Шъачэ щылэжьэрэ полицейскэу Хьагъундэкъо Анзор Краснодар краим иучастковэ инспектор анахь дэгъоу къыхагъэщыгъ.

Урысыем хэгъэгу кIоцI IофхэмкIэ и Министерствэ «Народнэ участковэр» зыфиIорэ зэнэкъокъур мыгъэ я 15-у зэхещэ. Анахь къулыкъушIэ дэгъур цIыфхэр ары къыхэзыхырэр, интернет хъытыур къызфагъэфедэзэ зыфаехэм амакъэ афаты. ЗэхэщакIохэм къызэраIорэмкIэ, нахь «цыхьэ коэффициентыбэ» зыфагъэуцугъэ участковэр ары текIоныгъэр зыфагъэшъуашэрэр (шъолъы­рым щыпсэурэмэ япчъагъэ макъэу аты­гъэр рагъапшэ). Зэнэкъокъум ишъо­лъыр едзыгъоу чъэпыогъум и 7-м къыщыублагъэу и 15-м нэс рагъэкIокIыгъэм Шъачэ илIыкIоу хэлэжьэгъэ Хьагъундэкъо Анзор Пшызэ щыпсэурэ нэбгырэ мин 21-рэ фэдизмэ амакъэ интернет хъытыур къызфагъэфедэзэ фатыгъ. Зэнэкъо­къум джыри зы адыгэ кIалэ хэлэжьагъ — Шытхьэлэ районым щылэжьэрэ къулыкъушIэу, полицием имладшэ лейтенантэу Уджыхъу Дамир.
Краснодар краим иучастковэ анахь дэгъукIэ къыхахыгъэ Хьагъундэкъо Анзор Шъачэ изы районэу зыщылажьэрэр чIыпIэ гъэшIэгъон: сымэджэщхэм якъэлэжъый, фэтэрыбэу зэхэт ыкIи унэе унэхэр, еджапIэхэр, кIэлэцIыкIу IыгъыпIэхэр, социальнэ псэолъэ зэфэшъхьафхэр дэтых, зэкIэмкIи нэбгырэ мин 25-рэ фэдиз щэпсэу. ЗыгъэпэсфыпIэм хэгъэгу кIоцI IофхэмкIэ и ГъэIорышIапIэ ипресс-къулыкъу къызэрэщаIуагъэмкIэ, полицием иофицер мы илъэсым цIыфмэ зыкъызэрэфагъэзэгъэ тхылъ мини 2,5-мэ Iоф адишIагъ, IэпэIэсэныгъэшхо зэрэхэ­лъымрэ цIыфхэм ынаIэ зэратыригъэтырэмрэ ащкIэ къыгъэлъэгъуагъ.
— Участковэ уполномоченнэр, бысым дэгъум фэдэу, иадминистративнэ шъо­лъыр рэхьатныгъэ илъыным лъэплъэ, — къеIуа­тэ Хьагъундэкъо Анзор.
Ащ иIофшIэн уахътэ кабинетым зэрэщигъакIорэм нахьыбэу цIыфхэм ахэт, адэгущыIэ, ягумэкIыгъохэр чIыпIэмэ ащызэхефы, зыфэгъэзэгъэ участкэр ренэу къызэпекIухьэ.
Полицейскэм иIофшIэнкIэ анахь шъхьа­Iэр Хэбзэгъэуцугъэр ары, ау цIыфыгъэр ащ голъынэу щыт. ХэушъхьафыкIыгъэ екIолIакIэм IофшIэнымкIэ мэхьанэ иI — цIыфхэр дэгъоу пшIэнхэ фае, ахэм ящыкIагъэхэри ягумэкIыгъохэри къыдэплъытэхэзэ улэжьэщт. Ащ фэдэ цыхьэзэфэшI зэпхыныгъэхэр илъэс пчъагъэхэм къакIоцI участковэм егъэпытэх. Джары къулыкъушIэм къыфагъэуцугъэ пшъэрылъхэр ыгъэцэкIэнымкIэ шъхьэкIэфэныгъэу къылэжьырэм мэхьанэ зыкIиIэр.
