ГандболымкIэ Урысыем ипервенствэ хэлэжьэрэ «АГУ-Адыиф-2-м» Уфа щыриIэгъэ ешIэгъуитIури къыхьыгъ. Турнир таблицэм аужырэ я 12-рэ чIыпIэр щызыIыгъ командэу «СШ N 13 «Алисэм» ар дешIагъ.

Тикомандэ апэрэ зэIукIэгъум 38:18-у текIоныгъэр къыщыдихыгъ, ятIонэрэми нахь щылъэшыгъ, 42:25-у ешIэгъур аухыгъ. Елизавета Зарецкаям гъогогъу 18-рэ къэлапчъэм Iэгуар дидзагъ. «Адыифым» идубль ешIэгъу 14 иIагъ ыкIи джырэ уахътэм я 10-рэ чIыпIэм щыт. Зичэзыу зэIукIэгъухэр чъэпыогъум и 31-м ыкIи шэкIогъум и 1-м Ижевскэ щыриIэщтых.