ХэушъхьафыкIыгъэ подразделениехэм я Мафэ тефэу хэушъхьафыкIыгъэ дзэ операцием хэлэжьэгъэ капитанэу Александр Махневыр Мыекъопэ къэралыгъо технологическэ университетым и Дзэ егъэджэн гупчэ щеджэрэ ныбжьыкIэхэм тыгъуасэ аIукIагъ.

Iофтхьабзэм кIэщакIо фэхъугъэх ­шъолъыр программэу «Адыгеим и ЛIы­хъужъхэр» пхырызыщырэ комитетымрэ «Адыгеим иныбжьыкIэхэр» зыфиIорэ Гупчэмрэ.
ДзэкъулыкъушIэным мэхьанэу иIэр къагурыгъэIогъэным, ныбжьыкIэхэм патриотическэ пIуныгъэ адызехьэгъэным зэIукIэгъур фэIорышIагъ. «Адыгеим иныбжьыкIэхэр» зыфиIорэ Гупчэм иIофышIэу ХьакIэмыз Заринэ къэзэрэугъоигъэхэр Александр Махневым нэIуасэ фишIыгъэх.
— Зэо зэфэшъхьафхэм яветеранэу, хэушъхьафыкIыгъэ подразделениеу «Альфа» зыфиIорэм иофицерэу, шъолъыр программэу «Адыгеим и ЛIы­хъужъхэр» зыфиIорэм хэлэжьэрэ Александр Махневыр непэ шъуадэжь къеблэгъагъ. Дзэ ыкIи щыIэныгъэ гъогу гъэшIэгъонэу къыкIугъэр непэ къышъуфиIотэщт, шъори шъуиупчIэхэр фэжъугъэзэнхэ шъулъэкIыщт, — къыIуагъ ХьакIэмыз Заринэ.
ХэушъхьафыкIыгъэ дзэ операцием иветеранэу Александр Махневыр ап­шъэрэ еджапIэм истудентхэм апашъхьэ къыщыгущыIагъ. Къулыкъур зэрихьыгъэм икъэбар къафиIотагъ, Хэгъэгум иухъумакIохэмкIэ физическэ ыкIи гукIочIэ ухьазырыныгъэм анахь мэхьанэ зэриIэр къыхигъэщыгъ. Джащ фэдэу упчIэу къыратыгъэхэм джэуапхэр къариты­жьыхэзэ, хэтрэ цIыфи иунагъо, и Хэгъэгу къыухъумэнхэу зэрэфаер хи­гъэунэфыкIыгъ.
— СыныбжьыкIэ къыстефэрэ къулыкъур зысэхьым зэзэгъыныгъэм сыкIатхи, я 131-рэ Мыекъопэ бригадэм илъэсрэ сыхэтыгъ. Нэужым щынэгъончъэнымкIэ федеральнэ къулыкъум зэзэгъыныгъэ дэсшIи Iоф щысшIагъ, хэушъхьа­фыкIыгъэ подразделениеу «Альфа» зыфиIорэм сыкIожьи, илъэс 18-рэ сыхэтыгъэу пенсием сытIысыжьыгъ. 2022-рэ илъэсым хэушъхьафыкIыгъэ дзэ операциер къызежьэм, бэрэ семыгупшысэу дзэ IэпэIэсэныгъэу сIэкIэлъымкIэ си­шIуагъэ къыщыкIонэу слъыти, ащ сыхэлэжьэнэу зэзэгъыныгъэм сыкIэтхагъ. Пулеметчикэу щезгъажьи, ротэм икоман­дирэу сыухыгъ. УIэгъэ хьылъэ къыс­тещагъэ хъуи сыкъэкIожьыгъ, джы ре­абилитацием сыщыI. СисэнэхьаткIи, сишIэныгъэхэмкIи республикэм сишIуагъэ езгъэкIынэу слъыти, программэу «Адыгеим и ЛIыхъужъхэр» зыфиIорэм сыхэлэжьагъ, — къыIуагъ Александр Махневым.
Ветераным къызэрэхигъэщыгъэмкIэ, ныбжьыкIэхэм нахьыбэрэ мыщ фэдэ зэIукIэгъухэр афызэхэщэгъэнхэм мэхьанэшхо иI. Джыри Iэтахъохэу дзэ­къулыкъушIэ ветеранхэр къазыфакIохэ-
кIэ лъэшэу ашIогъэшIэгъонэу ахэм зэрядэIущтыгъэхэр, ахэм щысэ атыра­хызэ нэбгырэ пэпчъ ищыIэныгъэ гъогу къызэрэхихыщтыгъэр къэзэрэугъоигъэ­хэм къафиIотагъ.
НыбжьыкIэхэр якъэралыгъо рыгу­шхонхэм ыкIи Хэгъэгум иухъумакIохэм ялIыгъэ лъытэныгъэ фашIыным мыщ фэдэ Iофтхьабзэхэр афэIорышIэх.
Iэшъынэ Сусан.