Адыгэ къэралыгъо университетымрэ Адыгэ Республикэм хэгъэгу ­кIоцI IофхэмкIэ и Ми­нистерствэрэ зэзэгъыныгъэу ыпэкIэ зэдашIыгъагъэм къызэрэдилъы­тэу, апшъэрэ еджапIэм чIэс студентхэр хагъэлажьэхэзэ, пэшIоры­гъэшъ Iофтхьабзэхэр ахэм зэшIуахых.
НахьыбэрэмкIэ ахэр зыфытегъэпсыхьагъэхэр экстремиз­мэм инэшанэхэр зиIэ зе­кIокIэ-шIыкIэхэм ныбжьыкIэхэр ахэмыщэгъэнхэр ыкIи наркотикхэм, шъон пытэхэм, тутыным апыщагъэ мыхъунхэр ары.
БэмышIэу ащ фэдэ зэIукIэ полицием иIофышIэхэм АКъУ-м щызэхащагъ ыкIи ащ къыра­гъэблэгъагъэх факультет зэфэшъхьафхэм яапэрэ ыкIи ятIонэрэ курсхэм ащеджэхэрэр.
НыбжьыкIэхэм аIукIагъэх Адыгэ Республикэм и Къэралыгъо автоинспекцие игъэIорышIапIэ пропагандэмкIэ иотдел ипащэу, полицием иполковникэу Бзэджэжъыкъо Мурат, зыныбжь илъэс 18 имыкъугъэхэм Iоф адэзышIэрэ къутамэм илIыкIоу, полицием имайорэу Денис Соф-Оглы ыкIи экстремизмэм пэшIуекIогъэнымкIэ Iофтхьа­бзэхэр зэшIозыхырэ къулыкъум иIофышIэхэр.
— УлъэсрыкIоми, автомо­билым ируль укIэрысми, дэх имыIэу гъогурыкIоным ишап­хъэхэр бгъэцэкIэнхэ фае. Джащ фэдэу студентхэм тэ анаIэ ты­рядгъэдзагъ бэмэ агу рихьырэ спортивнэ мотоциклэхэм, мопедхэм ыкIи скутерхэм ягъэзекIон пылъ Iофтхьабзэхэми, — къыхигъэщыгъ Бзэджэ­жъы­къо Мурат.
Зыныбжь илъэс 18 имыкъугъэхэм хэукъоныгъэхэр амы­шIынхэм пае джырэ лъэхъан IофшIэнэу ахэм адашIэрэм, наркотикхэр ыкIи ахэм ахэшIыкIыгъэ порошокхэр хэбзэнчъэу къызэрэрагъэкIокIыхэрэм ныбжьыкIэхэр хэщагъэ мыхъунхэм епхыгъэ Iофтхьабзэу полицием иIофышIэхэм зэшIуахыхэрэм игъэкIотыгъэу Денис Соф-Оглы къатегущыIагъ.
Ащ къызэриIуагъэмкIэ, илъэ­сыкIэ еджэгъур зыщырагъэжьагъэм къыщыублагъэу ныбжьыкIэхэм аIокIэх ыкIи наркотикхэм ягъэфедэн псауныгъэр лъэшэу зэрэзэщигъакъорэмрэ гъогу пхэндж ахэм псынкIэу узэрэтыращэрэмрэ щысэхэр къыдахьыжьхэзэ кIалэхэм къафа­Iуатэ.
ЗэIукIэм хэлэжьагъэхэм къызэрэхагъэщыгъэу, мы лъэ­хъаным гумэкIыгъошхоу къэуцурэр экстремизмэмрэ терроризмэмрэ епхыгъэ гупшысэхэр цIыф куп гъэнэфагъэхэм ныбжыкIэхэм ахалъхьэ ашIоигъоу ауж зиритхэр ары.
Арышъ, студентхэм ренэу сакъыныгъэ къызхагъэфэн, Интернетым къэбарэу е сурэтэу къырахыхэрэр къыздикIыгъэхэр ыкIи зыгъэфедэхэрэр дэгъу дэдэу къагурыIон фае.
Социальнэ хъытыухэм янэ­кIубгъохэмрэ мессенджер зэфэшъхьафхэмрэ ащызэхащэгъэ купхэм уахэмыхьэзэ, ахэм якIэ­щакIохэр зыфэдэхэр, упчIэу зытегущыIэхэрэр ыкIи гухэлъэу яIэхэр зэбгъэшIэнхэ фае.
ЗэIукIэм ыкIэм студентхэм яупчIэхэм джэуапхэр къаратыжьыгъ. Непэрэ шапхъэхэм зэхъокIыныгъэу ыпэкIэ афэ­хъущтхэм, щынэгъончъэным иIофыгъохэм атегущыIагъэх.
Гъомлэшк Байзэт.