ДзюдомкIэ респуб­ликэ ныбжьыкIэ зэнэ­къокъухэр къуаджэу Пэнэжьыкъуае щы­кIуагъэх. Уры­сыем спортымкIэ изаслуженнэ масте­рэу, Олимпиадэ джэгунхэм джэрз медаль къащызыхьыгъэ Емыж Арамбый ишIухьафтын зэрылъ турнирым шъолъырым имуниципалитет зэ­фэшъхьафхэм ялIы­кIохэр хэлэжьагъэх.

Iофтхьабзэм ипэублэ Емыж Арамбый зэнэкъокъум къекIолIэгъэ ныбжьыкIэхэм закъыфигъазэзэ, спортым гъэхъэгъэшIухэр щашIынхэу къафэлъэIуагъ.
БэнакIохэм ухьазырыныгъэ дэгъу къагъэлъэгъуагъ, нэбгырэ пэпчъ текIоныгъэм фэбэнагъ. Олимпийскэ резервым испорт еджапIэу Кобл Якъубэ ыцIэ зыхьырэм зыщызыгъасэхэрэм хагъэунэфыкIырэ чIыпIэ 19 къа­хьыгъ. Роман Бобровым, ОелI Эльдар, Къэлэшъэо Астемир, Ахыджэго Айдар, Ацумыжъ Айдэмыр текIоныгъэр къыдахыгъ.