Уцым хоккей щешIэгъэнымкIэ Шъачэ иныбжьыкIэ командэ илъэсипшI имыкъум шъолъыр зэнэкъокъоу щыIагъэмэ зэкIэмэ ащатекIуагъ.

Командэм гъогоу къыкIугъэр къызэрыкIуагъэп — зыми ымышIэрэ езыгъэжьэгъакIэхэм къащыублагъэу краим итурнир­хэм пэрытныгъэ ащызыIыгъхэм анэсэу ЗыгъэпсэфыпIэмкIэ спорт лъэпкъ гъэшIэ­гъонэу щытым апэ зыщыфежьагъэхэр ПсышIопэ районыр ары. 2016-рэ илъэсым кIэлэцIыкIу-ныбжьыкIэ спорт еджапIэу
N 6-р ары уцым хоккей щешIэгъэнымкIэ икъутамэ къызщызэIуахыгъэр. Уцым хок­кей щешIэгъэнымкIэ краим ифедерацие ивице-президентэу а лъэхъаным щытыгъэ Дмитрий Лопуховыр Iофтхьа­бзэм кIэщакIо фэхъугъагъ, а спорт лъэп­къым неущырэ мафэ зэриIэр иIофшIэгъухэм ашIошъ ыгъэхъугъагъ.
— Мы спорт лъэпкъымкIэ апэрэ секцие къалэм къызщызэIутэхым, тэ IэубытыпIэу тшIыгъагъэр IофыгъуитIу, — къе­Iуатэ КIэлэцIыкIу-ныбжьыкIэ спорт е­джа­пIэу N 6-м ипэщагъэу, Пшызэ изаслуженнэ кIэлэегъаджэу Тыу Ращыдэ. — АпэрэмкIэ, мы спорт лъэп­къыр олимпийскэу щыт, тиныбжьы­кIэмэ агу рихьыщт. ЯтIонэрэмкIэ, тэ та­пэкIэ ти­къалэ ащ зи ыуж щитыгъэп, апэрэу гъогур пхырыптхъуныр къины, ау джащ фэдэуи ар гъэшIэгъоны. Шъачэ мы спорт лъэпкъыр агу щырихьыным пае апэрэ лъэбэкъур тшIыгъахэ, Iо хэлъэп, нэмыкI лъэбэкъухэри къыкIэ­лъыкIощтых.
Зи щыIагъэп: команди, зызщыдгъэ­сэщт шъофи, шъуашэхэри. Тигухэлъ ты­фэ­кIоным тызэрэдэмышъхьахыгъэм, ти­­спортивнэ шэнхэм яшIуагъэкIэ пэрыо­хъухэм татекIошъугъ. Анахь шъхьаIэр — Iофым хэшIыкI фызиIэ специалистыр къэдгъотыгъагъ, ащ иIофшIэн ары егъэ­жьапIэ тфэхъугъэр.
… Iэгуаор хъурай: иныр — футболым пай, цIыкIур уцым хоккей зэрэщешIэхэ-
рэр ары, угукIэ уфэе шъыпкъэмэ, тыди уащы­текIон плъэкIыщт, арэущтэу елъытэ КIэ­лэцIыкIу-ныбжьыкIэ спорт еджапIэу
N 6-м итренерэу, спортымкIэ мастерэу, поселкэу Шэхапэ щыщэу Кобл Мэдинэ. Ащ спортым гъэхъэгъэшхохэр щишIы­гъэх, илъэс пчъагъэхэм футбол командэу «Шэ­хэкIэим» итренер ыкIи капитанэу щешIэ. Аужырэ илъэсипшIым ар лъэшэу кIэлэцIыкIумэ адэлажьэ. ЗиIофшIэн шIу зылъэ­гъурэ кIэлэпIум ШэхэкIэй щыщ кIэлэкIэ нэбгырипшI пчъагъэ къуаджэм дэт секци­ем къырищэлIэшъугъ, хоккеир къыхаригъэхыгъ. Спортми, еджэнми ныбжьыкIэ­хэр ащыпэрытынхэм тренерыр чанэу дэлажьэ.
Мы зыгъэпсэфыкIэмкIэ спорт лъэп­къы­кIэ хъугъэм шъолъырым чIыпIэ щи­убытыгъэ къодыеп, зы илъэсым Шъачэ кIэлэцIыкIу командэ Коблым щигъэпсы­шъугъ. Пшызэ икъэлэ зэфэшъхьафхэм бэ­шIагъэу мы спорт лъэпкъым ащыпы­лъых, ау ахэм яспортсменхэми тикомандэ янэкъокъун елъэкIы. 2017-рэ илъэсым Шъачэ икомандэ уцым хоккей щешIэгъэ­нымкIэ апэрэу Краснодар краим изэнэ­къокъухэу станицэу Полтавскэм щыкIуа­гъэхэм захэлажьэм, анахь дэгъухэм ащыщ хъугъэ. Командэм хэтхэм ягуетыныгъэрэ яшэн пытэрэ а гъэхъагъэр къакIэкIуагъ. Абинскэ ыкIи Каневскоим къарыкIы­гъэ­хэм тикIалэхэр затекIохэм ыуж Крымскэ щыщхэм финалым адихьагъэх, ау ахэр къатекIожьыгъэх, тыжьын медальхэр къыдахыгъэх.
