«ЩыIэныгъэм пае ин­фраструктурэр» зыфиIорэ лъэпкъ проектым къыдыхэлъытагъэу Джэджэ районым истаницэу Дондуковскэм екIурэ гъогу зэпызычырэ псыхъоу Фарзэ телъ лъэмыджыр агъэцэ­кIэжьы.
1960-рэ илъэсхэм ар ашIыгъ, уплъэкIунхэм къызэрагъэлъэ­гъуагъэмкIэ, зэхэоным иIоф нэсыгъагъ.
Лъэмыджым метри 150-рэ икIыхьагъ. Ащ игъэкIэжьын пстэумкIи сомэ миллиони 176,8-рэ пэIухьащт, IофшIэнхэр ыкIэм рафылIагъэх.
«Лъэмыджым игъэцэкIэжьын процент 80-м ехъу хагъэкIыгъ. Ар ашIыфэкIэ автомашинэхэмрэ лъэсрыкIохэмрэ агъэфедэщт псэуалъэу агъэпсыгъагъэм изэ­хэхыжьын мы уахътэм ыуж ихьагъэх, ащ дакIоу лъэмыджым асфальт тыралъхьажьы, лъэс­рыкIо гъогур зэтырагъэпсы-
хьэ, етIанэ зыщищыкIагъэм тамы­гъэхэр щагъэуцущтых е щагъэтхъыщтых. Тыгъэгъазэм и 1-м зэкIэри аухынэу проектым къы­дэлъытагъ», — къыIуагъ «Адыгеяавтодорым псэолъэшIынымкIэ иотдел ипащэу Павел Бахтин.
2022 — 2024-рэ илъэсхэм ащ фэдэ псэолъи 7, ар метрэ 435-рэ мэхъу, шапхъэхэм ади­штэу Адыгеим щызэтырагъэ­псыхьажьыгъ. 2025-рэ илъэсымкIи 5 республикэм щагъэкIэ­жьынэу агъэнэфэгъагъ. Ахэм ащыщэу Тэхъутэмыкъое районым щыIэ Чыбый каналым телъым ишIыжьын бэдзэогъу мазэм аухыгъ, псыхъоу Псынэф илъэмыдж джырэблагъэ атIупщыжьыгъ. Илъэсым ыкIэм нэс къэнагъэр ашIыжьынэу пIалъэ яI, ау нахьыжьэу IофшIэнхэр аухынхэу ары зэрэгугъэхэрэр.
Лъэмыджитфыр зэкIэмкIи метри 196-рэ мэхъу, сомэ миллион 565-рэ ахэм ягъэкIэжьын пэIухьащт.