Бжыхьэ дзэ дэщыгъом къыды­хэлъытагъэу, Урысыем и УIэшыгъэ КIуачIэхэм къулыкъур ащызыхьыщт ныбжьыкIэхэм яапэрэ куп чэпыогъум и 21-м ­гъогу техьагъ.
Нэбгыри 8 мэфэкI шIыкIэм тетэу агъэкIотагъэх. Ахэм Москва дзэ округым хэхьэрэ связым игъэIорышIэнкIэ я 42-рэ бригадэм идзэ частэу поселкэу Барыбино дэтым къулыкъур щахьыщт.
Мыщ фэгъэхьыгъэ мэфэкI Iофтхьабзэм хэлэжьагъэх хэушъхьафыкIыгъэ программэхэмкIэ АР-м и ЛIышъхьэ и ГъэIорышIапIэ ипащэ игуадзэу Сергей Кривошей, АР-м идзэ комиссариат ипащэу Александр Авериныр, Мыекъопэ къэлэ администрацием ипащэ игуадзэу Андрей Михайловыр, патриотическэ ыкIи общественнэ организациехэм ялIыкIохэр, дзэ къулыкъум иветеранхэр, ны-тыхэр.
ШIуфэс гущыIэхэмкIэ къэзэрэугъоигъэ­хэм закъыфигъэзагъ Александр Аве­риным.
— Мэзэ 12-у шъукъызэрэтыщтыр псынкIэу кIощт. СыдигъокIи тиреспубликэ икIырэ дзэкъулыкъушIэхэм щытхъу хэлъэу япшъэрылъ зэрагъэцакIэрэм фэдэу шъори тыкъэшъумыгъэукIытэжь. Къулыкъу зыщышъухьыщт связымкIэ бригадэм сыд фэдэрэ лъэхъани мэхьанэшхо иI, арышъ, шъурыгушхонэу щыт. Шъо плъыр-­стыр зыдэщыIэ чIыпIэхэм шъуащэщтэп, ау пшъэрылъэу къышъуфагъэуцухэрэр шIокI имыIэу жъугъэцэкIэнхэ фае, — хигъэунэфыкIыгъ А. Авериным.
Къулыкъур зыхьынэу ежьэгъэ ныбжьы­кIэхэм Андрей Михайловыр къафэлъэ­Iуагъ.
— Тихэгъэгу къэзыухъумэщт ныбжьыкIэхэр зэрэтиIэхэм тырэгушхо. Щытхъу хэлъэу къулыкъур къэшъухьынымкIэ фи­зическэ кIуачIэ, гушхоныгъэ ин зэрэшъухэлъым сицыхьэ телъ, арышъ, тыкъэ­шъумыгъэукIытэжь. Ны-тыхэм закъы­фэзгъазэмэ, шъуикIалэхэр патриотэу зэрэшъупIугъэхэмкIэ «тхьашъуегъэпсэу» шъосэIо, псаоу къагъэзыжьынышъ, обществэм яфэшъошэ чIыпIэ щаубытынэу сафэлъаIо, — къыIуагъ къэлэ администрацием ипащэ игуадзэ.
Нэужым связым игъэIорышIэнкIэ я 42-рэ бригадэ къикIыгъэ ефрейторэу Расим Валиуллиныр дзэ частэу 11606-м итарихъ фэгъэхьыгъэу къыIотагъ.
Къулыкъу зыхьынэу ежьагъэхэм ацIэ­кIэ Сихъу Амир къэгущыIагъ.
— Дзэ комиссариатми, непэ тыз­гъэ­кIотэнэу къекIолIагъэхэми тафэраз. Къы­зэрэтщыгугъыхэрэр къэдгъэшъып­къэ­жьыщт, тидзэ пшъэрылъхэр щытхъу хэ­лъэу дгъэцэкIэщтых, — къыIуагъ Амир.
Iофтхьабзэм икIэух къэзэрэугъоигъэ­хэр щагум дэзэрэщагъэх, ныбжьыкIэхэр агъэкIотагъэх.
Iэшъынэ Сусан.