Мыекъопэ къэралыгъо технологическэ университетым мы мафэхэм пчъэ зэIухыгъэхэм я Мафэ щызэхащагъ. Апшъэрэ классхэм ащеджэрэ кIэлэеджакIохэр, ны-тыхэр ыкIи гурыт сэнэхьат зэзыгъэгъотырэ ныбжьыкIэхэр ащ рагъэблэгъагъэх.

Сэнэхьат гъэгъозэнымкIэ ыкIи апшъэ­рэ еджапIэм джыри чIэмыхьагъэ­хэм ягъэхьазырынкIэ гупчэм ипащэу Олег Франко апшъэрэ еджапIэм амалэу къы­тыхэрэр къэзэрэугъоигъэхэм къафиIотагъ. Мыщ щеджэхэрэм шIэныгъэ зэрэзэрагъэгъотырэм дакIоу щыIэны­гъэм илъэныкъо зэфэшъхьафхэм хэшIыкI афы­ряIэу, тапэкIэ ахэр къызфагъэфедэжьынхэм Iоф зэрэдашIэрэр, федеральнэ проектхэм чанэу зэрахэлажьэ­хэрэр къыIуагъ.
— Апшъэрэ еджапIэр федеральнэ проект зэфэшъхьафхэм чанэу зэрахэлажьэрэм ишIуагъэкIэ джырэкIэ къэралыгъом нахь ищыкIэгъэ сэнэхьатхэм ныбжьыкIэхэр афагъасэх. Непэ шъуищыIэныгъэ зэшъуп­хыщт лъэныкъор къы­хэшъухын амал ­шъуиI, — къы­­Iуагъ ащ.
Мыекъопэ къэралыгъо технологическэ университетым иректорэу Къуижъ Саидэ апшъэрэ еджапIэм гъэхъагъэу иIэ­хэр, хэхъоныгъэу ышIыхэрэр нэужым къафиIотагъ. КIэлэеджакIо­хэм, ны-тыхэм зэпхыныгъэ адыряIэу Iоф зэрадашIэрэм мэхьанэу иIэр къыхигъэщыгъ.
— Тистудентхэм гъэ­хъагъэхэр ашIынхэм пае ищыкIагъэр зэкIэ агъоты. ШIэныгъэмкIэ, творчествэмкIэ, спортымкIэ Iоф­тхьэбзэ зэфэшъхьафхэм ахэлажьэх, — къыIуагъ ректорым.
ДжырэкIэ анахь ящыкIэгъэ сэнэхьатхэу апшъэрэ еджапIэм зыфигъэхьазыр­хэрэм ныбжьыкIэхэр нэIуасэ нэужым афашIыгъэх. Проектэу щыIэныгъэм щыпхыращыхэрэр ахэм ашIогъэшIэгъоныгъэх.
Апшъэрэ еджапIэм и Дзэ егъэджэн гупчэ ипащэу, полковникэу Нурлан Самадьяновым нэужым гущыIэр ратыгъ. Мыщ щеджэхэрэм фэгъэкIотэнэу яIэхэр, дзэ сэнэхьатэу арагъэгъотыхэрэр, ущеджэным шапхъэу пылъхэр ащ къафиIотагъэх.

Университетым узэрэчIэхьащтым шапхъэу пылъхэр, стипендиеу къаратырэр, ныбжьыкIэ чанхэм фэгъэкIотэнэу яIэхэр къыхигъэщыгъэх приемнэ комиссием пшъэдэкIыжь зыхьырэ исекретарэу Бэрзэдж Розэ. 2026-рэ илъэсым гъэсэныгъэ программэхэм зэхъокIыныгъэу яIэщтхэм ащыщхэр, бюджет чIыпIэхэр, тхылъхэр зэрепхьылIэщтхэр ыкIи нэ­мыкI лъэныкъохэр ащ къафиIотагъ.
КэIухым кIэлэеджакIохэр ыкIи ны-тыхэр интерактивнэ къэгъэлъэгъонэу «Мыекъопэ къэралыгъо технологическэ университетым ия XII-рэ шIэныгъэ фестиваль» зыфиIорэм хэлэжьагъэх. Студентхэм ыкIи кIэлэегъаджэхэм яшIэныгъэ проектхэм нэIуасэ афэхъугъэх.
ДЕЛЭКЪО Анет.