Хэбзэнчъэу тутыныр IуагъэкIыщтыгъ
ЩынэгъончъэнымкIэ Федеральнэ къулыкъум АР-мкIэ и ГъэIорышIапIэрэ УФ-м хэгъэгу кIоцI IофхэмкIэ и Министерствэ экономикэ щынэгъончъэнымкIэ ыкIи къолъхьэ тын-Iыхыным пэшIуекIогъэнымкIэ и ГъэIорышIапIэу АР-м щыIэмрэ яIофышIэхэм къэралыгъо автомобиль инспекторхэр ягъусэхэу Краснодар краим щыщ нэбгыритIу къаубытыгъ.
Илъэс 28-рэ ыкIи 33-рэ зыныбжь хъулъфыгъитIум Урысыем ихэбзэгъэуцугъэ аукъозэ, маркэ зытемыгъэпкIэгъэ тутынхэр бэ хъоу зыщыщыр амыгъэунэфыгъэхэм къащащэфыгъэх. Ахэр республикэм имуниципальнэ образование зэфэшъхьафхэм ащаIуагъэкIыщтыгъэх. Автомобилэу зэрэзэращэхэрэм ыкIи ягъэтIылъыпIэхэм зэпстэумкIи тутын къэмлан мин 87-м ехъу, ар сомэ миллион 12 ауас, къарахыгъ ыкIи къачIахыгъ.
Урысыем хэгъэгу кIоцI IофхэмкIэ и Министерствэ следствиехэмкIэ и ГъэIорышIапIэу АР-м щыIэм Уголовнэ кодексым ия 171.1-рэ статья ия 6-рэ Iахь диштэу уголовнэ Iоф къызэIуихыгъ. Илъэси 6-м нэсэу хьапс ащ къыделъытэ.
Мы уахътэм зэхэфынхэр макIох, хэбзэнчъэу шIыгъэ продукциер къызщашIыгъэр зэрагъашIэ.