Дунэе зэнэкъокъоу «Талантливая Россия» зыфиIорэм икIэух едзыгъо Москва щыкIуагъ. Илъэсым къыкIоцI продюсер гупчэу «Бэстым» ащ хэлэжьэн зылъэкIыщт творческэ купхэр зэрэхэгъэгоу къыщиугъоигъэх. Урысыем культурэмкIэ и Министерствэ иIэпыIэгъукIэ Iофтхьабзэр зэхащагъ.

ИскусствэхэмкIэ еджапIэу псэупIэу Тульскэм дэтым икIыгъэ шъонтырпэо купэу «Адагурым» Гран-при щэгъогогъо къыфагъэшъошагъ. Творческэ купи 106-рэ зыхэлэжьэгъэ зэнэкъокъум къащыхагъэщыгъ. Адыгеим икIыгъэ купым ипащэу ЦIыкIушъэ Мыхьамодэ культурэмрэ искусствэмрэ алъэныкъокIэ гъэхъагъэу ышIыгъэхэм апае медаль къыфагъэшъошагъ. Скрипкэм къезыгъэ­Iорэ кIэлэегъэджэ-музыкантэу Елена Тимошенкэм «За благие дела» зыфиIорэ орденыр къыратыгъ. Ащ шъонтырыпым теорэ ныбжьыкIэхэм скрипкэмкIэ къадыригъэIуагъ. Лъэпкъ мэкъамэмрэ скрипкэмрэ зыщызэIукIэгъэхэ къэгъэлъэ­гъоныр осэшI купым ашIогъэшIэгъоныгъ. «Арцах», «Къушъхьэмэ ямэкъамэхэр», пшъэшъэ къашъоу «Лезгинкэр», «Абазин къашъор» купым зэнэкъокъум къыщигъэ­лъэгъуагъэх.
2019-рэ илъэсым щегъэжьагъэу искусствэхэмкIэ еджапIэу псэупIэу Тульскэм дэтым кIэлэцIыкIу 30 шъонтырыпым теонхэу ЦIыкIушъэ Мыхьамод щегъасэх. Ансамблэм адыгэхэр, дагъыстанхэр, ермэлхэр, урысхэр ыкIи нэмыкI лъэпкъ­хэм къахэкIыгъэхэр хэтых. ЕджапIэм къэкIорэ кIэлэцIыкIухэр чаных, псынкIэх, зэгурэIох, зы унагъом фэдэу зэхэтых, сценэм къызэрэтехьэхэу шъонтырыпхэр «къагъэгущыIэх». Аужырэ лъэхъаным пшъэшъэжъыехэри къакIохэу рагъэ­жьагъ.
— Творческэ ныбжьыкIэ купэу «Адагурым» игъэхъагъэхэм ахэхъо. Купым ипащэу ЦIыкIушъэ Мыхьамодэ егъэджэным хэушъхьафыкIыгъэ екIолIакIэу фыриIэр кIэлэцIыкIухэм ашIогъэ­шIэгъон. Урысыем ыкIи АР-м ащызэхащэрэ Iофтхьэбзэ зэфэшъхьафхэм купыр чанэу ахэ­лажьэ. Мы лIэужыкIэр ары искусствэр неущ лъызыгъэ­кIотэщтыр, — къыIуагъ искусствэхэмкIэ кIэлэцIыкIу еджапIэу псэупIэу Тульскэм дэтым ипащэу ГъукIэлI Батыр.
ЕджапIэм хэхъоныгъэ ышIыныр, кIэ­лэеджакIохэм ясэнаущыгъэ къыхэгъэщыгъэныр, ар къагъэшъыпкъэжьын алъэкIэу гъэсэгъэнхэр, ныбжьыкIэхэр культурнэ щыIакIэм хэщэгъэнхэр, пшъэ­рылъ гъэнэфагъэхэр зыфагъэуцужьынхэр, щыIэныгъэм щыпхыращыжьынхэм фэщэгъэнхэр еджапIэмкIэ анахь шъхьаIэу щытых.

— Дунэе зэнэкъокъум изэфэхьысыжь Москва щыкIуагъ. Ащ мэзиблырэ зыфэдгъэхьазырыгъ. Iоф­тхьабзэм ипшъэрылъ шъхьа­Iэр искусствэм хэхъоныгъэ егъэшIыгъэныр, сэнаущыгъэ зыхэлъ ныбжьыкIэхэр къыхэгъэщыгъэнхэр, лъэпкъ зэфэшъхьафхэр зэхищэнхэр, зым икультурэ адырэм ригъэлъэгъуныр ары. Шъонтырыпым утеоныр псынкIэу бэмэ къашIошIы, ау хэукъох. Къа­рыуи, щэIагъи, IэпэIэсэныгъи ащ ищыкIагъ. ТапэкIэ нахь едгъэ­хъоу тылэжьэщт. Къысфагъэшъошэгъэ медалым лъэшэу сырэгушхо. Купыр Тыркуем кIонэу путевкэ къыратыгъ, — къы­Iуагъ ЦIыкIушъэ Мыхьамодэ.
ЦIыф лъэпкъхэм якультурэ къэухъу­мэгъэнымкIэ ыкIи хэхъоныгъэ егъэшIыгъэнымкIэ, зэкъошныгъэ зэфыщытыкIэхэр гъэпытэгъэнхэмкIэ мыщ фэдэ Iофтхьабзэхэм мэхьанэшхо яI.
НэкIубгъор зыгъэхьазырыгъэр Лъэпшъыкъо Фатим.

Лъэпшъыкъо Фатим.