Адыгеим и Сурэт къэгъэлъэгъуапIэ зэхэхьэ гъэшIэгъон щыкIуагъ. «Изобразительнэ искусствэм ылъэныкъокIэ гъэхъагъэу иIэхэм апай» зыфиIорэ дышъэ медалыр Урысыем исурэтышIхэм я Союз хэтэу, АР-м изаслуженнэ сурэтышIэу, РСФСР-м исурэтышIхэм я Союз и Адыгэ къутамэ ипащэу лэжьэгъэ Эдуард Овчаренкэм зэрэфагъэшъошагъэм ар фэгъэхьыгъагъ.

Адыгэ Республикэм культурэмкIэ иминистрэу Аулъэ Юрэ, АР-м исурэтышIхэм я Союз итхьаматэу Елена Абакумовар, Адыгеим культурэмкIэ и Министерствэ иотдел ипащэу Шэуджэн Бэлэ, сурэтышIхэр, IэпэIасэм иунагъо ыкIи нэмыкI хьакIэхэр зэхахьэм хэлэжьагъэх.
Адыгэ Республикэм культурэмкIэ иминистрэ Эдуард Овчаренкэм фэгу­шIуагъ, медалыр ритыжьыгъ.
— ГукъэкI гъэшIэгъонхэр ыгъэфедэзэ лIэшIэгъуныкъом къы­кIоцI Эдуард Овчаренкэм сурэтыбэ ыIапэ къычIэкIыгъ. Ащ иIофшIагъэхэмкIэ щыIэныгъэр зэрилъэгъурэр къыриIотыкIыгъ. Зигъа­шIэ творчествэм фэзыгъэшъошэгъэ сурэтышIым мы тыныр ифэшъошэ шъыпкъэу сэ­лъытэ, — къы­Iуагъ Аулъэ Юрэ.
Эдуард Овчаренкэм ыныбжь мыгъэ илъэс 90-рэ хъугъэ нахь мышIэми икъэ­лэм ыгъэтIылъырэп. ЗэлъашIэрэ сурэтышIым игупшысэхэмкIэ дунаим ухещэ. Тыкъэзыуцухьэрэ дунаим идэхагъэ иIоф­­­­­­шIа­гъэхэм къащыгъэлъэгъуагъ. Исурэт­-хэр плъышъо зэмышъогъухэр къябэкIэу гъэпсыгъэх, живописымрэ графикэмрэ анахь шъхьаIэх. НахьыбэмкIэ ахэр зыфигъэхьыгъэхэр зыщыпсэурэ чIыпIэр, унагъор, тыкъэзыуцухьэрэ дунаир ары. ЧIыопсым, тарихъым, псэушъхьэхэм, цIыфхэм ящыIакIэ, нэмыкIхэм афэгъэ­хьыгъэ исурэтхэр гъэшIэгъонэу гъэпсыгъэх.
— Эдуард Овчаренкэм искусствэм хэхъоныгъэ ышIыным иIахьышхо хэлъ. Исурэтхэм ахэлъ гупшысэмрэ щыIэныгъэм­рэ язэпхыныгъэ шIыкIэ зэфэ­шъхьафхэмкIэ къырегъэлъэ­гъукIы. Эдуард Никифор ыкъом иIэшIагъэхэм яплъыгъэ пэпчъ ар зыхишIагъ. Джыри илъэсыбэрэ цIыфхэр ыгъэгушIонхэу сыфэ­лъаIо, — къыIуагъ Елена Абакумовам.
— Сурэт пэпчъ гупшысэ шъхьаф хэслъхьагъ. СигъашIэм сыкъызщыхъугъэ Адыгеим идэхагъэ къиз­гъэлъэгъукIыным сыфэлэжьагъ, — къыщыхигъэщыгъ Эдуард Овчаренкэм ипсэлъэ кIэкI.
Адыгэ лъэпкъыр, республикэр дунаим нахьышIоу щашIэнхэм сурэтышIым иIоф­шIагъэхэр фэлажьэх.