Тэхъутэмыкъое район администрацием ныб­­жьыкIэ IофхэмкIэ иотдел ипащэу ЛIэхъусэжъ Светланэ джырэблагъэ тызыIокIэм, гуфакIо­хэм яIофшIэн къытегущыIагъ.

Ащ къызэриIуагъэмкIэ, лъэныкъо зэфэшъхьафхэм ащызэхащагъэхэу гуфакIохэм ядвижение 16 Тэхъутэмыкъое районым ит. Гъэсэныгъэм епхыгъэ организациехэм язакъоу куп 25-рэ яI, ахэм нэбгырэ 11118-рэ ахэт. Ежь Светланэ зипэщэ отделым игуфакIохэм ашIагъэр ары къызтегущыIагъэр.
— Нэжъ-Iужъэу зизакъохэм, зянэ-зятэ е лъыплъэн зимыIэжьхэм, щыIэкIэ къин зиIэхэм аде­Iэнхэр ары пшъэрылъ шъхьаIэу гуфакIохэм яIэр. Ау 2022-рэ илъэсым иIоныгъо мазэ къыщыублагъэу хэушъхьафыкIыгъэ дзэ операцием хэлажьэхэрэмрэ ахэм яунагъохэмрэ IэпыIэгъу ятыгъэныр апшъэ хъугъэхэм ащыщ, — къеIуатэ ащ. — ГущыIэм пае, а илъэс дэдэу хэу­шъхьафыкIыгъэ дзэ операци-
ер зырагъэжьагъэм ишэкIогъу мазэ Херсонскэ хэкум къикIыгъэу Адыгеим къэкощыжьы­гъэхэм ащыщэу нэбгырэ 200 фэдизыр тигъунэгъу Теуцожь районым ит поселкэу Красненскэм дагъэтIысхьэгъагъ. Ахэм апае Инэм, Козэт, Афыпсыпэ ыкIи Щынджые псэупIэ койхэм шIушIэ IэпыIэгъу тигуфакIохэм къащаугъои мызэу, мытIоу ащагъ. Мы Iофым гъэсэныгъэм иучреждениеу районым итхэр чанэу къызэрэхэлэжьагъэхэр къыхэзгъэщымэ сшIоигъу. Ащ нэмыкIэу, апэрэ илъэс дэдэм къыщыублагъэу, тигуфэкIо куп­хэм шIушIэ IэпыIэгъу тидзэ­кIолIхэм апае къаугъои, хъытыухэр ахъых, носилкэхэр, шэф остыгъэхэр, нэмыкIэу ящыкIагъэу аIэ къыхьыщтхэр ашIых.
Джащ фэдэу «Геническэ рай­оным итхылъеджапIэхэм апае» зыфиIорэ Iофтхьабзэм Тэхъутэмыкъое районыр хэлэжьагъ. Тхылъхэр зыщаштэрэ чIыпIэхэр псэупIэхэм ащагъэпсыхи, гъэсэныгъэм иучреждениехэм ягуфакIохэм тхылъ 1076-рэ къаугъоигъ. Ахэр Геническэ районым итхылъеджапIэхэм афатIупщынхэу шъолъыр пункт шъхьаIэм агъэхьыгъэх.
— КIэлэцIыкIухэм, зихэхъогъухэм шIушIэным мэхьанэу иIэр алъыгъэIэсыгъэным, гуфакIохэм ашIэрэм хэщагъэр нахьыбэ хъуным ыуж тит. Ащ фытегъэпсыхьагъ илъэс къэс зэхатщэрэ зэнэкъокъоу «Я выбираю добровольчество!» зыфи­Iорэр. КIэлэеджакIохэм яеплъы­кIэхэр къызщыраIотыкIырэ тхыгъэхэр къагъэхьазырых. Ахэр зэтэгъапшэхэшъ, нахь дэгъухэр къыхэтэхых, ахэм яавторхэр шIухьафтынхэмрэ щытхъу тхылъхэмрэкIэ къыхэтэгъэщых, — къыIуагъ Светланэ.
Джащ фэдэу ащ тызэрэщи­гъэгъозагъэмкIэ, гуфэкIо IофшIэным хэлажьэхэрэр, ежь ишIоигъоныгъэкIэ шIушIэ Iофым зиIахь хэзылъхьэхэрэр шIухьафтынхэмкIэ, щытхъу ыкIи рэзэныгъэ тхылъхэмкIэ къыхэгъэщыгъэнхэм, ахэм яIофшIэн зэпстэумэ алъэгъуным фэшI, нахьыбэрэ игугъу шIыгъэным, гуфакIохэр егъэджэн программэхэм, Iоф­тхьабзэхэм ыпкIэ хэмылъэу е фэгъэкIотэнхэр яIэу ахэлэжьэнхэ амал ятыгъэным афэгъэхьыгъэ унашъо илъэсэу тызыхэтым ижъоныгъокIэ мазэ Тэхъутэмыкъое районым иадминистрацие къыдигъэкIыгъ.

