ФутболымкIэ Адыгэ Республикэм ипервенствэ Мыекъуапэ икомандэ текIоныгъэр къыщыдихыгъ. Зыныбжь илъэс 16-м нэмысыгъэхэр ары зэнэкъокъум хэлэжьагъэхэр.

Апэрэ чIыпIэм анахьэу фэбэнагъэхэр Мыекъуапэрэ Тэхъутэмыкъое районымрэ якомандэхэр ары. Турнир таблицэм респуб­ликэм икъэлэ шъхьаIэ илIыкIохэр тэхъутэмыкъуаехэм бэрэ ауж итыгъэх. Ау ятIонэрэ едзыгъом мыхэм зэдыряIэгъэ зэIукIэгъум Мыекъуапэ икомандэ текIоны­гъэр къыщыдихыгъ ыкIи очко пчъагъэу яIэр зэфэдиз хъугъэ. Ащ ыуж Тэхъутэмыкъое районым джыри зэ къытекIуагъэх. Адыгеим икъэ­лэ шъхьаIэ ифутболистхэм апэрэ чIыпIэр аубытыгъ. Командэм итренерых Юрий Манченкэмрэ Шумэхо Рэмэзанрэ. Урысыем ипервенствэ иятIонэрэ лигэ щешIэхэрэ «Зэкъошныгъэмрэ» «Легионымрэ» язэIукIэгъу иапэрэ тайм заухым илъэхъан текIоныгъэр къыдэзыхыгъэхэм афэгушIуа­гъэх. Кощхьэблэ рай­оныр ящэнэрэ хъугъэ.