Адыгэ Республикэм культурэмкIэ иза­служеннэ IофышIэу, УФ-м исурэ­тышIхэм я Союз хэтэу Ирина
Бредихинам исурэтхэм якъэгъэлъэ­гъон Мыекъуапэ къыщызэIуахыгъ. Ащ ыныбжь илъэс 60 зэрэхъурэм Iофтхьабзэр фэгъэхьыгъ.

ИскусствоведениемкIэ кандидатэу, Мыекъопэ къэралыгъо технологическэ университетым идоцентэу КIэдэкIое Нэфсэт Iоф­тхьабзэр къызэIуихыгъ. Зыфэдэ къэмыхъугъэ, купкI ин зиIэ IофшIагъэхэр зиIэ Ирина Бредихинам ищыIэныгъэ гъогу къекIолIагъэхэм къафиIотагъ.
Адыгэ Республикэм культурэмкIэ иминистрэу Аулъэ Юрэ И. Бредихинам имэфэкIкIэ фэгушIуагъ ыкIи щытхъу фигъэшъошагъ.
— Непэрэ мэфэкI дахэм сигуапэу сыкъеблэгъагъ. Ирина Бредихинар зыфэдэ къэмыхъугъэ IэпэIасэу Адыгеим иIэмэ ащыщ. Республикэм ихудожественнэ еджа­пIэ пэщэныгъэ дызэрехьэ. Ар зэтегъэпсыхьэгъэныр мы бзылъфыгъэм ыпшъэ ифагъ. Творчествэм ылъэныкъокIэ зыбзгъазэмэ, искусствэ лъагэм хэшIыкI фызиIэ сурэтышIхэм ар ащыщ, — къыIуагъ Аулъэ Юрэ.
— Ирина Бредихинам иIэшIагъэхэм цIыфхэм осэшIу зэрафа­шIыщтым сицыхьэ телъ. IэпэIасэм итворчествэ зэрэиныр, зэрэзэтефыгъэр исурэтхэм къагъэлъагъо, — къыIуагъ Адыгэ Республикэм исурэтышIхэм я Союз итхьаматэу Елена Абакумовам.
— Дунаир зыIыгъ искусствэр Ирина Бредихинам иIэшIагъэхэм къапкъырэкIы. СурэтышIым игъэ­хъагъэхэм ахигъэхъонэу сыфэлъаIо, имэфэкIкIэ сыфэгушIо, — къыIуагъ Сурэт къэгъэлъэгъуапIэм ипащэу, зэлъашIэрэ архитекторэу Бырсыр Абдулахь
Республикэм культурэмкIэ и Министерствэ иотдел ипащэу, Адыгеим культурэмкIэ изаслу-­
женнэ IофышIэу Шэуджэн Бэлэ, шъолъырым щызэлъашIэрэ сурэтышI IэпэIасэхэр, Иринэ иныб­джэгъухэр Iофтхьабзэм къы­щыгущыIагъэх.
СурэтышIым фэгъэхьыгъэу
Ирина Бредихинар 1965-рэ ­илъэсым Ставрополь къыщыхъугъ. Пшызэ къэралыгъо универси-­
тетым художественнэ графикэмкIэ ифакультет къыухыгъ. 1986-рэ илъэсым къыщегъэжьагъэу Мыекъопэ художественнэ еджапIэм щэлажьэ. 1997-м щыублагъэу УФ-м исурэтышIхэм я Союз хэт, 2009-рэ илъэсым художественнэ еджапIэм ипащэу агъэнэфагъ. Урысыем, Адыгеим культурэмкIэ яминистерствэхэм ящытхъу ыкIи ярэзэныгъэ тхылъхэр къыфагъэ­шъошагъэх.
IэпэIасэм икъэгъэлъэгъон
Ирина Бредихинам шъо зэфэшъхьафхэр ыгъэфедэхэзэ, сурэт пэпчъ екIолIэкIэ хэхыгъэ къы­фегъоты. Ащ иIэпэIэсэныгъэ живописым, графикэм къащигъэ­лъагъозэ, цIыфхэм алъыIэсын елъэкIы. НахьыбэмкIэ акварелыр иIэшIагъэхэм ащыгъэфедагъ. СурэтышIыр гуфит-шъхьафитэу мэгу­пшысэ. Къэгъагъ Iэрамыр исурэтыбэмэ ахэт. Гупшысэ куу хэ-
­лъэу цIыфым ыгу ихъыкIырэр къэ­гъагъымкIэ къыгъэлъагъо шIоигъоу къыпщэхъу. Тыкъэзыуцухьэрэ дунаир сурэтхэмкIэ хьалэмэтэу къе­гъэлъагъох. Дунаим идэхагъэ зыфегъазэ, сурэтым къыщиIотэщтыр къыхехы. Бзылъфыгъэм ичэтыуи иIофшIагъэхэм ахэолъагъо, псэу­шъхьэм шIулъэгъоу фыриIэр ахэм къахэщы. Гупшысэу иIэр сурэтмэ арипхызэ, ахэм ашъохэр хегъэу­нэфыкIых.
— Сэ апэрэу Ростов-на-Дону сыкъикIи, Адыгеим сыкъэкIуагъ, сызекIу. Къушъхьэхэм анахь дахэ слъэгъущтэп сшIошIыгъ. Тыкъэзыу­цухьэрэ дунаим нэмыкIэу, Адыгеим ицIыфхэри хьалэмэтых. Со­циальнэ хъытыум къэгъэлъэгъоныр зэрыщыIэщтыр ислъэгъуагъэти сыкъэкIуагъ. СурэтышIым иIэшIагъэхэм сыгу къыдащаягъ. Ахэм псынкIэу уаблэкIышъурэп, укъэуцушъ, сурэтым куоу ухахьэ, уегъэ­гупшысэ, авторым къыриIотыкIынэу зыфэягъэм улъэхъу, къэогъоты. Илъэс хъугъэу акварелымкIэ сэлажьэ, мы IэшIагъэхэм шIэныгъа­кIэхэр ахэзгъотагъ, — къыIуагъ Евгения Шаляпинам.
Ирина Бредихинам исурэтхэм якъэгъэлъэгъон шэкIогъум и 9-м нэс щыкIощт. Искусствэр зышIогъэшIэгъонхэр ащ еплъынхэу зэхэщакIохэм рагъэблагъэх.

НэкIубгъор зыгъэхьазырыгъэр Лъэпшъыкъо Фатим.