ГъэпцIагъэ хэлъэу ахъщэ тынхэр зэрагъэпсыгъэхэм фэшI уголовнэ Iоф Адыгеим къыщызэIуахыгъ.

ЩынэгъончъэнымкIэ Федеральнэ къулы­къум АР-мкIэ и ГъэIорышIапIэ иследственнэ отделение Тэхъутэмыкъое районым щыщ бзылъфыгъэу илъэс 57-рэ зыныбжьым ылъэныкъокIэ уголовнэ Iоф къызэIуихыгъ.

Ащ ятIонэрэ купым хэхьэрэ сэкъатныгъэ зэрагъэуцурэ узхэм ащыщ иIэу къэзыгъэлъэгъорэ тхылъ нэпцIхэр ыгъэ­федэхэзэ, хэбзэнчъэу пенсие къаIихыщтыгъ. ПстэумкIи ащ тетэу сомэ миллионрэ мин 654,3-рэ къыратыгъ.

Мыщ фэдэ бзэджэшIагъэ зэрихьагъэу Урысыем хэгъэгу кIоцI IофхэмкIэ и Мини­стерствэ Тэхъутэмыкъое районымкIэ иотдел икъулыкъушIэхэм къаубытыгъ илъэс 51-рэ зыныбжь хъулъфыгъэу мы муниципальнэ образование дэдэм щыщыр.

Мыщи ятIонэрэ купым хэхьэрэ сэкъат­ныгъэ зэрагъэуцурэ узхэм ащыщ иIэу къэзыгъэлъэгъорэ тхылъ нэпцIхэр ыгъэ­федэхи, сомэ миллионрэ мин 399,9-м ехъу хэбзэнчъэу къызIэкIигъэхьагъ.
Джащ фэдэу Урысыем хэгъэгу кIоцI IофхэмкIэ и Министерствэ МыекъуапэкIэ икъутамэ иследственнэ отдел илъэс 48-рэ зыныбжь бзылъфыгъэу мы къалэм щыщым ылъэныкъокIэ уголовнэ Iоф къызэIуихыгъ.

ЫпэкIэ зигугъу къэтшIыгъэхэм агъэфедэгъэ тхылъ дэдэхэмкIэ ащ хэбзэнчъэу сомэ миллионрэ мин 797,4-м ехъу къызIэкIигъэхьагъ.

Мы уахътэм Iофыр зэхафы, бзэджэшIагъэр зэрихьаным ушъхьагъу шъхьаIэ фэхъугъэр зэрагъашIэ.