— Тэ чанэу тызызэдэлажьэрэр апэрэ илъэсэп, тиучастковэ дэгъу дэдэу тэшIэ, — къеIуатэ фэтэрыбэу зэхэт унэу урамэу Чебриковым тет унэу N 36-м икомитет итхьаматэу Ольга Шведовам. — IэпэIэсэныгъэ, цIыфыгъэ зыхэлъ къулыкъушI, пшъэдэкIыжьэу ыхьырэр къыгурыIозэ ипшъэрылъхэр егъэца­кIэх. Чэщи мафи ащ уфытеон олъэкIы, цIыфхэм зызыфагъа­зэрэм, ащ лъыпытэу гумэкIы­гъохэм ядэгъэзыжьын фежьэ. Джырэ лъэхъан унаIэ бэмэ атеудзэн фае. Мары бэмышIэу Ан­зор Аслъан ыкъом ишIуагъэкIэ, бзэджэшIагъэхэм ахэщэ­гъэгъэ цIыфым унэр бэджэндэу ратыным унагъор щыухъумагъэ хъугъэ. Ащ фэдэ щысэу бэ къэпхьын плъэкIыщтыр.
— IофшIэгъ уахътэр зысыухырэ ужыми цIыфхэм зыкъысфагъа­зэ, — къыкIегъэтхъы полицием имайорэу Хьагъундэкъом. — Къу­лыкъум емыпхыгъахэуи мэхъу — зыр Iоф хэхыгъэ горэмкIэ упчIэжьэгъу къысфэхъу, нэмыкIыр зыгъэгумэкIырэ IофымкIэ къыздэгуащэ. Участковэм иIоф­шIэн хьылъэ, ар график гъэнэфагъэм тетэп, зыкIи зэпыурэп.
Хьагъундэкъо Анзор 2012-рэ илъэсым полицием хэхьагъ, дзэ къулыкъум къызе­кIыжь ужым. Хэгъэгу кIоцI IофхэмкIэ Министерствэм бзэджашIэхэр къэубыты­гъэнхэмкIэ икуп хэтэу илъэсищырэ Iоф ышIагъ, етIанэ полицием и Шъэчэ Гупчэ район отдел иучастковэ уполномоченнэу къулыкъум щыпидзэжьыгъ. Апэ къэлэ гупчэм, вокзалхэр зыдэщыIэхэ лъэныкъом щылажьэщтыгъ, аужырэ илъэсхэм къулыкъур щехьы зигугъу къэтшIырэ чIыпIэм.
ЦIыфхэм апашъхьэкIэ пшъэдэкIыжь пхьыным имэхьанэ Краснодар краим иучастковэ джыри унагъом щызэхишIэгъагъ. Ар 1988-рэ илъэсым Мыекъуапэ къыщыхъугъ, ау а лъэхъаным янэ-ятэхэр илъэситф хъугъэу Шъачэ дэсыгъэх. Адыгэ унэгъо къызэрыкIу: ятэ, Аслъан Къасымэ ыкъор (ащ игъонэмысэу 2022-рэ илъэсым идунай ыхъожьыгъ, икъоджэ гупсэу Мамхыгъэ щагъэтIылъыгъ), исэнэхьаткIэ псэолъэшIыгъ, янэ, Бэлла Рэмэзан ыпхъур (Даур лIакъоу Къэбыхьаблэ щыпсэухэрэм ащыщ) кIэлэ­егъадж. Анзоррэ ащ ышыпхъу нахьы­жъэу Светланэрэ (Сбербанкым икъутамэу Шъачэ дэтым и Гупчэ отделение игъэ­IорышIакIоу мэлажьэ) адыгэ шэн-хабзэмэ атетэу апIугъэх, агъэсагъэх.
Хьагъундэкъо Анзор ицIыкIугъом къы­щегъэжьагъэу зышIэрэмэ зэрэхагъэунэфыкIырэмкIэ, гимнастикэм, атлетикэ онтэгъум, бэнэным апылъыгъ, шэн-хэбзэ гъэтIылъыгъэ ренэу иIагъ. Урысые къэралыгъо социальнэ университетым икъутамэу Шъачэ дэтым юридическэ гъэсэныгъэ щызэригъэгъотыгъ. Илъэс пчъагъэхэм ыгу етыгъэу къулыкъур зэрихьырэм фэшI я III-рэ шъуашэ зиIэ медалэу «Къулыкъур дэгъу дэдэу зэрихьырэм фэшI» зыфиIорэр, медальхэу «Къалэу Шъачэ изэтегъэпсыхьанкIэ IофшIэным гъэхъагъэу щишIыгъэхэр» ыкIи «Къалэу Шъачэ иполицие иуполно­моченнэ участковэ анахь дэгъу» зыфиIохэрэр, щытхъу ыкIи рэзэныгъэ тхылъ пчъагъэхэр къыфагъэшъошагъэх. Къэлэ зэнэкъокъоу рагъэкIокIыгъагъэми къэлэдэсхэу зымакъэ фэзытыгъэр нахьыбагъ, джы краим щыпсэухэрэми цыхьэшхо къыфашIыгъ.

