ПэшIорыгъэшъ Iофтхьабзэу «Засветись» зыфиIорэр гъогу-патруль къулыкъум иIофышIэхэм Адыгэ Республикэм щырагъэкIокIыгъ. КIэлэцIыкIу гъогу-транспорт фыкъоныгъэхэр дэгъэзыжьыгъэнхэм, бжыхьэ лъэхъаным еджапIэхэм ачIэсхэм ящынэгъончъагъэ зыкъегъэIэтыгъэным ыкIи якультурэ хагъэхъоным ар афэIорышIэ.

Ащ къыдыхэлъытагъэу, нэфынэр къэ­зытырэ пкъыгъохэм ягъэфедэн мэхьанэу иIэр Тэхъутэмыкъое раойным ит поселкэу Отраднэм иеджапIэу N 9-м чIэсхэм агу къагъэкIыжьыгъ.

Автомобилхэр зэрыкIорэ гъогухэм кIэлэцIыкIухэр нахь къэнэфхэу зэпырыкIынхэм фэшI пкъыгъо гъэнэфагъэхэр агъэфедэнхэ зэрэфаер инспекторхэм къафаIотагъ. Анахьэу анаIэ зытырагъэ­тыгъэр нэфынэр къэзытырэ ныбалъэхэм ягъэфедэн. Полицейскэхэм лъэсрыкIо ныбжьыкIэхэм ныбалъэм имэхьанэ агу­ра­гъэIуагъ. КIэлэцIыкIур гъогу хъугъэ-шIа­гъэхэм ахэмыфэнымкIэ, гъогум нахь къыщылъэ­гъонымкIэ мыр амалышIоу щыт. Нэфынэр къэзытырэ пкъыгъохэр загъэфедэхэкIэ, лъэсрыкIохэр авариехэм ахэкIодэнхэм ищынагъо нахь макIэ мэхъу.

Джащ фэдэу кIэлэеджакIохэм агурагъэ­Iуагъ ныбалъэр ащыгъ пае сакъыныгъэ къызхамыгъафэу, замыплъыхьэу гъогум техьэхэ зэрэмыхъущтыр. Ом изытет ыкIи уахътэм ямылъытыгъэу, нэфынэр къэзытырэ пкъыгъохэр зэрагъэфедэнхэ фаер Iофтхьабзэм хэлажьэхэрэм араIуагъ.

Къутырхэу ыкIи поселкэхэу лъэсрыкIо гъогу зыдэщымыIэхэу, остыгъэхэр къызыщымынэфыхэрэм анахьэу сакъыныгъэ къызщыхагъэфэным Iофтхьабзэм изэхэщакIохэр къыфэджагъэх.