Ешъуагъэхэм якъыхэгъэщын
Адыгеим икъэралыгъо автоинспекторхэм пэшIорыгъэшъ Iофтхьабзэу «Ешъогъэ водитель» зыфиIорэм къыдыхэлъытагъэу, Мыекъопэ районым ишъолъыр Iофтхьабзэ щырагъэкIокIыгъ. Ешъуагъэу транспорт амалхэр зезыфэхэрэм зэрахьэрэ гъогу укъоныгъэхэр нахь макIэ хъунхэм ар фэIорышIагъ.
СыхьатитIум къыкIоцI инспекторхэм водительхэм язытет, аIыгъ документхэр ауплъэкIугъэх, шъон пытэхэр зэрахьылIагъэхэу рулым IутIысхьанхэу зэрэщымытыр къафаIотагъ. Iофтхьабзэр рагъэкIокIыфэ транспорт амал 40 фэдиз полицейскэхэм ауплъэкIугъ. Ащ зэфэхьысыжь фэпшIымэ, гъогурыкIоным ишапхъэхэр аукъуагъэхэу хъугъэ-шIагъэ къыхагъэщыгъэп.
Мыщ фэдэ пэшIорыгъэшъ Iофтхьабзэхэм япшъэрылъ шъхьаIэр шъон пытэхэр ыкIи наркотикхэр зэзыхьылIэгъэ водителэу автомобилыр зезыфэхэрэр къыхэгъэщыгъэнхэр ары.
Къэралыгъо автоинспекцием шъугу къегъэкIыжьы: ешъуагъэу транспорт амалыр зезыфэрэм е медицинэ уплъэкIуным къемыуцуалIэрэм тазыр тыралъхьэ ыкIи зефэнымкIэ фитыныгъэр Iахы.