ анахь дэгъухэм ацIэхэр къыраIуагъэх. КIэлэцIыкIу творчествэмкIэ зэнэкъокъоу «Красота Божьего мира» зыцIэми зэ­фэхьысыжьхэр фашIыгъэх.
Анцокъо Ирин.