IофшIэкIэ амалхэмкIэ, гупшысэхэмкIэ зэдэгощагъэх
АР-м и Лъэпкъ тхылъеджапIэ загъэпсыгъэр илъэси 130-рэ хъугъэ. Ащ фэгъэхьыгъэ мэфэкI зэхахьэм ыкIи форумым ахэлэжьагъ Урысые Федерацием культурэмкIэ иминистрэ игуадзэу Жанна Алексеевар.
Тарихъ гъогушхо къэзыкIугъэ Лъэпкъ тхылъеджапIэм иIоф дэгъоу зэрилэжьырэр къэгущыIэгъэ пстэуми кIагъэтхъыгъ. ТхылъеджапIэм иIофышIабэмэ щытхъу ыкIи рэзэныгъэ тхылъхэр, щытхъуцIэу «АР-м культурэмкIэ изаслуженнэ IофышI» зыфиIорэр афагъэшъошагъ.
МэфэкI зэхахьэм къыкIэлъыкIуагъ Iэнэ хъураеу «Современная библиотека: реалии и перспективы» зыфиIорэр; ащ иIофшIэн фэгъэзэгъагъэх АР-м культурэмкIэ иминистрэ игуадзэу Кушъу Светланэрэ Лъэпкъ тхылъеджапIэм ипащэу Къыкъ Бэлэрэ.
Iофтхьабзэм докладхэр ыкIи къиIотыкIынхэр бэу къыщашIыгъэх, ахэр зэкIэ джырэ тхылъеджэпIэ шъхьаIэм ипшъэрылъ зэрэзэшIуихырэм фэгъэхьыгъагъэх. Iэнэ хъураем къеблэгъагъэхэм ямызакъоу, пэIудзыгъэ шIыкIэм тетэу нэмыкI тхылъеджапIэхэм яIофышIэхэри ащ хэлэжьагъэх. ТхылъеджапIэр тарихъ шIэжьым иухъумакIоу зэрэщытыр, узыфэе тарихъ къэбар лъапсэр шъолъырым ит псэупIэхэмкIэ, нэмыкI мэхьанэ зиIэ щыIэныгъэ лъэныкъохэмкIэ зэрэчIэбгъотэщтыр, мыр шIэныгъэ унэу зэралъытэрэр къэгущыIагъэхэм къыкIагъэтхъыгъ.
Уахътэм диштэу ащ Iоф зэришIэрэм ищыс Лъэпкъ тхылъеджапIэм иэлектроннэ тхылъеджапIэ, оцифровкэмкIэ отделым ишIуагъэкIэ документхэр ухъумагъэ зэрэхъухэрэр.
Лъэпкъ тхылъеджапIэм лIэужыкIэм игъэсэныгъэ-пIуныгъэкIэ Iофышхо зэришIэрэр, тхылъыр яIэубытыпIэу ахэр зэрагъасэрэр къыщыраIотыкIыгъ.
Шъолъырым ит тхылъеджапIэхэм зэпхыныгъэ зэдыряIэу, зэкIырыплъыжьхэу Iоф зэрашIэрэр зэхахьэм щыкIагъэтхъыгъ; Iэнэ хъураем зэфэхьысыжьхэр щашIыгъэх.
Чъэпыогъум и 28-м научнэ-методическэ семинарэу «Актуальные вопросы деятельности современной библиотеки» ыIоу зэхащэгъагъ, ащ Урысые лъэпкъ тхылъеджапIэм гъэсэныгъэ тедзэмкIэ и Институт ипащэу Ирина Николаевна Вибе хэлэжьагъ. УФ-м исубъектхэм арыт тхылъеджапIэхэм IофшIэкIэ амалыкIэхэр, шIэныгъэхэр ягъэгъотыгъэнхэм семинарыр тегъэпсыхьэгъагъ.
Мэфэ IофшIэнымкIэ Iофтхьабзэм зэфэхьысыжьхэр щашIыгъэх, неущырэ мэфакIэм щылэжьэнхэм иамалыкIэхэр, шIэныгъакIэхэр зэрагъэгъотыгъэх.
Мамырыкъо Нуриет.