Республикэ зэнэкъокъоу «ЕджэпIэ шхэпIэ анахь дэгъу» зыфиIорэр мы мафэхэм Мыекъуапэ щыкIуагъ.

Къэзэрэугъоигъэхэм АР-м гъэсэны­гъэмрэ шIэныгъэмрэкIэ иминистрэ ыцIэкIэ шIуфэс къарихыгъ ащ иапэрэ гуадзэу Пэрэныкъо Сусаннэ.
— Очнэ шIыкIэм тетэу зэнэ­къокъур апэрэу зэхэтэщэ. Ыпэрэ илъэсхэм пэIудзыгъэ шIыкIэм тетэу ар редгъэкIокIыщтыгъ. ПщэрыхьанымкIэ анахь сэнаущыгъэ зыхэлъхэр ыкIи анахь шхэпIэ дэгъухэр къыхэхыгъэнхэр ары типшъэрылъ шъхьаIэр. Сабыйхэм ашхырэм мэхьанэшхо иI, ар IэшIун ыкIи шапхъэхэм адиштэн фае. Анахь дэгъоу зыкъэзыгъэлъагъохэрэм яIэпэIэсэныгъэ нэмыкIхэм алъэгъущт. Мы зэнэкъокъум нахь зиушъомбгъуным ыкIи хэлажьэрэр нахьыбэ хъуным тыщэгугъы, — къы­Iуагъ ащ.

МэфитIурэ зэнэкъокъур кIуагъэ. Апэрэ мафэм республикэм икъалэхэм ыкIи ирайонхэм къарыкIыгъэхэм Iанэхэр къашыгъэх ыкIи ащ тетхэр зыфэдэхэр къаIотагъ. ЕджэпIэ шхыныгъохэр дахэу гъэкIэрэкIагъэхэу, джырэ технологиехэмкIэ шIыгъэнхэу щытыгъ. Iанэр зэрэзэIухыгъэм ыкIи ащ тетхэм яIэшIугъэ уасэ фашIыгъ.
Гурыт еджапIэхэм япщэрыхьакIохэм ясэнэхьаткIэ сэнаущыгъэу ахэлъыр ятIонэрэ мафэм лицееу N 34-м ишхапIэ къыщагъэлъэгъуагъ. Лым е пцэжъы­ем ахэшIыкIыгъэм гарнир зэфэшъхьафхэр ягъусэу къашIыгъэх. ШIокI имыIэу еджэпIэ шхыныгъохэм ащыщ аупщэрыхьы­гъэр.
ОсэшIхэм апэрэу ахагъэхьагъэх ныхэр, «Апэрэхэм я Движение» илIыкIохэр, кIэлэегъаджэхэр. ЛъэныкъуищкIэ зэтеутыгъэу анахь дэгъухэр къыхахы­гъэх. Къэлэ шхэпIэ анахь дэгъоу агъэнэфагъэр къэлэ гъэпсыкIэ зиIэ поселкэу Инэм дэт гурыт еджапIэу N 2-р ары. Ханскэм дэт гурыт еджапIэу N 23-р къоджэ шхэпIэ анахь дэгъу хъугъэ. Анахь пщэрыхьэкIо Iазэу агъэнэфагъэр Барцо Зарин. Инэм дэт гурыт еджапIэу N 2-м ащ Iоф щешIэ.

ДЕЛЭКЪО Анет.