ЩынэгъончъэнымкIэ Федеральнэ къулыкъум АР-мкIэ и ГъэIорышIапIэрэ УФ-м хэгъэгу кIоцI IофхэмкIэ и Министерствэ экономическэ щынэгъончъэнымкIэ ыкIи къолъхьэ тын-Iыхыным пэшIуекIогъэнымкIэ и ГъэIорышIапIэрэ яIофышIэхэм чIычIэгъ баиныгъэхэр хэбзэнчъэу зытыгъущтыгъэ бзэджэшIэ купыр къаубытыгъ.

ЗэрагъэунэфыгъэмкIэ, нэбгыриплI хъоу зэгуахьэхи ар мылъку къэкIуапIэ ашIыгъагъ. Купым щыщэу илъэс 60 зыныбжь хъулъфыгъэм хъызмэтшIапIэу зыIутым Тэхъутэмы­къое районым чIыгу Iахьэу бэджэндэу щиIыгъхэр хэбзэнчъэу игъусэхэм аригъэгъэфедэщтыгъ.

Техникэ гъэнэфагъэ яIэу пшэхъо-мыжъо зэхэлъыр аушъэ­ти дащыщтыгъ. 2024-рэ илъэсым иIоныгъо мазэ къыщегъэ­жьагъэу 2025-м имэзае нэс чIычIэгъ баиныгъэу кубометрэ мини 10-м ехъу атыгъугъ. АхъщэкIэ къэплъытэмэ, ар сомэ миллиони 2,8-м ехъу.

ХэбзэухъумакIохэм къаугъоигъэ материалхэм къапкъырыкIызэ, хэгъэгу кIоцI IофхэмкIэ Министерствэм иследственнэ ГъэIорышIапIэ уголовнэ Iоф къызэIуихыгъ. УФ-м и Уголовнэ кодекс ия 158-рэ статья ия 4-рэ Iахьэу а бзэджэшIагъэр зыхахьэрэм илъэси 10-м нэсэу хьапс къыдэлъытагъ.