— Апэрэ уахътэм пшъэрылъышхохэр зыми къытфигъэуцущтыгъэхэп, нахь Iофыгъо шъхьаIэу щытыгъэр спорт лъэпкъыкIэмкIэ ткIуачIэ къыхьырэр тыушэтыныр, адрэхэм такIырыплъыныр арыгъэ, ау текIоныгъэм тыфэбэнэныр пстэуми апэ идгъэшъыгъ, — къеIуатэ Кобл Мэдинэ. — Адрэ къалэхэм ыкIи краим ирайонхэм ащ бэшIагъэу щыпылъыгъэх, IэпэIэсэныгъэ гъэнэфагъи зэрагъэуIунэу игъо ифагъэх, джащ пае тэ зыгорэ зэнэ­къокъум къыщыдгъэлъэгъоным зи егу­пшысэгъагъэп. Ау тикIалэмэ лIыгъэшхо къахэфагъ, лъэшэу текIоныгъэм фэбэнагъэх, джары апэрэ зэнэкъокъу дэдэм тыжьын медальхэр къызкIыщытхьыгъэхэр.

Коблымрэ командэмрэ зэфэхьысыжьхэр ашIыгъэх, зыщыхэукъогъэхэ чIыпIэхэр зэхафыгъэх, зыщегугъун фэе лъэны­къохэр агъэнэфагъэх ыкIи илъэс нахь темышIагъэу дышъэ медалыр краим изэнэкъокъухэм къащыдахыгъ. Апэрэ дышъэу яхъишъэ хатхагъ, ар агумэ нахь апэблагъэ хъугъэ, ащыгъупшэрэп. Ащ къыщыублагъэу ахэр турнирыбэмэ, Урысыем щыкIохэрэри зэрахэтэу, ахэлэжьагъэх ыкIи ащатекIуагъэх. Азов, Екатеринбург ыкIи нэмыкI чIыпIэхэм ащыIагъэх, анахь дэгъухэм ясатырэ хэуцуа­гъэх. 2022-рэ илъэсым Шъачэ ихоккеистхэр Пшызэ икIэлэеджакIохэм ягъэмэфэ Спар­такиадэу Крымскэ щыкIуагъэм апэрэ чIыпIэр къыщыдахыгъ, джащ тетэу шъо­лъыр ныбжьыкIэ хоккеимкIэ медалэу щыIэр зэкIэ къаугъоигъ.
Гъэхъагъэхэр зэрашIыхэрэм ишIуа­гъэ­кIэ кIэлэцIыкIоу мы секцием хахьэ зы­шIои­гъомэ япчъагъи гъэ къэс хэхъо. Не­пэрэ мафэр пштэмэ, Коблым дэжь аныбжьхэмкIэ зэфэшъхьафхэу купищ щыI, зэкIэмкIи кIэлэцIыкIу ыкIи ныбжьыкIэ нэбгырэ тIокIищ мэхъух. Ахэм Iэпы­Iэгъу къафэхъух джырэкIэ ДЮСШ-у
N 6-м ипащэу Вячеслав Хазарджян, гъэсэныгъэмкIэ гъэIорышIапIэу Псы­шIопэ районым щыIэм ипащэу Анастасия Гнусаревар, Къэлэ ЗэIукIэм идепутатхэу Виктор Филоновыр, Александр Бурляевыр, Павел Афанасьевыр, Хъущт Заур, ШэхэкIэй дэт гурыт еджапIэу N 90-р ыкIи «ШэхэкIэй» зыфиIорэ ТОС-м и Совет.
— Уцым хоккей щешIэрэ спортсменхэм япчъагъэкIэ непэ Краснодар краир апэ ит, — къыхигъэщыгъ шъолъыр Фе­дерацием ипрезидентэу Евгений Акименкэм. — Нэбгырэ минрэ ныкъорэ фэдиз мэхъух, Крымскэ, Кореновскэ, Абинскэ, Анапэ, Новороссийскэ ыкIи Шъачэ ащыщых.
— Мы спорт лъэпкъыр тишъолъыр къызкIекIугъэр краим ичIыопс зэрэшIагъор ары, илъэс реным уцым хоккей ущешIэн плъэкIыщт, — къыкIигъэт­хъыгъ Краснодар краим ибзылъфыгъэ хэшы­пыкIыгъэ командэмэ ятренер шъхьаIэу Андрей Капарулиным. — Анахьэу ар ныбжьыкIэмэ ящыкIагъ: чъэным, псынкIэу загъэзэным, щэIагъэ яIэным кIэлэцIыкIухэр фегъасэх. Бэрэ тэлъэгъу апкъы­шъолкIэ хъыбэй дэдэхэр секцием къыхахьэхэу, ау уахътэ зытешIэрэм, ахэр ялэгъухэм акIэхьажьых, спортсмен шъып­къэ мэхъух. Илъэсыбэхэм мы хоккеир бзылъфыгъэхэр ары нахьыбэу къыхэзыхыщтыгъэр, ау аужырэ уахътэм шъэо­жъыехэр нахь къэчаныгъэх, Пшызэ зэнэкъокъубэу щырагъэкIокIырэмэ ар къаушыхьаты.
— Уцым хоккей щешIэнхэр зышIогъэ­шIэгъонхэм япчъагъэ тикъалэ щыхэхъо, — къеIуатэ Кобл Мэдинэ. — Ащ елъы­тыгъэу зэнэкъокъухэри нахь гъэшIэгъон хъугъэх, IэпэIэсэныгъэу къащагъэлъа­гъорэми зыкъыIэтыгъ. Мы мафэхэм Крымскэ зичэзыу «дышъэр» къитхы­жьыгъ, илъэс 13 — 16 зыныбжьхэм азы­фагу щызэхащэгъэгъэ зэнэкъокъум хэлэжьэгъэ командэмэ тащытекIуагъ. Тызэрэпэ­рытыр ренэу къэтыушыхьаты­жьын фай. Ащ тыфэхьазыр!
Ныбэ Анзор.