ВолейболымкIэ Урысыем ичемпионат иапшъэрэ лигэ икупэу «Б-м» хэт хъулъфыгъэ командэхэм яешIэгъухэр рагъэжьагъэх. Адыгэ Республикэр зэнэкъокъум къыщызыгъэлъагъорэр «Динамо-МГТУ».

Лигэм команди 9 хэхьэ. Апэрэ турэу Воронеж щыкIуагъэм тикомандэ «Грознэм» — 3:0-у, «Апсны» — 3:1-у къашIуихьыгъ. Ау Ставропольскэ краир къэзыгъэлъэгъорэ «Колосыр» 3:0-у къытекIуагъ.
ЯтIонэрэ турыр Ростов-на-Дону щыкIуагъ. Адыгеим иволейболистхэм «Ростов-Волей» ешIэгъур къышIуахьыгъ, ау «Кристал-Черкизово» (Воронеж) къатекIуагъ. Джырэ уахътэм «Динамо-МГТУ-р» ятфэнэрэ чIыпIэм щыт. Зичэзыу ящэнэрэ турыр Ижевскэ щызэха­щэщт. Ащ «Динамо-МГТУ» (Мыекъуапэ), «ИжГТУ-Динамо» (Ижевск), «Волжанин-2» (Кострома) ыкIи «Энергострой» (Москва) щызэIукIэщтых.