Джары зэреджагъэхэр АР-м и Лъэпкъ тхылъ­еджапIэ къыщызэIуахыгъэ къэгъэлъэгъонэу, адыгэ тха­кIоу, усакIоу, кIэлэ­егъаджэу Мэхъош Рус­лъан Ибрахьимэ ыкъор къызыхъугъэр илъэс 85-рэ зэрэхъурэм фэгъэхьыгъэм.

Адыгэ лъэпкъым итха­кIохэр зэлъягъэшIэгъэнхэм, ящыIэныгъэ ыкIи ятворчест­вэ афиIотыкIыгъэным къэ­гъэлъэгъоныр фэлажьэ.
Тхылъ къэгъэлъэгъоным тхакIоу Р. Мэхъошым икъэлэм къыпыкIыгъэ произ­ведениехэр, ахэр тхылъ 15 фэдиз мэхъух, адыгэ литературоведхэм, шIэныгъэлэжь­хэм, журналистхэм тхакIом итворчествэ къыраIуалIэхэ­рэр хэхьэх.
«Адыгэ Республикэм итха­кIохэм я Союз» зыфиIорэ тхылъэу тхакIохэм якъэхъу­кIэ ыкIи ятворчествэ кIэкIэу къызщыIотагъэр, сборникхэу адыгэ литературэм, фольклорым яIофыгъохэр къызщиIотыкIыгъэхэр щыгъэфедагъэх. Мэхъошым итвор­чествэ фэгъэхьыгъэ тхыгъэ­хэу Шъхьэлэхъо Абу, Тхьаркъохъо Юныс, Цуекъо Алый, нэмыкIхэм атхыгъэхэм тха­кIом иIофшIэкIагъэр ащыкIэгъэтхъыгъ.
Тхылъэу «Радетели земли Тахтамукайской» зыфиIорэм мы районым ицIыф пэрытхэм яхьылIэгъэ тхыгъэхэр къыдэхьагъэх. ТхакIом ышъхьэкIэ пэкIэкIыгъэр, авторскэ программэу «ШIэжь» ыкIи методическэ IэпыIэгъоу «Зов Родины» зэригъэпсыгъэр, ахэмкIэ Урысые зэнэкъо­къум илауреат зэрэхъугъэр къызщыриIотыкIыгъэр къэ­гъэлъэгъоным хэлъых.
Илъэс пшIы пчъагъэм Мэ­хъош Руслъан Iофышхо зэри­шIагъэм ищыс тхылъитIоу «Адыгэхэр» зыфиIорэр.
МэкIайхэм атетых 2002-м къыдэкIыгъэу урысыбзэкIэ «Зов Родины» зышъхьэр.
Пьесэхэр зыдэт сборникэу «МыкIодыжьыщт тхыдэхэр» ыкIи иусэ тхылъ зэфэшъхьаф­хэр — «Лъэпкъ намыс», «Сыгу къышъуфихыгъэу…», нэмыкIхэри щызэпэIутых.
Лъэпкъ тхылъеджапIэм краеведениемрэ литерату­рэмрэкIэ иотдел иIофышIэу ЛIышэ Данэ къэгъэлъэ-гъоныр ыгъэхьазырыгъ, ар ­чъэпыогъум ыкIэм нэс зэIухыгъэщт.
Дзэукъожь Нуриет.