— «Добро.Центр» ыIоу социальнэ гупчэхэр муниципалитетхэм ащыгъэпсыгъэнхэ фаеу щыт. Ахэр зыфытегъэпсыхьа­гъэхэр гуфэкIо IофшIэным, шIушIэным язегъэушъомбгъун ары. ЯкъызэIухын шэпхъэ гъэнэфагъэхэр пылъых, арышъ, ахэм ягъэцэкIэн ти­шъыпкъэу ыуж тит. КъэкIорэ илъэсым зэпстэур зэпыдгъэфэнышъ, къызэIутхышъунэу тэгугъэ, — къыIуагъ ныбжьыкIэ IофхэмкIэ отделым ипащэ.
ТидзэкIолIхэм апае
Алена Агарковар гуфэкIо анахь чанэу Тэхъутэмыкъое районым исхэм ащыщэу ЛIэхъусэжъ Светланэ игугъу къытфи­шIыгъ. Ар къуаджэу Афыпсыпэ дэс, шIушIэ Iофэу зыпылъыри нахьыбэу ащ щегъэцакIэ.
— 2023-рэ илъэсым сшы хэушъхьафыкIыгъэ дзэ операцием хэлэжьэнэу зэкIор ары тидзэкIолIхэм сишIуагъэ язгъэкIынэу ыуж сызихьагъэр, — къытиIуагъ Аленэ гущыIэгъу тызыфэхъум. — Къоджэдэс нахь чанхэри ащыгъум къызгоуцогъагъэх, джыри къызготых. Сшы къэкIожьыгъ, ау гуфэкIо IофшIэныр къэзгъэуцушъугъэп, сыгу къысфидагъэп. ТидзэкIолIэу ащ щыIэхэм тиIэпыIэгъу сыдигъокIи ящыкIагъ.
Аленэрэ игъусэхэмрэ хэушъхьафыкIыгъэ дзэ операцием хэлажьэхэрэм апае хъытыухэр ахъых, шэф остыгъэхэр ашIых, лъэкI зиIэу къуаджэм дэсхэр, зэкIэ къыхэлажьэмэ зышIоигъохэр къыз­дырагъаIэхэзэ нэмыкIэу ящыкIагъэхэр къаугъоихэшъ, атIупщых. ГуфакIом къы­зэрэтиIуагъэмкIэ, Афыпсыпэ къыщызэ­Iуахыгъэ Гупчэу Iоф зыщашIэрэр зычIэт унэр депутатэу Тыркоо Щамилэ къа­ритыгъ.
— ТидзэкIолIхэм зэпхыныгъэ адытиIэу, ахэр къызкIэлъэIухэрэр афэтэ­гъэхьазырышъ, афэтэтIупщы. Тэ тIэкIэ тшIышъурэм, цIыфхэм къаугъоирэм нэмыкIэу, ахъщэ мымакIэ зищыкIэгъэ заказхэр къатыхэу мэхъу. Ар тэ ткIуачIэ къыхьыщтэпышъ, лъэкI зиIэу тикъуа­джэхэм адэсхэм, предпринимательхэм, фермерхэм зафэдгъазэу бэрэ къыхэкIы. ЗыпарэкIи «IыI» къытаIуагъэп, тхьае­гъэпсэух, яшIуагъэ сыдигъокIи къагъакIо. Джащ фэдэу къоджэдэс цIыф къызэрыкIохэми тызэрафэразэр къасIомэ сшIоигъу. Ахэм амалэу яIэмкIэ IэпыIэгъур къаугъои, кIымафэм лъэпэд фабэу къа­хъыхэрэм къыщыублагъэу, шIоIухэм, вареньехэм анэсыжьэу къырахьылIэ, — еIо Аленэ.
Ащ къызэриIуагъэмкIэ, Афыпсыпэрэ Пэнэхэсрэ яеджапIэхэм хъытыухэр ащахъых. А IофшIэным кIэлэегъа­джэхэри, ны-тыхэри, кIэлэеджакIохэри къыхэлажьэх. Мафэм уахътэ зэ­рямыIэу, пчыхьэм ахъын фаеу зэрэ­хъурэм ыпкъ къикIыкIэ, яунэхэм хъытыухэр ащызышIырэ бзылъфыгъэхэми ацIэ къыриIуагъ. Джащ фэдэу «теп­ловизорнэ» зыфаIорэ чыхIэнхэр ти­дзэкIолIхэм афэзыдырэ дакIо гуфакIохэм ахэт.
— ГуфэкIо бзылъфыгъэхэм тишъхьэгъусэхэри лъэшэу къызэрэддеIэхэрэр къыхэзгъэщымэ сшIоигъу. Игъом унэм тызэримыхьажьышъурэм, унэгъо IофшIэным инахьыбэр зэрэзытырагъаорэм имызакъоу, зыгорэм тыкIон фаеми, хьылъэ тыкIэIэн ищыкIагъэми, нэмыкI хъулъфыгъэ IофшIэн щыIэми, ахэр IэпыIэгъу къытфэхъух, — еIо Аленэ.

АкIуачIэ, яуахътэ, ищыкIагъэмэ яахъщэ халъхьэзэ, мы гуфакIохэр тидзэ­кIолIхэм адеIэх. Зыпарэми ыпкIэ къаритырэп, ашIэрэм зи къыкIакIорэп. Ежэхэрэп къыкIэкIонэуи. Хэгъэгур къэз­гъэгъунэрэ тидзэкIолIхэм къинэу алъэ­гъурэм ежьмэ яIофшIэн зырагъапшэкIэ, ахэр зэрэзэпэчыжьэхэр къыхагъэщызэ, яшIушIэн лъагъэкIуатэ.
— ТикIалэхэр къытщэгугъых. КъызкIэлъэIухэрэр амал иIахэмэ зэрафэттIупщыщтыр ашIэ. Сыдэущтэу ахэм ягугъэ, яцыхьэ къызэрэттелъыр дгъэпцIыжьышъущта. ЕтIанэ, угу къыуиIоу
шIу ошIэмэ, щытхъум, тхьауегъэпсэум уяжэнэу щытэп, — еIо Аленэ.
ХЪУТ Нэфсэт.