Адыгэ Республикэм и ЛIы­шъхьэу КъумпIыл Мурат зэIукIэгъу дыриIагъ заом, Iоф­шIэным, УIэшыгъэ КIуачIэхэм, хэбзэу­хъумэкIо къулыкъухэм яветеранхэу (пенсионерхэу) АР-м исхэм я Общественнэ организацие итхьаматэу, илъэситф пIалъэкIэ а IэнатIэр джыри ыгъэцэкIэнэу хадзы­жьыгъэ Къоджэ Аслъан.

КъумпIыл Мурат зэIукIэгъум илъэ­хъан къыхигъэщыгъ ветеран организацием республикэм ищыIэныгъэ иIахьэу хи­шIыхьэрэр зэрэин дэдэр ыкIи мэхьанэшхо зэриIэр. АР-м иветеранхэм я Совет IэпыIэгъу зищыкIагъэхэм ынаIэ зэратыригъэтырэр ыкIи зэрадеIэрэр КъумпIыл Мурат къыIуагъ. Организацием хэтхэр ныбжьыкIэхэр я Хэгъэгу фэшъыпкъэхэу, цIыфыгъэ шэпхъэ дахэхэм арыгъуазэхэу пIугъэнхэм чанэу хэлажьэх, нахьыжъхэм социальнэ IэпыIэгъу ятыгъэнымкIэ Iоф­шIэнышхо ахэм агъэцакIэ.
Къоджэ Аслъан къызэриIуагъэмкIэ, шъолъыр организацием непэ нэбгырэ мин 82,5-м ехъу хэт. Ахэм ахэхьэх Хэгъэгу зэошхом иветеранхэр, къадзы­хьэгъэгъэ къалэхэу Ленинградрэ Севастопольрэ адэсыгъэхэр, заом икIэ­лэцIыкIухэр, зыныбжь имыкъугъэхэу концлагерьхэм адэсыгъэхэр, зэо кIыбым щылэжьагъэхэр, IофшIэным, зэо зэIу- у­пIэнхэм яветеранхэр, ахэм ахэхьэх хэушъхьафыкIыгъэ дзэ операцием хэлэжьагъэхэр, нэмыкI куп гъэнэфагъэхэм ахэтхэр. Хэгъэгу зэошхом хэлэжьагъэу республикэм щыпсэурэр нэбгырэ 16 зэрэхъурэр.
ЗэкIэ ветеранхэм ящыкIэгъэ IэпыIэгъур араты, федеральнэ ыкIи шъолъыр хэбзэ къулыкъухэм апкъ къикIырэ Iоф­тхьабзэхэр ащкIэ къызфагъэфедэх. АР-м и Правительствэрэ муниципалитетхэмрэ зэгъусэхэу цIыфхэр я Хэгъэгу фэшъыпкъэхэу пIугъэнхэмкIэ Iофышхо зэшIуахы, конференциехэр, слетхэр, Iэнэ хъураехэр зэхащэх. Анахьэу мы илъэсым анаIэ зытырагъэтыгъэр Хэгъэгу зэошхом ТекIоныгъэр къызщыдахыгъэм ия 80-рэ илъэс епхыгъэ Iофтхьабзэхэр ары.
АР-м иветеранхэм я Совет итхьаматэ къыIуагъ цыхьэ къызэрэфишIыгъэм пае Адыгеим и ЛIышъхьэ зэрэфэразэр ыкIи ветеранхэм ящыIакIэ нахьышIу шIыгъэным, тарихъ шIэжьыр къэухъумэгъэным алъэныкъокIэ IофшIэныр чанэу ыгъэцэкIэным зэрэфэхьазырыр къыхигъэ­щыгъ.
АР-м иветеранхэм я Советэу Къоджэ Аслъан зипащэм тапэкIи иIофшIэн зэри­гъэлъэшыщтым ицыхьэ зэрэтелъыр КъумпIыл Мурат къыIуагъ. Хэбзэ къулы­къухэми ветеран организацием IэпыIэгъоу ратырэм къыкIырагъэчыщтэп. Рес­публикэм и Правительствэ иIоф­шIэнкIэ апшъэрэ мэхьанэ зэритыхэрэм ащыщ ветеранхэм яфэныкъоныгъэхэм япхыгъэ Iофыгъохэм язэшIохын. Хэу­шъхьафыкIыгъэ дзэ операцием иветеранхэм, ныбжьыкIэхэм, лIэужхэм язэпхыныгъэ гъэпытэгъэным алъэныкъокIэ бэ янэплъэгъу итэу зэрищыкIагъэм лъыкIахьэу непэ зэшIуахырэр.
АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.