Адыгеим икIэлэеджакIо­хэу зыкI къэралыгъо ушэтынымкIэ балли 100 къэзыхьыгъэхэм ахъщэ шIу­хьафтынэу сомэ мини 100-м ехъу аратыщт, ­республикэ бюджетым
ар къыхагъэкIыщт.

«Ащ фэгъэхьыгъэ Указым бэмышIэу сыкIэтхагъ. ЗыкI къэ­ралыгъо ушэтыным балли 100 къыщызыхьыгъэхэр ахъщэкIэ кIэгъэгушIугъэнхэу унашъо зэ­рэсшIыгъэм фэгъэхьыгъэу ыпэ­кIэ ныбжьыкIэ сэнаущхэм зэIу­кIэгъу задэсэшIым къыщысIо­гъагъ. ЕджэнымкIи, творчествэм­кIи, спортымкIи гъэхъагъэ­хэр зышIыгъэ, тиреспубликэ ­ищытхъу языгъэIогъэ, зэнэ­къокъу зэфэшъхьафхэм текIоны­гъэшхохэр ащызышIыгъэ кIэлэ­еджэкIо ма­кIэп тиIэр. Ащ фэ­дэ­хэр тэ еджэ­ным ренэу кIэдгъэгушIухэ тшIоигъу: шIухьафтынхэр афэтэшIы, зядгъэгъэпсэфынэу, Урысыем гъэсэныгъэмкIэ иплощадкэхэм ыкIи проектхэм ахэлэ­жьэнхэу тэгъакIох. Джы илъэс къэс балли 100 къэзы­хьыхэрэм ахъщэ шIухьафтын афэтшIыщт. ТиныбжьыкIэ сэ­наущхэм тарэгушхо, ахэм гъэ­хъа­гъэу яIэ-
хэм атефэрэ уасэ къафашIы тшIоигъу. Балли 100 къызэра­хьыгъэр гъэсэныгъэ дэгъу зэ­ряIэм, еджапIэхэр къэ­зыухы­гъэхэм шIэныгъэ куу зэ­ра­IэкIэ­лъым, ны-тыхэмрэ кIэлэ­егъа­джэхэмрэ IэпыIэгъушхо къызэрафэхъухэрэм ишыхьатэу щыт. А шIухьафтыным къеушыхьаты ащ фэдэ тыныр ахэм къызэ­ралэжьыгъэ шъыпкъэр, тикIэлэ­еджакIохэм тицыхьэ зэрате­лъыр! Мы илъэсым тиреспубликэ икIэлэеджэкIуи 10-мэ балли 100 къахьыгъ! Къихьащт илъэсым ахэр нахьыбэ хъунэу тэгугъэ. ШIухьафтыныр зыфытегъэпсы­хьагъэр ныбжьыкIэ сэнаущхэм ахъщэ IэпыIэгъу зэраратыщтым имызакъоу, кIэлэеджакIохэм шIэныгъэ куу зэрагъэгъотыным кIэгъэгушIугъэнхэр ары. КIэлэ­еджакIохэм тапэкIи IэпыIэгъу тафэхъущт, ахэм зыкъызэIуа­хынымкIэ ищыкIэгъэ амалхэр зетхьащтых, лъэпкъ проекты-
кIэ­хэу «НыбжьыкIэхэмрэ кIэлэ­цIыкIухэмрэ», «Унагъу» зыфиIохэрэм амалэу къатыхэрэр къызфэдгъэфедэщтых», — къа­щитхыгъ КъумпIыл Мурат социальнэ хъытыухэм.