Адыгэ лъэпкъ IэшIагъэхэмкIэ, дышъэ идагъэмкIэ ыкIи пIоблэ шIынымрэкIэ егъэджэнхэр республикэм щаублагъэх. АР-м культурэмкIэ и Министерствэ, Адыгеим лъэпкъ культурэмкIэ и Гупчэ, АР-м искусствэхэмкIэ иколледжэу Тхьабысымэ Умарэ ыцIэ зыхьырэр ыкIи АР-м иIэпэIасэхэм я Ассоциацие Iофтхьабзэм икIэщакIох. Пшъэрылъ шъхьаIэр — лъэпкъым икультурнэ кIэн къэухъумэгъэныр, непэрэ щыIэныгъэм зыщегъэужьыгъэныр.

— Лъэпкъ IэшIагъэхэм якъэухъумэнрэ ахэр лIэужыкIэхэм анэгъэсыжьыгъэнымрэкIэ IофышIэхэр зыгъэхьазырыщт хэушъхьафыкIыгъэ егъэджэн программэмкIэ проектыр мэлажьэ. Мы лъэныкъомкIэ шIэныгъэ ин зыIэкIэлъ IэпэIасэхэм ахэр рагъэкIокIых, — къыщаIуагъ АР-м лъэпкъ культурэмкIэ и Гупчэ.

Дышъэ идагъэмкIэ проектым къыдыхэ­лъытэгъэ апэрэ егъэджэныр къызэIуа­хыгъ АР-м культурэмкIэ изаслуженнэ IофышIэу, Адыгеим искусствэхэмкIэ иколледжэу Тхьабысымэ Умар ыцIэ зыхьырэм иIофышIэу Ольга Плетневамрэ дышъэ идагъэмкIэ IэпэIасэу, Урысыем культурэмкIэ изаслуженнэ IофышIэу, илъэпкъ IэпэIасэу Сет Сафиетрэ. АщкIэ егъэджэныр окIофэ адыгэ дышъэ идагъэм итарихъ, хэдыкIыным ишапхъэхэм, лъэпкъ шъуашэм иIахьхэм ыкIи IофшIэнымкIэ ищыкIэгъэ Iэмэ-псымэхэм еджа­кIохэр нэIуасэ афэхъугъэх. Ащ дакIоу, пIоблэ шIынымкIэ нэмыкI купым Iоф адишIагъ ТIэшъу Мэзагъо.

Егъэджэнхэм ахэлажьэхэрэр культурнэ-зэщтегъэу лэжьапIэу республикэм итхэм яIофышIэхэр ары. ГущыIэм пае апэрэ зэIукIэгъум къеблэгъагъэхэр культурэм иIофышIэхэу Тэхъутэмыкъое, Теуцожь, Шэуджэн ыкIи Кощхьэблэ районхэм къарыкIыгъэхэр ары.
Анцокъо Ирин.