КъэкIорэ 2026-рэ илъэс бюджетым, 2027 — 2028-кIэ агъэнэфагъэхэм зыщатегущыIэгъэхэ «публичнэ едэIунхэр» Адыгеим и Правительствэ зычIэт унэм тыгъуасэ щызэха­щэгъагъэх.

Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэ игуадзэхэу, бюджет, финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб зэпхы­ныгъэхэмкIэ, мэкъумэщ политикэмкIэ, мылъку ыкIи чIыгу зэфыщытыкIэхэмкIэ икомитетхэм япащэхэу Iэщэ Мухьамэдрэ Цэй Эдуардрэ, Парламентым идепу­татхэм ащыщхэр, муниципальнэ образованиехэм, къулыкъу зэфэшъхьафхэм, общественнэ организациехэм ялIыкIохэр, студентхэр, нэмыкI­хэр.
Iэщэ Мухьамэд «публичнэ едэIунхэр» къызэIуихызэ, республикэм щыпсэухэрэм къэ­кIорэ илъэсымкIэ финанс тхылъ шъхьаIэр зэрэгъэпсыгъэщтыр, ащ къыщыдэлъытэгъэщтхэр ашIэнхэм фэшI мы Iофтхьабзэр илъэс къэс джырэ фэдэ уахътэм зэрэзэхащэрэр къыIуагъ. Мыщ тетэу бюджетым ипроект нэIуасэ зэрэфашIыхэрэм имызакъоу, республикэм иинтернет нэкIубгъо шъхьаIи, финанс­хэмкIэ Министерствэм инэкIубгъуи ар къарэхьэ. ШIоигъоныгъэ зиIэ пстэур хэплъэн, яшIошIхэр къыраIоты­кIын ­алъэкIыщт.

АР-м финансхэмкIэ иминистрэ игуа­дзэу Хьэпэе Марыет проектым нэIуасэ фишIыгъэх. ПэшIорыгъэшъэу зэрагъэнэфагъэмкIэ, 2026-рэ илъэс бюджетыр хахъохэмкIэ сомэ миллиард 44,9-рэ хъущт. Ар 2025-кIэ пэшIорыгъэшъэу агъэнэфэгъагъэм проценти 9-кIэ нахьыб. Прог­нозхэмкIэ, хэбзэIахьэу 2025-рэ илъэс бюджетым сомэ миллиард 23,4-рэ, мыхэбзэIахьэу сомэ миллиардым ехъу къыхэхъощт, зымыгъэзэжьыщт мылъкоу къыхэлъхьагъэ хъущтыр сомэ миллиард 20,3-рэ.
Республикэ бюджетым ихъарджхэр мызыгъэ­гум нахьыбэщтых. Сомэ миллиард 47,3-у ахэр къалъытагъэх. Сомэ миллиарди 2-м ехъу щыкIагъэ иIэщт.

Нэужым бюджет ахъщэр зыпэIухьанэу пэшIорыгъэшъэу агъэнэфагъэхэм ми­нист­рэм игуадзэ игъэкIотыгъэу къатегущыIагъ. Мы проектым гъэсэныгъэм исистемэ ыпэ щырагъэшъыгъ. Бюджетым инахьыбэр, ар процент 23,9-рэ, ащ пэIухьащт. АхъщэкIэ къапIомэ, сомэ миллиард 11,2-рэ.
Джащ фэдэу лъэпкъ экономикэм сомэ миллиарди 10,1-рэ, псауныгъэм икъэухъу­мэн сомэ миллиарди 8,4-рэ, социаль­нэ политикэм сомэ миллиарди 6,1-рэ, куль­турэм сомэ миллиардым ехъу апэ­Iуа­гъэхьан гухэлъ яI. ГъогушIыным, спор­тым, псэупIэ-коммунальнэ хъызмэтым, нэмыкI лъэныкъохэм апэIухьанэу финанс тхылъ шъхьаIэм щагъэнэфагъэ­хэми ми­нистрэр игъэкIотыгъэу къатегущыIагъ.
Лъэпкъ проектхэм япхырыщыни лъагъэкIотэщт. ГущыIэм пае, 2026-рэ илъэ­сым ахэм къадыхэлъытагъэхэм ягъэцэ­кIэн пстэумкIи сомэ миллиарди 8,1-рэ пэIуагъэхьащт. Анахьыбэу, ар сомэ мил­лиарди 3,6-м ехъу, зыфагъэнэфа­гъэр «ЩыIэныгъэм пае инфраструктурэр» зыфиIорэр ары.

Министрэм идоклад ыуж зэхэсыгъом хэлажьэхэрэм ащыщхэм упчIэхэр къатыгъэх. Лъэпкъ проектхэм, къэралыгъо программэхэм къадыхэлъытагъэу агъэцэкIэжьыщт псэуалъэхэм, муниципальнэ образованиехэм субсидиеу афатIупщыщтым, нэмыкIхэм ахэр афэгъэхьыгъагъэх. ЗэкIэми джэуап зэхэугуфыкIыгъэ къаратыжьыгъ.
ХЪУТ Нэфсэт.