Сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэм ­иапэрэ еджэгъу едзыгъо аухыгъ, джы ащ хэлэжьэрэ ветеранхэм къыхахыгъэ сэнэхьатым елъытыгъэу IофшIапIэхэм ащыIэхэу яIэпэIэсэныгъэ хагъахъо.
Мы уахътэм программэм изытет, еджэ­ныр зэрэзэхэщагъэр ыкIи къыкIэлъыкIощт Iофтхьабзэхэр «Адыгэ макъэм» къыфиIотагъэх къэралыгъо муниципальнэ къулыкъушIэхэм яшIэныгъэхэм ахагъэхъонымкIэ шъолъыр Гупчэу Мые­къопэ къэралыгъо технологическэ уни­вер­ситетым щагъэпсыгъэм ипащэу Паф Фатимэ.
Шъугу къэдгъэкIыжьын, хэушъхьафыкIыгъэ дзэ операцием хэлэжьагъэхэр къэралыгъо ыкIи муниципальнэ хэбзэ къулыкъухэм, къэралыгъо компаниехэм Iоф ащашIэным фэгъэхьазырыгъэнхэм программэу «Адыгеим и ЛIыхъужъхэр» тегъэпсыхьагъ. ДзэкъулыкъушIэ ыкIи ветерани 149-рэ проектым хэлэжьэнхэу лъэIу тхылъ къатыгъ, ахэм ащыщэу нэбгырэ 38-рэ къыхахыгъ. Нэбгырэ 18-р очнэу еджэх, 20-р — IэпэчIэгъэнэ купым хэтых. ТекIоныгъэ къыдэзыхыгъэхэм зэкIэми апшъэрэ гъэсэныгъэ яI, къэ­ралыгъом ыпашъхьэ гъэхъэгъэшхохэр щыряIэх, гъэIорышIэн IофшIакIэми хашIыкIы.
— Программэм иапэрэ едзыгъо шышъхьэIум и 25-м къыщегъэжьагъэу Iоныгъом и 4-м нэс телъытэгъагъ. Ар зэрифэшъуашэу тилIыхъужъхэм акIугъ, кIэух дэгъухэр къагъэлъэгъуагъэх. Джы ахэр стажировкэм мэзищрэ щыIэщтых, цIыфхэм аIукIэщтых, гъэIорышIэныр аIэ къырагъэхьащт. ЯгъэсакIохэм анаIэ къатетэу къэралыгъо къулыкъум иIофшIэн нэIуасэ фашIых. ГъэсакIохэр къэ­ралыгъо муниципальнэ къулыкъухэм ялIыкIох. ЯтIонэрэ едзыгъор тыгъэгъа-
зэм ыгузэгухэм рагъэжьэжьыщт, — хигъэунэфыкIыгъ Паф Фатимэ.
ТигущыIэгъу къызэрэхигъэщыгъэмкIэ, а мэзищым къыкIоцI ахэм яеджэни зэпыурэп, ау пэIудзыгъэ шIыкIэм тетэу РАНХиГС-м иплатформэ егъэджэн сы­хьатхэр кIэлэегъаджэхэм ащыфызэ-­
хащэ. Егъэджэн программэр пстэумкIи едзыгъуиплI мэхъу.
— Къыхэзгъэщымэ сшIоигъу, мы едзыгъор зэрэзэхащэгъэгъэ шIыкIэр ветеранхэм лъэшэу зэрашIо­гъэшIэгъо­ныгъэр. Мафэрэ еджэныр заухыкIэ, пчыхьэм зыгъэпсэфыпIэ чIыпIэхэр къяд­гъэкIухьагъэх: музейхэр, щэ­рыуапIэр, культурэм иунэхэр, филармониер, зекIо чIыпIэхэр, нэмыкIхэри, — хигъэунэфыкIыгъ Паф Фатимэ.
Ащ къызэриIуагъэмкIэ, ятIонэрэ едзы­гъор финасхэм ыкIи экономикэм афэгъэхьыгъэщт. Экономикэм диштэу политикэр зэрэбгъэпсыщтым, ащ къыды­хэплъытэн фэе лъэныкъохэм анаIэ ты­рагъэтыщт. Ящэнэрэр — къэбарлъыгъэIэс технологиехэр гъэIорышIэным зэрэщагъэфедэхэрэр. Ащ къыкIэлъы­-
кIощт сэнэхьат гъэсэныгъэр ыкIи Iэпэ­Iэсэныгъэм ихэгъэхъон.
Илъэсым къыкIоцI хэушъхьафыкIыгъэ дзэ операцием иветеранхэр апшъэрэ еджапIэм икIэлэегъэджэ IэпэIасэхэм, шъолъыр хэбзэ къулыкъухэм япащэхэм, лъэпкъ хъызмэтымкIэ Урысые академием испикерхэм, УФ-м и Президент дэжь щыIэ къэра­лыгъо къулыкъум иIофышIэхэм рагъэ­джэщтых.
— 2026-рэ илъэсым шышъхьэIум и 26-м илъэс еджэгъур аухыщт. Къэралыгъо ушэтын атыщт, нэужым зэреджэжьыгъэхэмкIэ диплом аратыжьыщт. Анахь дэгъоу къэзыуххэрэм япроцент 85-м республикэм игъэцэкIэкIо хабзэм ыкIи чIыпIэ зыгъэIорышIэжьыным якъулы­къухэм IофшIапIэ къащафагъотыщт, — къыIуагъ Паф Фатимэ.
Iэшъынэ Сусан.