Къалэу Мыекъуапэ игупчэ итыгъэ псыIэ­за­пIэу тарихъ мэхьанэ зиIэ псэуалъэу зэтырагъэпсыхьажьыгъэм щыIагъ Адыгеим и ЛIышъхьэу КъумпIыл Мурат. БэшIагъэ а
унэр замыгъэфедэ­жьы­щтыгъэр ыкIи теплъаджэ хъугъагъэ. Джы унэ-саугъэтыр зэтырагъэпсыхьажьыгъ ыкIи къэлэ проку­ратурэм ие хъугъэ.

Сатыум зыщыпылъхэ псэуалъэм иапшъэ­рэ къат тапэкIэ прокуратурэр чIэтыгъ. Республикэм и ЛIышъхьэ АР-м ипрокурорэу Игорь Шевченкэр игъусэу IофшIэнэу агъэцэкIагъэхэм язытет уасэ фашIыгъ, Максим Яковенкэр зипэщэ къэлэ про­куратурэм щылажьэхэрэми гущыIэгъу афэхъугъэх.
Республикэм и ЛIышъхьэ IофшIэпIэ кабинетыкIэхэр, зэхэсыгъохэр зыщы­кIощтхэ ыкIи техникэм фытегъэпсыхьэгъэ унэхэр къыплъыхьагъэх. Iофэу агъэ­цэкIагъэм КъумпIыл Мурат осэшхо фи­шIыгъ. Республикэм ипащэхэм яIэпыIэгъу хэлъэу культурэ кIэным къыхиубытэрэ псэуалъэр зэрэпсаоу зыпкъ рагъэуцо­жьыгъ, 1908-рэ илъэсым ашIыгъэгъэ псэуалъэм саугъэт мэхьанэу иIэ хъу­гъагъэр къагъэнэжьыгъ.
Подрядчикхэм тарихъ теплъэ зиIэ псэуалъэр джырэ уахътэм диштэу зэтегъэпсыхьэгъэным иамалхэр къагъоты­гъэх. 2024-рэ илъэсым республикэ бюджетым сомэ миллион 50 фэдиз а гухэлъхэм апэIуагъэхьанэу къыхагъэкIыгъагъ. Псэо­лъэшIхэм унэ кIоцIхэри, ыкIыби дахэу зэтырагъэпсыхьагъэх, тIоу зэтет псэуа­лъэм иунашъхьэ, ишъхьаныгъупчъэхэр, ипчъэхэр зэблахъугъэх. Архитектурэ теплъэ къезытыщт амалхэр агъэфедэхэзэ, унэ гупэри агъэцэкIэжьыгъ. Къэлэ гупчэм иархитектурнэ теплъэ анахь къэ­зыгъэдэхэщтхэм зыкIэ ащыщ хъугъэ псэуалъэр ЗэгурыIоныгъэмрэ ЗыкIыныгъэмрэ ягупчэ — джэныкъом ыгупэкIэ гъэзагъэ.
Адыгеим и ЛIышъхьэ къызэрэхигъэщыгъэмкIэ, тарихъ псэуалъэр зыпкъ зэрэрагъэуцожьыгъэр Мыекъуапэ иар­хитектурнэ ыкIи итарихъ кIэн икъэухъумэн изы Iахьэу зэрэхъугъэм имызакъоу, Адыгеим ихэбзэухъумэкIо системэ имылъку-техникэ зытет гъэпытэгъэнымкIи амал дэгъоу хъугъэ.
«Прокуратурэм Iоф щызышIэхэрэм ящыкIагъэр зэкIэ яIэ зыхъукIэ, япшъэ­рылъхэм нахь икъоу анаIэ атырагъэтын, адэлэжьэнхэ алъэкIыщт. Прокурор лъып­лъэным тапэкIи нахь зыкъегъэIэтыгъэнымкIэ агъэкIэжьыгъэ псэуалъэм ишIуагъэ къэкIонэу, цIыфхэм яфитыныгъэхэм якъэухъумэнкIэ мэхьанэшхо зиIэ пшъэ­рылъхэм ягъэцэкIэн прокуратурэм щылажьэхэрэм джыри нахьышIоу анаIэ аты­рагъэтыным иамал къытынэу тэгугъэ», — къыIуагъ КъумпIыл Мурат.
Адыгеим и ЛIышъхьэ къэлэ прокуратурэм иIофышIэхэм гущыIэгъу зафэхъум, IофшIэнымкIэ амалыкIэу щыIэ хъугъэхэм агъэразэхэмэ зэригъэшIагъ. Игорь Шевченкэм IофшIэпIэ чIыпIакIэхэр Iэрыфэ­гъоу щытынхэмкIэ, цIыфхэр рагъэблэгъэнхэмкIэ, къэлэ прокуратурэм зыкъыфэзыгъазэ­хэрэм яшIоигъоныгъэхэр зэрищыкIагъэм лъыкIахьэу зэшIохыгъэнхэмкIэ Адыгеим и ЛIышъхьэ ишIуагъэ къызэригъакIорэм пае зэрэфэразэр къыхигъэщыгъ. Прокуратурэм къэкIорэ цIыфхэм апае апэ-
рэ къатым егъэблэгъэпIэ унэ къыха­гъэкIыгъ. ХэушъхьафыкIыгъэ дзэ операцием хэлажьэхэрэмрэ ащ иветеранхэмрэ IэпыIэгъу ятыгъэнми шъхьафэу анаIэ тырадзагъ.
Адыгеим и ЛIышъхьэ къызэрэхигъэщыгъэмкIэ, республикэм ихэбзэ къулыкъухэмрэ прокуратурэмрэ зэгурыIоныгъэ-зэдэлэжьэныгъэ азыфагу илъ зы­хъукIэ, Адыгеим щыпсэурэ цIыфхэм яфитыныгъэхэри хабзэм диштэу къэу­хъумагъэ хъущтых. Адыгеим зыпкъитыныгъэ илъынымкIэ, хабзэр укъуагъэ мыхъунымкIэ хэбзэ къулыкъумрэ прокуратурэмрэ язэдэлэжьэныгъэ тапэкIи нахь зэрэпытэщтым, нахь шIуагъэ къызэрихьыщтым ицыхьэ зэрэтелъыр КъумпIыл Мурат къыIуагъ.
АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.