ГандболымкIэ Урысыем и Суперлигэ хэт «АГУ-Адыифыр» мы мафэхэм «Уфа-Алисэм» IукIагъ. Адыгэ къэралыгъо университетым иордэунэу Кобл Якъубэ ыцIэ зыхьырэм щыкIогъэ ешIэгъум типшъашъэхэм ешIэкIэ дахэ къыщагъэлъэгъуагъ, яфэшъуашэу текIоныгъэр къыдахыгъ.

«АГУ-Адыиф» — «Уфа-Алиса» — 44:29 (25:10)
«АГУ-Адыифым» хэтыгъэх: къэлэпчъэIутхэр — Черницовар, Гобадзе, Черновар. Вайкум — 10, Гильфановар — 6, Смирновар — 6, Краснокутскаяр — 5, Салаховар — 4, Локян — 4, Коблыр — 3, Хавронинар — 2, Казихановар — 1, Миловар — 1, Кожубековар — 1, Косаревар — 1.
«Уфа-Алисэм» щешIагъэх: къэ­лэпчъэIутхэр — Пономаре-
вар, Ралько, Долотовских. Сбытовар — 5, Синюгинар — 4, Тарасовар — 4, Раджабековар — 3, Мельниковар — 3, При­ходько — 3, Акентьевар — 3, Пичугинар — 2, Куренковар — 1, Голубевар — 1.
Командэхэр зэфэдэу джэгунхэу бэхэм къащыхъугъ. Ау Мыекъуапэ игандболисткэхэр зэIукIэгъум нахь дэгъоу зэрэфэхьазырхэр апэрэ таймым къыгъэлъэгъуагъ. Типшъашъэхэр ыпэкIэ дэгъоу щешIэщтыгъэх, ухъумэныри зэрифэшъуашэу агъэцакIэщтыгъ.
Ащ ишIуагъэкIэ апэрэ едзыгъор 25:10-у къахьыгъ.
ЯтIонэрэ таймым тикомандэ хэт ныбжьыкIэхэр ешIапIэм къи­хьагъэх. Мы уахътэм хьакIэхэм яешIакIэ нахь рагъэхъугъ, ау бэ къадэхъугъэп. КомандитIум зэхэтэу къэлапчъэм Iэгоо 73-рэ да­дзагъ. А пчъагъэм щыщэу 10-р тигандболисткэу Валерия Вайкум игъэхъагъ. Ар зэIукIэгъум иешIэкIо анахь дэгъоу къыхагъэщыгъ.
— ТызIукIэщт командэм иешIа­кIэ пэшIорыгъэшъэу зэхэтфыгъ, ащ ишIуагъэкIэ непэ мыщ фэдэ зэфэхьысыжь тиI. Пшъашъэхэр зэгурыIохэу, зыкIыныгъэ азы­фагу илъэу джэгугъэх, ащ мы текIоныгъэр къыкIэлъыкIуагъ, — къы­Iуагъ «АГУ-Адыифым» хэт Ва­лерия Вайкум.
Мыекъуапэ икомандэ я 9-рэ чIыпIэм щыт. КъыкIэлъыкIощт зэIукIэгъур тигандболисткэхэм Краснодар щыряIэщт, чъэпыогъум и 29-м «Кубань» дешIэщтых.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Ростов-Дон» — 14.
2. «ЦСКА» — 14.
3. «Астраханочка» — 10.
4. «Черноморочка» — 10.
5. «Звезда» — 9.
6. «Лада» — 8.
7. «Кубань» — 6.
8. «Динамо-Синара» — 5.
9. «АГУ-Адыиф» — 4.
10. «Луч» — 2.
11. «Уфа-Алиса» — 2.
12. «Университет» — 0.