Мобилизацием изэхэщэнкIэ Iоф­тхьабзэхэр нахь дэгъоу резыгъэ­кIокIыгъэхэм афэгъэхьыгъэу къа­лэу Мыекъуапэ Iоф щызышIэрэ организациехэм азыфагу щыкIогъэ зэнэкъокъум зэфэхьысыжьхэр фашIыгъэх.

Iофтхьабзэм хэлэжьагъэх Мыекъуапэ идзэ комиссарэу Алексей Санташовыр, къэлэ администрацием хэушъхьафыкIыгъэ программэхэмкIэ и ГъэIорышIапIэ ипащэу Александр Равкович. Зэхэсыгъом къырагъэблэгъагъэх организациехэм ыкIи предприятиехэм япащэхэр, джащ фэдэу мобилизацием епхыгъэу Iоф зышIэхэрэр.
Зэхэсыгъом ипэублэ мамыр щыIакIэм илъэхъан мобилизацие щыIэу къызаIокIэ, организациехэм япащэхэм ашIэн фаехэр А. Санташовым агу къыгъэкIыжьыгъ. Ахэр: мобилизационнэ ухьазырыныгъэ яIэнымкIэ Iофтхьабзэхэр зэхэщэгъэнхэр ыкIи регъэкIокIыгъэнхэр, ащкIэ планхэр зэхэгъэуцогъэнхэр, дзэ-учетнэ подразделение­хэр гъэпсыгъэнхэр, дзэ учетымкIэ пшъэ­рылъхэр гъэцэкIэгъэнхэр, нэмыкIхэри. 2025-рэ илъэсым Мыекъуапэ дэт организа­цие 614-мэ дзэ учетым щалъыплъагъэх.
Мыекъопэ дзэ комиссариатым ипащэ къызэрэхигъэщыгъэмкIэ, зэзэгъыныгъэ шIыкIэм тетэу къулыкъу зыхьыщтхэм яугъоинкIэ къафагъэуцугъэ пшъэрылъым изэшIохын джыри лъегъэкIуатэ. Мы уахътэм ехъулIэу ар процент 84-м ехъоу агъэ­цэкIагъ.
— 2025-рэ илъэсым зэзэгъыныгъэ шIы­кIэм тетэу УФ-м и УIэшыгъэ КIуа­чIэхэм нэбгырэ 330-рэ фэдиз дгъэкIонэу щыт, непэ ехъулIэу нэбгырэ 280-рэ фэдиз ащ кIэтхагъэх. Тызыхэт илъэсым а шIыкIэмкIэ къулыкъу зыхьынэу кIуагъэхэр Мыекъуапэ дэт IофшIэпIэ 11-мэ къарыкIыгъэх, — хигъэунэфыкIыгъ А. Санташовым.
Джащ фэдэу организациехэм ыкIи предприятиехэм япащэхэм, Мыекъуапэ дзэ учетым ылъэныкъокIэ пшъэдэкIыжь зыхьыхэрэм гъэгъозэн Iофтхьабзэхэр щытхъу хэлъэу зэрэрагъэкIокIыгъэхэм фэшI зэрафэразэр дзэ комиссарым къы­Iуагъ.
Джащ фэдэу Iофтхьабзэм къызэрэщаIуа­гъэмкIэ, УФ-м зыкъэухъумэжьынымкIэ и Министерствэ зэзэгъыныгъэ дэзышIы зышIоигъохэм ахъщэ тынэу аратырэм хагъэхъуагъ. МыекъуапэкIэ ар сомэ миллиони 3-м нэсыгъ.
Iофтхьабзэм икIэух мобилизациемкIэ зэхэщэкIо анахь дэгъухэм ацIэхэр къараIуагъэх, шIухьафтынхэр аратыгъэх. «Питейный дом» зыфиIорэм апэрэ чIыпIэр фагъэшъошагъ, ятIонэрэр — «Картонтарэр», ящэнэрэ чIыпIэр ыубытыгъ «Мые­къопэ пивэшI заводым». НэмыкI едзы­гъохэмкIи зэнэкъокъур рекIокIыгъ ыкIи къахэщыгъэхэр агъэшIуагъэх.

Iэшъынэ Сусан.