Адыгэ Республикэм и Концерт зэхахьэ и Къэралыгъо симфоническэ оркестрэ лите­ра­турнэ-мэкъэмэ композициеу Евгений Шварц идневникхэм атехыгъэу «Майкоп. Комета Галлея» зыфиIорэр къытыгъ. Дирижер шъхьа­Iэр АР-м инароднэ артистэу Аркадий Хуснияров. Волонтер купэу «Шварц и Ун» зыфиIорэм игукъэкIкIэ пчыхьэзэхахьэр зэхащагъ.

Советскэ тхакIоу, драма­тургэу, сценаристэу Евгений Шварц цIэрыIо зышIыгъэр ипшы­сэхэр ары. Ащ итхыгъэхэу «Зо­лушка», «Сказка о потерянном времени», «Марья искусница» зыфиIохэрэр, нэмыкIхэри уры­сые культурэм идышъэ фонд хэ­хьагъэх.

Евгений Шварц Казань къы­щыхъугъ нахь мышIэми, икIэ­лэгъур Мыекъуапэ щыкIуагъ, еджапIэр къыщиухыгъ. ЫгукIэ къыхихыгъэ къалэу ар зэрэ­щытыгъэр идневникхэм къащи­Iотагъ. ШIулъэгъурэ гуфэбэныгъэрэ хэлъэу, къалэм къыщы­хъугъэ хъугъэ-шIагъэхэр, урам­хэр, цIыфхэр ащ ыгу къэкIыжьых. ИкIэлэгъурэ иныбжьыкIэгъурэ япхыгъэ гукъэкIыжьхэр гъэшIэгъонэу къытхыхьагъ. ЯунагъокIэ илъэсиблэ зыдэсыгъэхэ къалэм бэ фитхыгъэр, зычIэсыгъэхэ унэр музей ашIыжьыгъ.

Мэкъамэхэр зэзыгъэфагъэр Урысыем изаслуженнэ артистэу, оркестрэм ипащэу Андрей Семеновыр ары. Ахэр Шварц ытхыгъэхэм ахэлъ гупшысэхэм къапкъырэкIых.

— ТхакIом итворческэ кIэн зэрэдунаеу щызэлъашIэ. Шварц къызщыхъугъэ къалэу Мые­къуа­пэ зэрикIасэр къызхэщырэ тхы­гъэхэм ямэкъамэхэр ти­сим­фо­ническэ оркестрэ концертым къыщыригъэIуагъ. ЦIыфэу къэ­кIуа­гъэхэм агу зэрэрихьыгъэр къахэщыгъ. Тиоркестрэ ихудожественнэ пащэу Андрей Семе­новыр Шварц ытхыгъэхэм дахэу къяджагъ, мэкъамэхэри зэригъэфагъ. Адыгеим изы культурнэ хъугъэ-шIэгъэ дахэ Iоф­тхьабзэр хъугъэу сэлъытэ, — къыIуагъ Аркадий Хуснияровым.

Евгений Шварц идневникхэм къахэхыгъэ пычыгъохэм Урысыем изаслуженнэ артистэу, оркестрэм ипащэу Андрей Семеновыр гъэшIэгъонэу къя­джагъ. Евгений Шварц идневник техыгъэ мэкъамэхэр тарихъ чыжьэм ухэзыщэрэ композицие хьалэмэтэу композиторым ыгъэ­псыгъ. Къэралыгъо симфоническэ оркестрэм къыгъэхьазырыгъэ концертым искусствэр зы­шIогъэшIэгъонхэм гухахъо хагъуатэу еплъыгъэх.
Лъэпшъыкъо Фатим.