— ЦIыфхэм цыхьэ къызэрэсфашIырэр сигуапэ, сичIыгогъу­хэр джары зыкIэзгъэлъапIэхэрэр, — къеIуатэ ащ. — Джы къызнэсыгъэми зэхэсэхы «Тэри тымакъэ пфэттыгъ!» аIоу. Хэбзэгъэуцугъэм амал къысеты цIыфхэм сишIуагъэ язгъэ­кIынэу, ар згъэцэкIэным сыди­гъуи сыфэхьазыр.
Джащ фэдэ екIолIакIэу иIэр ары цIыфхэм лъытэныгъэ участковэм къызкIыфашIыгъэр, зыкIагъэлъэпIагъэр, къулыкъум ищытхъу зыкIыщаIорэр.
— Сызщылэжьэрэ шъолъырым щыпсэухэрэм цыхьэ къызэрэсфашIыгъэр ары анахь гъэхъэгъэ инэу зыфэслъэгъужьырэр, ахэм сиIофшIэнкIэ зэхязгъэшIагъ хэбзэухъумэкIо къулыкъум илIыкIо зыфэбгъазэмэ, IэпыIэгъур игъом зэрэбгъотыщтыр, — къыкIегъэтхъы Анзор Аслъан ыкъом.
Джы Хьагъундэкъор зэнэкъокъум ифедеральнэ едзыгъо хэлэжьэщт, Краснодар краир ащ къыщигъэлъэгъощт. Зэфэхьысыжь интернет-мэкъэтыныр шэкIогъу мазэм и 1-м къыщыублагъэу и 10-м нэс «Комсомольскэ правдэм» исайт щыкIощт. Урысые зэнэкъокъум ибгъэхэлъхьэ шъхьаIэу «Народнэ участковый — 2025» зыфиIорэр текIоныгъэ къыдэзыхырэм хэгъэгу кIоцI IофхэмкIэ Министерствэм къыфигъэшъошэщт, ар полицием иуполномоченнэ участковэ и Мафэ тефэу, шэкIогъум и 17-м, зэхащэщт.
— Урысые зэнэкъокъоу «Народнэ участковэр» зэрэрагъэкIокIырэм мэхьанэшхо иIэу сэлъытэ, хэбзэ­ухъумэным пылъхэм — полицием иуполномоченнэ участковэхэм Iофэу агъэцакIэрэм зэфагъэ зыхэлъ уасэ къафашIы. Хэгъэгум икурорт шъхьаIэу алъытэрэ Шъачэ щылэ­жьэрэ участковэмэ яIофшIэн хэушъхьафыкIыгъэу щыт, ахэр хэбзэгъэуцугъэм игъэцэкIэнрэ рэхьатныгъэмрэ афэгъэзэгъэхэ къодыеп. Мыщ зыщагъэпсэфынэу къакIорэмэ гупсэф щагъотыным, щынэгъончъэу шъолъырыр щытыным афэшI участковэхэр мафэ къэс цIыфхэм ахэтых, адэлажьэх. Участковэр цIыфхэмрэ ухъумэкIо къулыкъухэмрэ азыфагу ит. Ащ иIэпэIэсэныгъэ, иIоф зэрэфэшъыпкъэм ялъытыгъ къалэм ирахьытныгъэ. Зэнэкъокъум Хьагъундэкъо Анзор зэрэщытекIуагъэм лъэшэу тигъэгушIуагъ, ащ тырэгушхо. Къалэм щыпсэурэмэ зэкIэми тыкъяджэ федеральнэ зэнэкъокъум хэлэжьэщт тичIыпIэгъу амакъэ­хэр фатынхэу, — къыкIигъэт­хъыгъ Шъачэ иадминистрацие хэбзэухъумэкIо къулыкъухэм адэлэжьэгъэнымкIэ идепартамент ипащэ ипшъэрылъхэр зыгъэцэкIэрэ Максим Верченкэм.
Ныбэ Анзор.