Чъэпыогъум и 27 – 29-м Мыекъуапэ я 34-рэ шъолъыр Дунэе Рождественскэ еджэнхэр «Просвещение и нравственность: формирование личности и вызовы времени» ыIоу щэкIох. Iофтхьабзэм икIэщакIу Урыс Православнэ Чылысым и Мыекъопэ ыкIи Адыгэ епархиер.
Iофтхьабзэм изэхэщэнкIэ IэпыIэгъу фэхъух АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет, АР-м гъэсэныгъэмрэ шIэныгъэмрэкIэ и Министерствэ, хэгъэгу кIоцI IофхэмкIэ Министерствэр, УФ-м ошIэ-дэмышIэ IофхэмкIэ и Министерствэ АР-мкIэ игъэIорышIэпIэ ШъхьаIэ, быслъымэнхэм я ДиндэлэжьапIэ ыкIи Краснодар краим и Мыекъопэ къэзэкъ отдел.
Я 34-рэ шъолъыр Дунэе Рождественскэ еджэнхэм пшъэрылъэу яIэр:
— джырэ обществэм ыпашъхьэ ит пшъэрылъхэр, чылысымрэ обществэмрэ акъыл хэлъэу ахэр зэшIуахынхэр;
— чылысым имэхьанэ, иамалхэр гъэ­пытэгъэнхэр, чIыпIэ къэралыгъо къулыкъухэм яхэбзэ ыкIи общественнэ организациехэр зэфэдэу къапыщылъ Iофыгъохэм ахэгъэлэжьэгъэнхэр.
Гухэлъхэр — щыIэныгъэ лъапсэхэр зэхэфыгъэнхэр, ахэр зэфэдэу тыди социальнэу, культурнэу ыкIи дин шапхъэхэм къапкъырыкIхэу, зы лIэужым нэмыкI лIэужым нигъэсыжьхэу зэрэщытхэр агурыгъэIогъэныр;
тиреспубликэ щызэдэпсэурэ лъэпкъхэм азыфагу зэгурыIоныгъэ, лъытэныгъэ илъыныр;
гушъхьэлэжьыгъэ гъэсэныгъэмкIэ ыкIи пIуныгъэмкIэ, къэралыгъо, дин гъэсэныгъэмкIэ анахь IофшIэкIэ амал дэгъухэр зыIэкIэлъхэр къыхэгъэщыгъэнхэр ыкIи ахэр зэлъягъэшIэгъэнхэр;
шъолъырым щыпсэухэрэм азыфагу зэдэгущыIэгъу къабзэр шапхъэу щыгъэуцугъэныр.
Дунэе Рождественскэ еджэнхэр Мые­къуапэ илэжьэпIэ учреждениехэм: сэнэхьатымкIэ IэпэIэсэныгъэм зыщыхагъэ­хъорэ институтым, Адыгэ къэралыгъо университетым и Научнэ тхылъеджапIэ, АР-м и Лъэпкъ музей, Мыекъопэ къэралыгъо технологическэ университетым, Гупчэ къэлэ тхылъеджапIэм, гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм, Свято-Воскресенскэ храмэу Мыекъуапэ дэтым ащыкIуагъэх.
Чъэпыогъум и 27 – 29-м Iофтхьабзэр еджэнхэм игъэкIотыгъэу ащызэхафыгъ. Темэ шъхьаIэм къыпкъырыкIырэ гупшысэ зэфэшъхьафхэм секцие 11-м ащатегущыIагъэх. Диныр ыкIи къэралыгъо егъэ­джэн-шIэныгъэр зэрэзэдэIорышIэхэрэр, шIуагъэ зэфэдэу къызэрахьырэр гущыIэ пшIы пчъагъэу къашIыгъэхэм къахэщыгъ.
АР-м и Лъэпкъ музей изэхэхьэпIэ унэ Дунэе урыс лъэпкъ соборым ишъолъыр къутамэ я 4-рэ секцием Iоф щишIагъ, «Просвещение и преображение через укрепление и сохранение традиционных российских духовно-нравственных ценностей» зыфиIорэр щызэхафыгъ. Секцием иIэшъхьэтетыгъ АР-м лъэпкъ IофхэмкIэ, IэкIыб къэралхэм ащыпсэурэ зэлъэп­къэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэ игуадзэу Константин Щербаковыр, динлэжьэу Георгий псэлъэ кIэкI къыщишIыгъ, зэкIэмкIи нэбгырэ 11-у ащ къыщыгущыIагъэмэ пIуныгъэ дэгъум, гъэсэныгъэ куум цIыфыр зэраузэнкIырэр, анахьэу еджакIохэм ыкIи ныбжьыкIэхэм, сабыир къызэрэхъоу гущыIэр зэхихэу, даIоу гъэсэгъэн зэрэфаер кIагъэтхъыгъ. Щэч хэлъэп мыщ фэдэ акъыл куу зы­хэлъ конференцием ишIуагъэ къызэрэкIощтым.
Мамырыкъо Нуриет.