Мыекъуапэ дэт тучан инхэм ащыщ горэм хъункIэн бзэджэшIагъэ зэрэщызэрахьагъэмкIэ бэмышIэу полицием макъэ къырагъэIугъ.

Джащ лъыпытэу следственнэ-оперативнэ купыр тучаным агъэкIуагъ. Ащ хэтхэм пэшIорыгъэшъэу зэрагъэунэфыгъэмкIэ, амышIэрэ кIалэ горэ щапIэм къычIахьи, шъэжъыем ехьыщыр пкъыгъор ыIыгъэу кассэм тес бзылъфыгъэм екIолIагъ ыкIи ар ыгъэщынэзэ мафэм ащагъэм кIэкIыгъэ ахъщэр къытырихэу фежьагъ.

А лъэхъаным тучаным чIэтыгъэ щэфакIо горэмрэ тучантесымрэ зэгъусэхэу хъункIакIом пэуцужьыгъэх. ЧIыпIэм бырсыр къызыщэхъум, бзэджашIэм шъэ­жъыемкIэ уIагъэхэр нэбгыритIуми къатырищагъ, нэужым сомэ мин 20 кассэм къыдихи, зигъэбылъыжьыгъ.

Адыгэ Республикэм хэгъэгу кIоцI IофхэмкIэ и Министерствэрэ Мыекъуапэ иполициерэ яуголовнэ лъыхъон къулы­къухэр зэгъусэхэу зэшIуахыгъэ Iофыгъохэм яшIуагъэкIэ мы бзэджэ­шIагъэр зезыхьагъэу зэгуцафэхэрэр къыхагъэщыгъ ыкIи къаубытыгъ.

Ар илъэс 23-рэ зыныбжь кIалэу Ставрополь краим щыщэу а шъолъырым иполицие иIофышIэхэр нэмыкI мыхъо-­мышIагъэм епхыгъэу зылъыхъущтыгъэхэр арэу къычIэкIыгъ.

Урысые Федерацием и Уголовнэ Кодекс ия 162-рэ статья ия 2-рэ Iахь къазэрэдилъытэу хъункIэн бзэджэшIа­гъэм епхыгъэу уголовнэ Iоф ащ къыфызэIуахыгъ.