Республикэм и ЛIышъ­хьэу КъумпIыл Мурат пшъэ­дэкIы­жьэу ыхьырэмкIэ гъунэпкъэ гъэнэфагъэ зиIэ обществэу «Плитрон» зыфиIорэм зы­щэ­Iэм предприятием къы­ди­­­гъэкIырэр нахьыбэ шIыгъэ­нымкIэ гухэлъэу яIэхэм афэ­гъэхьыгъэу пащэхэм гу­щы­Iэгъу афэхъугъ. А Iоф­­тхьабзэм хэлэжьагъэх Мыекъуапэ имэрэу Ген­надий Митрофановыр, къалэм иархитектор шъхьаIэу Ацумыжъ Мадина, подряднэ организациехэм яIэшъхьэтетхэр.

ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Плитрон» урамыбгъухэм атыралъхьэрэ плиткэхэм, бордюрхэм ыкIи дэпкъхэм яшIынкIэ агъэфедэрэ блокхэм якъыдэгъэкIын фэгъэзэгъэ анахь пэрыт предприятиехэм АдыгеимкIэ ащыщ. Республикэм изэтегъэпсыхьан чанэу ар хэлажьэ. ЦIыфхэр зычIэсыщтхэ унэхэу республикэм икъэ­лэ шъхьаIэ ичIыпIакIэхэм ащагъэпсы­хэрэмкIэ плиткэхэри бордюрхэри агъэфедэх. Джащ фэдэу Мыекъуапэ, Яблоновскэм ягъогухэм ягъэцэкIэжьынкIэ, Адыгэкъалэ игупчэрэ ипаркрэ, мэщытым къыпэIулъ чIыпIэм язэтегъэпсыхьанкIэ ыкIи нэмыкIхэмкIэ агъэфедэх. Ащ нэмыкIэу социальнэ проект зэфэшъхьафхэми ахэлэжьэнхэр ямурад: Свято-Успенскэ кафедральнэ чылысым къыпэIулъ общественнэ чIыпIэхэм язэтегъэпсыхьан. Компанием ипащэу Халт Хамоян къызэриIотагъэмкIэ, предприятиер илъэси 3-кIэ узэкIэIэбэжьымэ агъэпсыгъагъ, ащкIэ Сбербанкым фэгъэ­кIотэныгъэ зыхэлъ чIыфэу къыIахыгъагъэр агъэфедагъ. Илъэсым къыкIоцI «Плитроным» бордюр метрэ миллион 1,8-м нэс, плиткэ квадрат метрэ мин 216-рэ фэдиз къыдегъэкIы. НепэкIэ рахъухьагъэм ипроцент 30 фэдиз къыдигъэкIыгъэр. Ау, предприятие ныбжьыкIэм ичаныгъэ хигъахъозэ, ипродукцие изытетрэ изэмылIэужыгъуагъэрэ яшIуа­гъэкIэ хэхъоныгъэшIухэр ешIых. ЧIыпIэ къэкIуапIэхэри егъэфедэх. Джырэ технологиехэм амал къаты шъо зэфэшъхьаф ыкIи теплъэ зэмылIэужыгъохэр зиIэхэр къы­дигъэкIынымкIэ: шъхьэшъо зэщизхэр,
мыжъо гъэушкъоигъэм итеплъэ зиIэхэр ыкIи нэмыкIхэр ахэм ахэплъэгъощтых.
ЯмышIыкIэ теплъэу яIэм къыхэкIэу чIыпIэхэм язэтегъэпсыхьанкIэ нахь къякIущт шIыкIэ-амалхэр агъэфедэнхэ алъэкIы. Республикэм ищыкIагъэм фэдиз продукцие дэгъу IэкIэгъэхьэгъэнымкIэ предприятием ипшъэрылъхэр непэ егъэ­цакIэх. Ары пакIошъ, гъунэгъу шъолъыр­ми ар аIэкIигъэхьан амал иIэ хъугъэ.
— Тэ дгъэфедэхэрэр тыуплъэкIугъэ материалхэр ыкIи джырэ ухътэм диштэрэ Iэмэ-псымэхэр ары. ЯинагъэкIэ зэтекIых, шъоу яIэри зэфэшъхьаф — ахэм яшIуа­гъэкIэ къытэуалIэхэрэм япроектхэр зэшIуахынхэмкIэ нахь къякIущтхэр къы­хахынхэ алъэкIы. Джырэ уахътэм ди­штэрэ шIоигъоныгъэхэр цIыфхэм зэ­ряIэхэм такъыпкъырэкIы ыкIи ахэм ялъытыгъэу къыдэдгъэкIыхэрэр игъо афэтэлъэгъух», — къыхигъэщыгъ Халт Хамоян.
Адыгеим и ЛIышъхьэ предприятиер къыплъыхьагъ, продукциеу къыдагъэкIырэм нэIуасэ зыфишIыгъ, республикэм а лъэныкъомкIэ ифэныкъоныгъэхэр игъэ­къугъэнхэм елъытыгъэу компанием илIыкIохэм яшIошъ зэригъэшIагъ.
«Типредприятиехэм хэхъоныгъэ зэрашIыщтым тынаIэ тетэгъэты, продукцие дэгъур аIэкIэгъэхьэгъэнымкIэ чIыпIэ предприятиехэм тапэкIи тишIуагъэ ядгъэкIыщт. МыщкIэ щысэу къэпхьын плъэкIыщт «Плитроныр». Анахь технологие пэрытхэр ащ щагъэфедэх, нэ­мыкI шъолъырхэм къа­рамыщыжьми, ящыкIагъэр зэкIэ Адыгеим джы къыщащэфын алъэкIыщт. Республикэм экономикэмкIэ хэхъоныгъэ ышIыным, нахьышIоу ар зэтегъэпсыхьэгъэным иамалышIухэр ащ къетых», — къыхигъэ­щыгъ КъумпIыл Мурат.
Адыгеим и ЛIышъхьэ Мыекъуапэ имэрие ыкIи архитектурэмкIэ гъэIоры­шIапIэм пшъэрылъ афишIыгъ программэу «Къэлэ щыIэкIэ Iэрыфэгъур» зыфиIо­рэмрэ нэмыкI проектхэу общественнэ чIыпIэхэм язэтегъэпсыхьан епхыгъэ­хэмрэ нахь шIогъэ ин хэлъэу пхырыщыгъэнхэмкIэ чIыпIэ предприятиехэмрэ подрядчикхэмрэ адыряIэ зэдэлэжьэныгъэм нахь зырагъэушъомбгъунэу.

АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.