Банкхэм хэушъхьафыкIыгъэу щынэгъончъэ счетхэр яIэхэп. Ахэм арахьылIэрэ ахъщэхэр зэрылъ счетхэр е цIыфхэм ежь-ежьырэу къызэIуахыхэрэр зэфэдэхэу щынэгъончъэх. Щынэгъончъэ счетхэм япхыгъэ къэбар зэфэшъхьафхэр къэзыIуатэхэрэр, шъугу ишъуубыт, бзэджашIэх.

ГъэпцIагъэ зыхэлъ бзэджэшIагъэхэм ягугъу Адыгэ Республикэм хэгъэгу кIоцI IофхэмкIэ и Министерствэ бэрэ къе­шIы. Ахэм ащыщэу цIыфхэмкIэ нахь зэрар ин къэзыхьыхэрэр «щынэгъончъэ» е «мыщынэгъончъэ» счетхэм япхыгъэхэр ары.
ХэбзэухъумэкIо къулыкъухэм ыкIи банкхэм яIофышIэхэр цIыфым иахъщэ, ар зэрылъ счетыр дызэхифынхэу телефонымкIэ фытеохэрэп. Ахъщэр зэрэзекIорэмрэ счетым изытетрэ банкым иIофышIэхэу ахэм япхыгъэхэм алъэгъу.
Банкым ахъщэу илъыр ищыкIэгъэ Iофтхьабзэхэр зэшIуихыхэзэ къегъэгъунэ. Ежь цIыфым егъэлыекIыгъэу цыхьэ зэришIырэм къыхэкIэу ыIэшъхьитIукIэ иахъщэ ымышIэрэ цIыфхэм афимытIупщымэ е ежь-ежьырэу чIыфэ зытыримытхэжьымэ, ахъщэу банкым илъыр зыми хэбзэнчъэу ыгъэзекIощтэп ыкIи ащ зи къыщышIыщтэп. ТхьамыкIагъо къыпщымышIыным пае имыщыкIэгъэ къэбархэр умышIэрэ цIыфхэм къафэпIотэнэу ыкIи кодхэр япIонэу щытэп.
Джащ фэдэу банкым иIофышIэхэм телефоныр агъэфедэзэ узэрэзэкIощт е ахъщэ къызэрипхыщт шIыкIэр цIыфхэм къафаIуатэрэп. БзэджашIэхэм защышъу­ухъумэным пае кредитэу къипхыгъэхэр нэмыкI цIыфхэм атеп­тхэ ыкIи а ахъщэр зыгорэм исчет, сыд фэ­дэрэ ушъхьагъу къа­угупшысыгъэми, иб­гъа­хьэ хъущтэп.
Хэти ыгу къэкIы­жьын фае цIыфым ышъхьэкIэ къыштэгъэ чIыфэр ежь-ежьырэу зэриты­жьын фаер. Мы Iофыр епхыгъэп ахъщэр зэрэ­жъугъэфедэщт шIыкIэм е ар нэмыкI цIыф ищыкIагъэу шъулъытэу фэшъутIупщыным.
Джащ фэдэу Интернетым иамалхэр агъэфедэзэ зыгорэ къащэфы хъуми, цIыфхэм ащ анаIэ тетын фае. Зыфэдэр умышIэрэ тучан ущыщэфэныр щынэгъон­чъэу щытэп. УиIоф зэппхынэу щытыр ыпэкIэ цIыфхэр зыщыщэфагъэхэу, цыхьэ зыфэпшIымэ хъущтыр ары. Товарыр зыфэдэр умышIэу пэшIорыгъэшъэу ащ ыуаси пты хъущтэп.
Гузэжъогъу Iоф хэлъэу ахъщэ шъуищыкIагъэ хъумэ, ар шъумыушъэфы, унэм исхэм къафэшъуIуат. ТелефонымкIэ шъумышIэхэрэр къытеохэу, шъуисчет илъ ахъщэр рахынэу зыгорэхэм агу илъэу къышъуаIуагъэми, шъушIошъ шъу­мыгъэхъу. Шъуикартэ ыкIыбкIэ тетхэгъэ номерымкIэ джащ лъыпытэу банкым шъутеуи, шъуисчет къэбарэу пылъыр зэжъугъашI.
Сакъыныгъэр зыщышъумыгъэгъупш, ныбжь зиIэхэми мы Iофыгъохэм анаIэ теряжъугъадз. БзэджэшIагъэ къыжъудызэрахьагъэмэ, полицием телефонэу 02-мкIэ псынкIэу макъэ ежъугъэIу.
Гъомлэшк Байзэт.