Уахътэм диштэу къутырыр зэтырагъэпсыхьащт
Адыгеим и ЛIышъхьэу КъумпIыл Мурат пшъэрылъ зэрафишIыгъэм тетэу къоджэ псэупIэхэр джырэ шапхъэхэм адиштэу республикэм щызэтырагъэпсыхьэх.
Къутырэу Северо-Восточные Сады нахь лъэшэу непэ анаIэ зытырагъэтыхэрэм ащыщ. Къэралыгъо программэу «Къуаджэхэм зэдиштэу хэхъоныгъэ ягъэшIыгъэныр» зыфиIорэм къыдыхэлъытагъэу 2024-рэ илъэсым псауныгъэр зыщагъэпытэрэ физкультурэ комплексым ишIын гъэсэныгъэм игупчэу N 9-м щаухыгъ. КIэлэцIыкIу IыгъыпIэм игъэпсынкIэ, культурэм и Унэ гъэцэкIэжьын IофшIэнхэр ешIылIэгъэнхэмкIэ проектхэр пхыращыгъэх. Лъэпкъ проектэу «ГъэшIэ кIыхьэр ыкIи чаныр» зыфиIорэм диштэу мы илъэсым джырэ шапхъэхэм адиштэрэ амбулаторием, кIэлэцIыкIу джэгупIэм яшIын ыуж итых, Маяковскэм ыцIэ зыхьырэм иурам къыщегъэжьагъэу, урамэу Индустриальнэм нэсэу Энгельс иурам къыпэIулъ лъэс гъогур зэтырагъэпсыхьэ. Къихьащт илъэсым еджапIэм гъэцэкIэжьын IофшIэнхэр рашIылIэщтых. Сомэ миллион 41,6-м ехъу ахэм апэIухьащт.
Мыекъопэ районым ипащэу Михаил Марьиным къызэриIуагъэмкIэ, ащкIэ ищыкIэгъэ проект-сметэ документациер агъэхьазырыгъах, къэралыгъо экспертизэ ар ашIыгъ. ЕджапIэм иджэхашъохэр, иунашъхьэ зэрэщытэу зэблахъущт, унэ лъапсэр агъэпытэщт, псырыкIуапIэхэр, псыIущыпIэхэр икъоу зэтырагъэпсыхьащтых, унэм игъэфэбэнкIэ, канализациемкIэ, электрооборудованиемкIэ, машIом зыкъымыштэнымкIэ системакIэхэр джырэ шапхъэхэм адиштэу агъэпсыщтых. Сомэ миллиони 8,5-рэ зыосэ мебелыкIэр, доскахэр, шхапIэм ищыкIэгъэ Iэмэ-псымэхэр къащэфыщтых. Гупчэм игъэцэкIэжьын пае Iахь тедзэу сомэ миллион 27-м ехъу муниципальнэ бюджетым къыхагъэкIыщт. Гупчэу N 9-м иеджакIохэр къапэблэгъэ еджапIэхэм ащырагъэджэщтых, автобускIэ ахэм аращэлIэщтых.