АР-м и Къэралыгъо Совет – Хасэм я XLIX-рэ зэхэсыгъоу иIагъэр депутатхэм языгъэпсэфыгъо уахътэ ыуж апэрагъ.

Ащ хэлэжьагъэх АР-м иминистрэхэм я Кабинет хэтхэр, федеральнэ ыкIи республикэ къулыкъухэм япащэхэр, нэмыкIхэр. Зэхэсыгъор зэрищагъ Парламентым и Тхьаматэу Владимир Нарожнэм.
Апэ зытегущыIагъэхэм ащыщ 2025-рэ илъэс бюджетым, 2026 — 2027-мкIэ агъэнэфагъэхэм зэхъокIыныгъэхэр афэшIыгъэнхэм фэгъэхьыгъэ хэбзэгъэуцугъэм ипроект. АР-м и Правительствэ ипащэ игуадзэу, финансхэмкIэ министрэу Виктор Орловым ащ нэIуасэ фишIыхэзэ къызэриIуагъэмкIэ, бюджетым ихахъохэр мы илъэсым сомэ миллион 657,4-м ехъукIэ, 2026-м сомэ миллион 81,6-кIэ, 2027-рэ илъэсым сомэ миллион 20,8-кIэ нахьыбэ мэхъух. Ащ фэшI илъэсищ бюджетым ихъарджхэми зэхъокIыныгъэ­хэр афэхъух.
Ахъщэр хэушъхьафыкIыгъэ дзэ операцием хэлажьэхэрэм ыкIи ахэм яунагъохэм IэпыIэгъу ятыгъэным, цIыф куп гъэнэфагъэхэм Iэзэгъу уцхэмрэ медицинэ пкъыгъоу ящыкIагъэхэмрэ ыпкIэ хэмылъэу аIэкIэгъэхьэгъэнхэм, сабыеу къэхъугъакIэхэм япсауныгъэ изытет иуплъэкIун, коммунальнэ инфраструктурэм игъэкIэжьын, зэхэоным нэсыгъэ унэхэм ачIэсхэм ягъэкощын, къоджэ псэупIэхэм язэтегъэпсыхьан, нэмыкIхэм апэIуагъэхьащт.
Гъэсэныгъэм фэгъэхьыгъэ шъолъыр хэбзэгъэуцугъэм зэхъокIыныгъэу фашIыгъэр республикэм иеджапIэхэм ачIэсхэу шхын стыр ыпкIэ хэмылъэу зыIэкIагъа­хьэхэрэм сэкъатныгъэ зиIэ кIэлэцIыкIу­хэр ахэгъэхьэгъэнхэм фэгъэхьыгъ. На­хьыпэкIэ ащ фэдэ фэгъэкIотэнхэм къахиубытэщтыгъэх сабый ибэхэр е лъыплъэн зимыIэу къэнагъэхэр, хэу­шъхьафыкIыгъэ дзэ операцием хэкIода­гъэ­хэм, щыIэныгъэм чIыпIэ къин ригъэ­уцуагъэхэм, Лъэпкъ гвардием хэтэу дзэ операцием хэлажьэхэрэм якIэлэцIыкIу­хэр, нэмыкIхэри.
Джащ фэдэу АР-м ихэбзэгъэуцугъэу ящэнэрэ ыкIи ащ къыкIэлъыкIорэ сабый къызэрыхъухьэгъэ унагъохэм зэтыгъо ахъщэ тын афэгъэкIогъэным фэгъэхьыгъэм зэхъокIыныгъэу фашIыщтхэм язаконопроекти депутатхэр тегущыIэхи, дырагъэштагъ.
Апэдэдэ ар заштэм, 2025-рэ илъэсым ижъоныгъуакIэ и 1-м ыуж ящэнэрэ ыкIи ащ къыкIэлъыкIорэ сабый къызфэхъугъэ­хэм сомэ мин 300 зэтыгъоу ятыгъэнэу къыщиIощтыгъ. Джы зэкIэIэбэжьхи, щылэ мазэм и 1-м ыуж къызфэхъугъэ унагъо­хэм ахъщэ IэпыIэгъур алъыIэсынэу ашIыжьыгъ. Хэбзэгъэуцугъэм къызэрэщиIорэмкIэ, ащ фэдэ унагъоу респуб­ликэм ис пэпчъ сомэ мин 300-р фырагъэхьажьыщт.
Мыхэм анэмыкIэу АР-м ихэбзэгъэуцугъэхэу къолъхьэ тын-Iыхыным пэшIуе­кIогъэным, къэралыгъо гражданскэ къу­лыкъум, IофшIэнымкIэ бэдзэршIыпIэм, чIыпIэ зыгъэIорышIэжьыпIэ къулыкъухэм псэушъхьэ гъорыкIохэм зэрадэзекIощтхэмкIэ фитыныгъэу яIэщтхэм, бюджет зэфыщытыкIэхэм, къызэрыкIо шIыкIэм тетэу гъэпсыгъэ хэбзэIахьхэм, зекIоным ыкIи тыкъэзыуцухьэрэ дунаим икъэухъу­мэн алъэныкъокIэ къэралыгъо хэбзэ къулыкъухэм фитыныгъэу яIэщтхэм, сабый ибэхэм е лъыплъэн зимыIэу къэнагъэхэм псэупIэхэр ягъэгъотыгъэнхэм, нэмыкIхэм афэгъэхьыгъэхэм зэхъо­кIыныгъэхэр афэшIыгъэнхэм епхыгъэ законопроектхэм, хэбзэгъэуцугъэхэм атегущыIагъэх, апэрэ ыкIи ятIонэрэ еджэгъухэмкIэ аштагъэх.
Джащ фэдэу депутатхэр тегущыIэхи, Бэшкэкъо Заур АР-м и УплъэкIокIо-лъы­тэкIо палатэ ипащэ игуадзэу, Къушъхьэ Роситэ ащ иаудиторэу джыри зы пIалъэ­кIэ агъэнэфэжьыгъэх.
ХЪУТ Нэфсэт.