Евгений Шварц къызыхъугъэр илъэси 129-рэ зэрэхъугъэм фэгъэхьыгъэ мэфэкI Iофтхьабзэ мы мафэхэм Шварц и Унэ щыкIуагъ. ТхакIом ипхъорэлъфэу Мария Крыжановскаяр ыкIи сатыум емыпхыгъэ автоном организациеу «Дом Шварца» зыфиIорэм иволонтерхэр хьакIэхэм апэгъогъокIыгъ.

Шварц и Унэ дахэу агъэкIэрэкIагъ. Проектэу «Литературное варенье» зыфиIорэр зэхэзыщэгъэ Светланэ ыкIи Олег Колесниковхэм Iофтхьабзэр къызэIуахыгъ. 2023-рэ илъэсым Шварцхэм ягъунэгъугъэхэу, яныбджэгъугъэхэу Соловьевхэм яунагъо щашIыщтыгъэ вареньем ирецепт къызIэкIагъэхьагъэу, драматургым имэфэкI мафэ къекIуа­лIэхэрэм апагъохыгъ. Воронеж къикIыгъэ хьакIэхэм щаим епхыгъэ хабзэхэр, дахэу Iанэм ар зэрэтебгъэуцощтыр къаIотагъ. ИжъыкIэ сыд фэдэ зэхахьи щай емышъохэу, варенье амышхэу зэхэкIыжьыщтыгъэхэп. Айвам хэшIыкIыгъэ вареньеу Соловьевхэм яунагъо ирецептыкIэ агъэхьазырыгъэр зэкIэми агу рихьыгъ.
Нэужым театрализованнэ къэгъэлъэ­гъонэу «Предчувствие счастья» зыфиIорэм къэзэрэугъоигъэхэр еплъыгъэх. А. А. Хьанэхъум ыцIэкIэ щыт Камернэ музыкальнэ театрэм иартистхэм, Ныс­хъэпэ театрэм, искусствэхэмкIэ Адыгэ республикэ колледжым истудентхэм къэгъэлъэгъонхэр къашIыгъэх. Евгений Шварц ипьесэ зэфэшъхьафхэм атехыгъэ спектакльхэм яплъыгъэх.
Iофтхьабзэм икIэух Шварц и Унэ хьакIэхэм къарагъэплъыхьагъ. Шварц Мыекъуапэ щыпсэу зэхъум иунэ зыфэдагъэр, итхылъхэр, ищыгъынхэр, унэгъо хъарзынэщым щыщ сурэттехыгъэхэм ыкIи нэмыкIхэм нэIуасэ афашIыгъэх. ШIоигъоныгъэ зиIэхэм нысхъапэмэ якъэ­гъэлъэгъонэу «Мыекъуапэ итарихъ» зыфиIорэм еплъыгъэх. Ар Евгений Шварц идневник техыгъэу сурэтышIэу Евгений Быковым ыгъэпсыгъ, джащ фэдэу я XIX-рэ лIэшIэгъум ыкIэм Мыекъуапэ щытырахыгъэ сурэтхэр арагъэлъэгъу­-гъэх.
ДЕЛЭКЪО Анет.