Зызэхащагъэр илъэсиплI хъугъэ
Мыекъопэ къэралыгъо технологическэ университетым къыщызэIуахыгъэу «Точка кипения» зыфиIорэм Iоф зишIэрэр илъэсиплI зэрэхъурэм фэгъэхьыгъэ форум мы мафэхэм зэхащагъ.
НыбжьыкIэхэм яинтеллектуальнэ ыкIи ятворческэ IэпэIэсэныгъэ хэгъэхъогъэныр, проектхэм ягъэпсын фэгъэсэгъэнхэр ыкIи шъолъырым исоциальнэ-экономикэ лъэныкъо хэщэгъэнхэр ары ащ пшъэрылъ шъхьаIэу иIэр.
Пэублэм технологическэ кружокхэмкIэ Ассоциацием ивице-президентэу Анастасия Старостинскэм пэIудзыгъэ шIыкIэм тетэу Iофтхьабзэм хэлажьэхэрэм закъыфигъэзагъ. Сатыум емыпхыгъэ организацие шъхьафэу «Платформа НТИ-м» иотдел ипащэ игуадзэу Антон Артамкиным, «Точка кипения» зыфиIорэм ипрограммнэ пащэу, маркетингымкIэ, сервисымкIэ ыкIи зекIонымкIэ кафедрэм идоцентэу, Лъэпкъ премиеу «Страну меняют люди» зыфиIорэм илауреатэу Светлана Новиковам джащ фэдэу гущыIэ аратыгъ.
Форумыр мэфитIо кIуагъэ, апэрэм гурыт еджапIэу N 20-м ия 5-рэ класс щеджэхэрэр хэлэжьагъэх. Лъэпкъ киберфизическэ платформэу «Берлога» зыфиIорэр щыIэныгъэм щыпхыращыгъ. Нэужым интерактивнэ программэм иегъэджэн сыхьатэу «Уроки Берлоги: как стать первопроходцем» зыфиIорэр зэхащагъ. Ащ ыуж Мыекъопэ къэралыгъо технологическэ университетым истудент лъэпкъ обществэ хэхъоныгъэхэр ышIынхэмкIэ стратегическэ сессиеу «Основа науки» зыцIэр зэхащагъ. Джащ фэдэу гупшысэнымкIэ Клубым иIофшIэн ашIогъэшIэгъонэу ныбжьыкIэхэр хэлэжьагъэх.
ЯтIонэрэ мафэм инженер инновациехэмкIэ ыкIи предпринимательствэмкIэ студентхэм яшIэныгъэхэм ахагъэхъуагъ. ЦIыф зэрымыс авиацием епхыгъэ къэгъэлъэгъон зэхащагъ. Студент конструкторнэ бюром ыкIи Дзэ егъэджэн гупчэм ащашIыгъэ пкъыгъохэр арагъэлъэгъугъэх. Фильмэу «Техпреды» зыфиIорэмкIэ форумыр зэфашIыжьыгъ.
Светлана Новиковам къызэриIуагъэмкIэ, «Точка кипенияр» 2021-рэ илъэсым чъэпыогъу мазэм къызэIуахыгъагъ. Лъэпкъ технологическэ гухэлъхэмкIэ Платформэм ыкIи Мыекъопэ къэралыгъо технологическэ университетым зэзэгъыныгъэу зэдашIыгъэм ишIуагъэкIэ ар агъэпсыгъ. Ащ къыщегъэжьагъэу чанэу Iоф ешIэ, ипшъэрылъхэр зэрифэшъуашэу егъэцакIэх. Мыщ лекциехэр, конференциехэр, семинархэр, вебинархэр ыкIи нэмыкI Iофтхьабзэхэр ренэу щызэхащэх. ИлъэсиплIым къыкIоцI рагъэкIокIыгъэ Iофтхьабзэхэм нэбгырэ 8200-м ехъу ахэлэжьагъ. Зыщызытхыгъэхэм япчъагъэ нэбгырэ мин 54-м ехъу. НыбжьыкIэхэр зэхэтхэу Iоф зэрашIэщтым фагъасэх.
«Университет 2035-рэ» зыфиIорэм къыдыхэлъытагъэу программэ зэфэшъхьафхэм чанэу ахэлажьэх. НыбжьыкIэ проектхэмкIэ урысые зэнэкъокъоу «Воплоти свою мечту!» программэу «ФудСовет — еда будущего» зыфиIохэрэм, форумэу «Сильные идеи для нового времени» ыкIи нэмыкIыбэхэм защаушэтыгъ.
Шъолъырым щызэхащэрэ Iофтхьабзэхэм «Точка кипения» зыфиIорэр чанэу ахэлажьэ. Ахэм ащыщых шIэныгъэмкIэ ыкIи мэкъумэщ хъызмэтымкIэ дунэе конференциехэр, гъэсэныгъэ джэгукIэхэм ямарафонхэр, программированиемкIэ Iофтхьабзэхэр, нэмыкIхэри.
ДЕЛЭКЪО Анет.