Зэзэгъыныгъэу зэдашIыгъэм къыдыхэлъытагъэу Ингуш къэралыгъо ныбжьыкIэ театрэм идэкIыгъо къэгъэлъэгъонхэр Мыекъуапэ щыкIуагъэх.

УФ-м культурэмкIэ и Ми­нистерствэ «Гастроль инхэр» зыфиIорэ программэу зэхи­гъэуцуагъэм культурэм хэхъоныгъэ ышIынымкIэ цIыфхэр, лъэпкъхэр нахь зэрэшIэнхэмкIэ мэхьанэшхо иI.
Ингуш къэралыгъо ныбжьыкIэ театрэм икъэгъэлъэгъонхэр ригъэжьэнхэм ыпэкIэ Адыгэ Республикэм культурэмкIэ и Министерствэ иотдел ипащэу Шэуджэн Бэлэ артистхэм шIуфэс къарихыгъ. Министерствэм ыцIэкIэ рэзэныгъэ тхылъэу «За помощь в организации и проведении на высоком профес­сиональном уровне обменных гастролей» зыфиIорэр театрэм ипащэу Муса Хадзиевым.
— Театрэм лъэпкъхэр зэфещэх, цIыфхэр нахьышIоу зэрэшIэнхэмкIэ щыIэныгъэм диштэрэ Iофтхьабзэхэр егъэцакIэх. Адыгеим апэрэп тыкъызэрэкIо­рэр. Мыекъуапэ иныбжьыкIэхэр пшысэм идунай хэтщэщтых, — къыIуагъ Ингуш къэралыгъо ныбжьыкIэ театрэм ирежиссер шъхьаIэу Лейла Хадзиевам.
— Зэзэгъыныгъэм диштэу мэлылъфэгъум мыщ фэдэ дэ­кIыгъо къэгъэлъэгъонхэр АР-м инысхъэпэ театрэу «Дышъэ къошыным» Ингушетием щызэхищэгъагъэх. Артистхэр нэIуасэ зэрэзэфэхъухэрэм дакIоу творческэ зэпхыныгъэри тэгъэпытэ. ТапэкIэ проектыкIэхэр зэдэдгъэ­цэкIэнхэм тыдэлэжьэщт, — къы­Iуагъ театрэу «Дышъэ къо­шы­ным» ипащэу Джолэ Ларисэ.
Ингушетие къэралыгъо теат­рэм Р.Киплинг ипроизведениеу «Маугли» ыкIи Г. Х.Андерсен ипшысэу «Гадкий утенок» ате­хыгъэ спектаклэхэр къыгъэ­лъэгъуагъэх. Ащ игастрольхэр Адыгеим щыпсэурэ ныбжьыкIэхэм шIукIэ агу къинэжьыщт.