ХьисапымкIэ заушэтыщт
Чъэпыогъум и 24-м къыщегъэжьагъэу и 28-м нэс я IV-рэ Къыблэ-Урысые хьисап олимпиадэу «Ассара» зыфиIорэр Адыгэ къэралыгъо университетым щыкIощт. Хабзэ зэрэхъугъэу, ащ пшъэшъэжъыехэр ары хэлажьэхэрэр.
ЗэкIэмкIи олимпиадэм Урысыем ишъолъыр 20-мэ къарыкIыгъэ кIэлэеджэкIо 52-рэ хэлажьэ. Мыгъэ Абхъазым ыкIи Узбекистан щыщхэри Адыгеим къэкIуагъэх.
Iофтхьабзэр мэфэкI шIыкIэм тетэу Адыгэ къэралыгъо университетым и Мыекъопэ къэралыгъо гуманитар-техническэ колледж непэ къыщызэIуахыщт. Олимпиадэм иапэрэ уцугъо чъэпыогъум и 25-м зэхащэщт, ятIонэрэр — и 26-м. Нэужым Республикэ естественнэ-хьисап еджапIэм рагъэблэгъэщтых, олимпиадэм хэхьэрэ гъэцэкIэнхэр зэрауплъэкIухэрэм шапхъэу пылъхэр къафаIотэщт. Iофтхьабзэр мэфэкI шIыкIэм тетэу зэфашIыжьыщт.
Адыгэ къэралыгъо университетыр, Республикэ естественнэ-хьисап еджапIэр ыкIи шъолъыр гъэсэныгъэ гупчэу «Полярис-Адыгея» зыфиIорэр олимпиадэм кIэщакIо фэхъугъэх. Ащ изэхэщэнкIэ Iэпы-Iэгъу къафэхъугъ Сберымрэ Адыгэ Республикэм гъэсэныгъэмрэ шIэныгъэмрэкIэ и Министерствэрэ.