Теннис цIыкIумкIэ Адыгэ Республикэм изэIухыгъэ турнир Мыекъуапэ щыкIуагъ. Ащ нэбгырэ 350-м шIокIэу хэлэжьагъ. Тишъолъыр теннисист 40-м ехъумэ къагъэлъэгъуагъ.

Зэнэкъокъур гъэшIэгъонэу, узIэпищэу кIуагъэ, тикIалэхэм къэгъэ­лъэгъон дэгъухэр яIэх. Адыгеим илIыкIохэм анахь къахэщыгъэр республикэ спорт еджапIэу N 3-м зыщызыгъэсэрэ Дмитрий Работяга, мыщ джэрз медаль къыфагъэшъошагъ. Зыныбжь илъэс 18-м емыхъугъэхэм ярейтингкIэ ар ятIонэрэу щытыгъ, ау Геническэ щыщ Станислав Лашкевич къытекIуагъ ыкIи ящэнэрэ хъугъэ. ТекIоныгъэр къыдэзыхыгъэр Алчевскэ щыщ Владислав Дикович, ар финалым 3:1-у Амар Канаматовым (Ставрополь) щытекIуагъ.
ПшъашъэхэмкIэ (нахьыжъхэм якуп) анахь лъэшыгъ Налщык испортсменкэу Къодз Дэнизэ, Вероника Сидоровам (Ставрополь) ятIонэрэ чIыпIэр фагъэшъошагъ, Апшеронскэ илIыкIоу Аэлита Забунян ящэнэрэ хъугъэ.
Яхэнэрэ турнирыр тыгъэгъазэм ыгузэгухэм зэхащэнэу рахъу­хьагъ.